Раст рахӕцӕн Хуыцауыл ӕууӕндынӕн

КОРЕЙАГ ӕвзагыл уагъд чиныг «Фӕсивӕд аргъуанмӕ кӕй нал цӕуынц, уымӕн 31 аххосаджы» нын ӕмбарын кӕны, зӕгъгӕ, бирӕтӕ аргъуанмӕ уымӕн нал цӕуынц, ӕмӕ сӕ фарстытӕн зӕрдӕзӕгъгӕ дзуапп сӕ бон ссарын нӕу. Цӕвиттонӕн, уыдоны базонын фӕнды: «Хуыцауыл ӕууӕндӕг адӕм цӕмӕн хъизӕмар кӕнынц?» кӕнӕ «Аргъуан адӕмы цӕуыл ахуыр кӕны, ӕппӕт уыдӕттыл разы цӕмӕн хъуамӕ уӕм, кӕд ӕмӕ дзы бирӕ цыдӕртӕ сты кӕрӕдзийы ныхмӕ ӕмӕ адӕймаджы зонд зыгъуыммӕ кӕнынц?»

Бирӕтӕ сӕ дины разамонджытӕй рӕстмӕ дзуапп куы нӕ фехъусынц, уӕд сӕм афтӕ фӕкӕсы, ӕмӕ Библийы сӕ фарстытӕн дзуапп нӕй. Дины кусджытӕ сӕхи хъуыдытӕ кӕй фӕдзурынц, уый аххосӕй адӕмӕн сӕ зонд схӕццӕ вӕййы, стӕй сӕ арӕх ӕппындӕр ницыуал фӕуырны — нал дӕр Хуыцау ӕмӕ нал дӕр Библи.

Афтӕ уыди йӕ хабар Эйбелӕн (схъомыл Хуссар Африкӕйы, йӕ ныййарджытӕ хӕст уыдысты лютерайнаг диныл). Мӕнӕ йӕхӕдӕг цы дзуры: «Аргъуаны амонынц, зӕгъгӕ, дам, чи амӕлы, уыдоны Хуыцау „йӕхимӕ айсы“. Фӕлӕ мӕнӕн мӕ бон нӕ уыд бамбарын, уарзондзинады Хуыцау ныййарджыты сӕ сывӕллӕттӕй цӕмӕн „байсы“. Африкӕйы, цы хъӕуы хъомыл кодтон, уым афтӕ у, ӕмӕ цалынмӕ цъиутӕ дзӕбӕх нӕ фестыр уой, уӕдмӕ мадӕл каркмӕ йӕ къух ничи сисдзӕн. Зӕгъгӕ хъуг заинаг разынд, уӕд цалынмӕ ныззайа ӕмӕ роды йӕ мадӕй хицӕн кӕныны афон не ’рцӕуа, уӕдмӕ йӕ нӕ аргӕвдынц. Мӕ зонд ӕй ницы хуызы ахста: ау, ӕмӕ уӕд уарзӕг Хуыцау адӕмӕн афтӕ куыннӕ тӕригъӕд кӕны».

Ахӕм хъуыдытӕ нӕ лӕвӕрдтой ӕнцой Арамӕн дӕр, уый та Канадӕйӕ у. «Ӕртындӕс азы мыл куы цыди, уӕд мӕ фыд амард,— дзуры уый.— Марды уӕлхъус йӕ раныхасы дзырддзӕугӕ сауджын загъта, Хуыцауы кӕй фӕндыд мӕ фыды мӕлӕт, цӕмӕй йӕм уым уӕлӕрвты хӕстӕгдӕр уа. „Хуыцау хорз адӕймӕгты акӕны,— загъта уый,— уымӕн ӕмӕ Хуыцау уарзы рӕстаг адӕймӕгты“. Ӕз ӕй не ’мбӕрстон, Хуыцау ӕрмӕст йӕхи мӕт цӕмӕн кӕны».

Ӕппынфӕстаг Эйбел дӕр ӕмӕ Арам дӕр сӕмбӕлдысты Иегъовӕйы Ӕвдисӕнтыл, семӕ Библи ахуыр кӕнын райдыдтой, ӕмӕ сӕ фарстытӕн дзуапп ссардтой. Уыдон бауарзтой Хуыцауы ӕмӕ йыл  фидарӕй баууӕндыдысты. Стӕй дыууӕйӕ дӕр сӕ цард снывонд кодтой Иегъовӕйӕн ӕмӕ систы йӕ иузӕрдион лӕггадгӕнджытӕ.

Ӕнӕ бӕлвырд зонындзинӕдтӕй Хуыцауыл ӕууӕндӕн нӕй

Уӕлдӕр цы адӕймӕгты кой ракодтам, уыдоны хабар нын цӕуыл дзурӕг у? Хуыцауыл ӕууӕндынӕн ӕнӕмӕнг кӕй хъӕуы, Библи цы дзуры, уый бӕлвырд зонын. Апостол Павел рагон сахар Филиппы цӕрӕг чырыстӕттӕн загъта: «Кувын уый тыххӕй, цӕмӕй уӕ уарзондзинад ноджы фылдӕрӕй фылдӕр рӕза [«бӕлвырд», НД] зонындзинады ӕмӕ алы ӕнкъарындзинады» (Филиппӕгтӕм 1:9). Павелы уый зӕгъын фӕндыд, ома Хуыцауы ӕмӕ не ’муырнджыты уӕд кӕй уарздзыстӕм, Хуыцау чи у, уый бӕлвырд куы зонӕм ӕмӕ йӕ фӕндон цы у, уый куы ӕмбарӕм.

Ӕмӕ уый ӕцӕгдӕр афтӕ у, уымӕн ӕмӕ цӕмӕй искӕуыл нӕ зӕрдӕ дарӕм, ныфс нӕ дзы уа, уый тыххӕй нӕ фыццаджыдӕр хъӕуы уыцы адӕймаджы зонын — цас хуыздӕр, цас ӕввахсдӕр, уыйас хуыздӕр. Уӕдӕ Хуыцауыл баууӕндынӕн дӕр хъӕуы, чи у, уый бӕлвырд зонын. «Уырниад та у, ӕнхъӕлмӕ цӕмӕ кастӕуы, уый сӕххӕстыл ныфс дарын, ӕмӕ цытӕ дзы нӕ уындӕуы, уыдӕттыл дызӕрдыг нӕ кӕнын»,— загъта Павел (Дзуттытӕм 11:1, НФ). Библи цы дзуры, уый бӕлвырд куы нӕ зонӕм ӕмӕ афтӕмӕй куы ӕууӕндӕм Хуыцауыл, уӕд уый у хъазӕн къамтӕй арӕзт хӕдзары хуызӕн. Гыццыл ыл бафу кӕн, ӕмӕ ныккӕлдзӕн.

Библи ахуыргӕнгӕйӕ ды дзуапп ссардзынӕ бирӕ фарстытӕн. Зӕгъӕм Эйбел ӕмӕ Арамӕн бирӕ рӕстӕг ӕнцой чи нӕ лӕвӕрдта, уыцы фарстӕн: адӕм цӕмӕн мӕлынц? Библи нын ӕмбарын кӕны, зӕгъгӕ, «иу адӕймагӕй тӕригъӕд куыд бацыди дунемӕ, ӕмӕ тӕригъӕдӕй мӕлӕт, афтӕ мӕлӕт дӕр бахызт ӕппӕт адӕммӕ, уымӕн ӕмӕ уый мидӕг иуылдӕр тӕригъӕд ракодтой» (Ромӕгтӕм 5:12). Адӕм уый тыххӕй нӕ зӕронд кӕнынц ӕмӕ нӕ мӕлынц, ӕмӕ сӕ Хуыцау йӕхимӕ кӕны — йӕ аххосаг Адамы раконд тӕригъӕд у (Уӕвынад 2:16, 17; 3:6, 17—19). Уымӕй уӕлдай ма нын Библи ӕргом кӕны, кӕй ис ӕцӕг ныфс; уыцы ныфс цӕуы Иегъовӕ Хуыцауӕй. Йӕ Фырт Йесо Чырыстийы уылты тӕригъӕдджын адӕмӕн дӕтты райгасы ныфс (Иоанны 5:28, 29; Куыстытӕ 24:15).

 Мӕрдтӕ куыд райгас уыдзысты, уый бамбарынӕн Библийы фыст ӕрцыд, Йесо адӕймӕгты фӕстӕмӕ цардмӕ куыд раздӕхта, цалдӕр ахӕм цауы (Лукайы 7:11—17; 8:40—56; Иоанны 11:17—45). Библийы уыцы хабӕрттӕ кӕсгӕйӕ ма дӕ хъус ӕрдар, чи райгас, уыдоны хӕлӕрттӕ ӕмӕ хиуӕттӕн уый цы цин ӕмӕ зӕрдӕрухсы хос уыди. Ахъуыды кӕн, уый сӕ Хуыцауы скадджын кӕнынмӕ ӕмӕ Йесойыл баууӕндынмӕ кӕй сразӕнгард кодта, ууыл дӕр.

Абон дӕр, Хуыцау чи у ӕмӕ йӕм цы фӕндтӕ ис, уый адӕм бӕлвырд куы базонынц, уӕд сын афтӕ бацагайы сӕ зӕрдӕтӕ. Бирӕтӕ дзуапп агуырдтой царды ахсджиаг фарстытӕн, фӕлӕ сын зӕрдӕзӕгъгӕ дзуапп никӕй бон уыд раттын. Уый сын сӕ зонд афтӕ схӕццӕ кодта, ӕмӕ ӕнцой нал зыдтой, суанг ма алцӕуылдӕр сӕнӕууӕнк сты. Фӕлӕ Библи ахуыргӕнгӕйӕ ссардтой дзуапп уыцы фарстытӕн, ӕмӕ сӕ цард бынтондӕр фӕивта.

Хуыцауы уарзын — уымӕн лӕггад кӕнынӕн сӕйраг рахӕцӕн

Хуыцауыл ӕууӕндынӕн, кӕд бӕлвырд зонын хъӕуы, чи у, уый, уӕддӕр цӕмӕй йӕ коммӕ кӕсӕм ӕмӕ йын зӕрдӕйӕ лӕггад кӕнӕм, уый тыххӕй уый фаг нӕу. Йесойы куы бафарстӕуыд, Хуыцауы фӕдзӕхстытӕй стырдӕр кӕцы у, зӕгъгӕ, уӕд уый загъта: «Бауарз дӕ Хицау Хуыцауы дӕ ӕппӕт зӕрдӕйӕ, ӕмӕ дӕ ӕппӕт удӕй, ӕмӕ дӕ ӕппӕт зондӕй, ӕмӕ дӕ ӕппӕт хъаруйӕ» (Маркы 12:30). Йесойы ныхӕстӕм гӕсгӕ, адӕймаг Хуыцауы куы уарза, уӕд ӕй ӕнӕмӕнг фӕнддзӕн йӕ коммӕ кӕсын ӕмӕ йын лӕггад кӕнын. Дӕумӕ дӕр ис ахӕм уарзондзинад?

Рейчел (дӕсгай азты дӕргъы Корейы лӕггад кӕны миссионерӕй) афтӕ бамбарын кодта, Хуыцауыл цӕмӕн ӕууӕнды, уый: «Ӕз фӕхъуыды кӕнын, Иегъовӕ йӕ къухты скӕндтытыл куыд цӕстуарзонӕй ауды, йӕ адӕмӕн хатыр кӕнынӕй куыд нӕ фӕллайы; нӕ хорздзинад ӕй куыд фӕнды, ӕмӕ нын кӕй дӕтты, йӕ разы нӕ цы кӕнын хъӕуы, уый базоныны фадат. Уыдӕттыл хъуыдыгӕнгӕйӕ, Хуыцаумӕ мӕ уарзт кӕны тыхджындӕр. Ӕмӕ йӕ кӕй уарзын, уымӕ гӕсгӕ та мӕ фӕнды, цӕмӕй йын лӕггад кӕнон».

Мартӕ у идӕдз сылгоймаг, цӕры Германы ӕмӕ Иегъовӕйӕн лӕггад кӕны 48 азы дӕргъы. Мӕнӕ цы зӕгъы уый та: «Цӕмӕн лӕггад кӕнын Иегъовӕйӕн? Уарзын ӕй, ӕмӕ уымӕн. Алы изӕр дӕр ӕз фӕкувын Иегъовӕмӕ ӕмӕ йын фӕзӕгъын, куыд бузныг дзы дӕн йе ’ппӕт лӕвӕрттӕй, сӕрысӕйраг та Чырыстийы нывондӕй».

О, Хуыцауы кӕй уарзӕм, уый тыххӕй нӕ фӕнды уымӕн зӕрдӕйӕ лӕггад кӕнын. Фӕлӕ цы хъӕуы, цӕмӕй нӕм ахӕм уарзондзинад уа? Хуыцау нӕ куыд уарзы, ууыл хъуыды кӕнын ӕмӕ йын аргъ кӕнын — уый хуызӕн ницы судзы адӕймаджы зӕрдӕйы Хуыцаумӕ уарзты  цӕхӕр. Ӕркӕс ма, цы зӕрдӕрӕвдауӕг ныхӕстӕ ис Библийы: «Чи нӕ уарзы, уый нӕ базыдта Хуыцауы, уымӕн ӕмӕ Хуыцау у уарзондзинад. Хуыцауы уарзондзинад махмӕ райгом ис уымӕй ӕмӕ Хуыцау рарвыста дунемӕ Йӕ иунӕггуырд Фырты, цӕмӕй мах Уый фӕрцы райсӕм цард. Уарзондзинад уый мидӕг ис, ӕмӕ мах нӕ бауарзтам Хуыцауы, фӕлӕ Уый кӕй бауарзта мах ӕмӕ рарвыста Йӕ Фырты, нывондӕн мах тӕригъӕдты тыххӕй» (1 Иоанны 4:8—10).

Хуыцауы уарзт куыд тыхджын у, уый хатыс? Цӕвиттонӕн райсӕм, ивылд доны бахаудтӕ ӕмӕ дӕлдон кӕныс, ӕмӕ дӕ чидӕр фервӕзын кодта, йӕхи мӕлӕты дзыхмӕ кӕй ӕппары, ууыл хъуыды дӕр нӕ акодта, афтӕмӕй. Уыцы адӕймаджы искуы ферох кӕндзынӕ, дӕ цард-цӕрӕнбонты дӕр дзы бузныг нӕ уыдзынӕ? Дӕ бон цыдӕриддӕр уа, уый йын нӕ сараздзынӕ? Хуыцау, йӕ Фырт Йесо Чырыстийы нывондӕн ратгӕйӕ, махмӕ цы уарзондзинад равдыста, уый ницӕимӕ ис абарӕн (Иоанны 3:16; Ромӕгтӕм 8:38, 39). Хуыцауы уарзондзинад дын дӕ зӕрдӕйы уидӕгтӕ куы бацагайа, уӕд ӕй ды дӕр бауарздзынӕ ӕмӕ дӕ фӕнддзӕн, ӕппӕт зӕрдӕйӕ йын куы лӕггад кӕнис.

Хуыцауы хорздзинӕдтӕ ныр дӕр ӕмӕ фидӕны дӕр

Кӕд Хуыцауӕн фыццаджы-фыццагдӕр, кӕй йӕ уарзӕм, уый тыххӕй хъуамӕ лӕггад кӕнӕм, уӕддӕр нын нӕ зӕрдӕтӕ тавы, йӕ лӕггадгӕнджыты кӕй хорзӕхджын кӕны, уый. Апостол Павел ацы хъуыды афтӕ загъта: «Нӕ бантысдзӕн Хуыцауы зӕрдӕ балхӕнын ӕнӕ уырниадӕй; хъӕуы дзы, Хуыцаумӕ чи тындзы, ахӕмты уырнгӕ куыд кӕна, Уый кӕй ис, ӕмӕ Йӕ чи агуры, ахӕмтӕн аргъ скӕнынхъом кӕй у, ууыл» (Дзуттытӕм 11:6, НФ).

Хуыцауы чи уарзы ӕмӕ йын чи лӕггад кӕны, уыдон арфӕгонд куыннӕ сты. Библийы амынд ӕгъдауыл кӕй хӕцынц, уый фӕрцы сӕ бирӕтӕ сты ӕнӕниздӕр (Ӕмбисӕндтӕ 23:20, 21; 2 Коринфӕгтӕм 7:1). Библийы уагӕвӕрдтӕм гӕсгӕ чи цӕры, куысты мидӕг ӕууӕнкджын ӕмӕ куыстуарзаг чи у, уыдоныл сӕ хицӕутты зӕрдӕ никуы ницӕмӕй бахуды, ӕмӕ иу стӕм хаттӕй фӕстӕмӕ ӕнӕ куыстӕй нӕ баззайынц (Колоссӕгтӕм 3:23). Сӕ ныфс Хуыцауыл даргӕйӕ, йӕ лӕггадгӕнджытӕ цыфӕнды уынгӕджы уавӕры дӕр вӕййынц зӕрдӕфидар (Ӕмбисӕндтӕ 28:25; Филиппӕгтӕм 4:6, 7). Сӕйраг та уый, ӕмӕ фидарӕй зонынц, тагъд зӕхх Дзӕнӕт кӕй суыдзӕн ӕмӕ дзы ӕнустӕм кӕй цӕрдзысты (Псалом 36:11, 29).

Ахӕм хорздзинӕдтӕй хайджын чи у, уыдоны зӕрдӕтӕ Иегъовӕмӕ цы ӕнкъарынц? Канадӕйӕ иу чырыстон, Жаклин, зӕгъгӕ, тынг бузныг у Хуыцауӕй: «Йӕ лӕвӕрттӕ се ’ппӕт дӕр диссаг сты, дӕтты нын фидар ныфс — ӕнусон царды ныфс». Эйбел, уӕлдӕр кӕй кой ракодтам, уый та йӕ зӕрдӕйы ӕнкъарӕнтӕ ахӕм ныхӕстӕй ӕвдисы: «Раздӕр ӕз никуы фехъуыстон, Дзӕнӕты зӕххыл ӕнустӕм цӕрӕн кӕй уыдзӕн, уый тыххӕй, ӕмӕ мӕ, ай-гъай дӕр, фӕнды уым цӕрын. Фӕлӕ, зӕгъгӕ, Дзӕнӕты ныфс нӕй, уӕддӕр ӕз зӕрдӕрайгӕйӕ лӕггад кӕнин Хуыцауӕн ӕмӕ уымӕй ӕвдисин, кӕй йӕ уарзын, уый».

Дӕуӕн дӕр дӕ бон у, ӕмӕ фидар уырнындзинады хицау уай

«Ӕфсӕдты Хуыцау Иегъовӕ у рӕстгӕнджытӕн сӕ тӕрхонгӕнӕг; уый кӕсы уыргтӕм ӕмӕ зӕрдӕмӕ»,— дзуры нын Библи (Иереми 11:20). О, Иегъовӕ уыны, мидӕгӕй, нӕ зӕрдӕйы рӕбинаг къуымты цы ӕмбӕхст ис, уый. Алкӕй дӕр хъӕуы йӕ зӕрдӕмӕ ныккӕсын, ӕз цӕмӕн ӕууӕндын Хуыцауыл, зӕгъгӕ. Чи зоны, раздӕр Хуыцауы тыххӕй раст кӕй нӕ хъуыды кодтам, ӕцӕг цы нӕу, уыдӕттыл кӕй ӕууӕндыдыстӕм, уымӕ гӕсгӕ цыдӕртӕ раст нӕ кодтам. Фӕлӕ Библи цы дзуры, уый бӕлвырд куы базонӕм, уӕд нӕ бон суыдзӕн нӕ Рафӕлдисӕг Хуыцау Иегъовӕимӕ нӕ ахастытӕ ӕрнывыл кӕнын (1 Тимофеймӕ 2:3, 4).

Иегъовӕйы Ӕвдисӕнтӕ адӕмимӕ хӕдзары лӕвар Библи ахуыр кӕнынц ӕмӕ сын ӕххуыс кӕнынц, Хуыцау чи у, уый бӕлвырд-бӕрӕгӕй базонынӕн (Матфейы 28:20). Ахӕм ӕххуыс кӕмӕн бакодтой, уыдонӕй бирӕтӕ бауарзтой Хуыцауы ӕмӕ йыл ӕцӕгӕй баууӕндыдысты. Библи ахуыргӕнгӕйӕ уыдон ссардтой «куырыхон зонд ӕмӕ ӕмбаргӕдзинад», ӕмӕ уый фӕрцы ацы фыдрӕстӕг сӕ бон у «ӕдасӕй цӕуын» (Ӕмбисӕндтӕ 3:21—23). Сӕйраг та уый, ӕмӕ сӕ ныр сомбонӕй ис фидар ныфс (Дзуттытӕм 6:19). Дӕуӕн дӕр дӕ бон у, цӕмӕй уай фидар уырнындзинады хицау ӕмӕ хайджын уай уыцы хорздзинӕдтӕй.

[Рамкӕ 4 фарсыл]

Адӕм дзуапп кӕмӕн агурынц, ахӕм зын фарстытӕ

«Дохтыры дӕсныйадыл ахуыргӕнгӕйӕ рынчындоны практикӕйы куы уыдтӕн, уӕд федтон, хорз адӕм низтӕ ӕмӕ фыдбӕллӕхтӕй куыд уынӕргъыдтой. Кӕд Хуыцау ис, уӕд афтӕ цӕмӕн у? Дин ӕрмӕстдӕр зӕрдӕ ӕрсабыр кӕнынӕн у?» (раздӕр пресвитерайнаг аргъуанмӕ чи цыд, ахӕм лӕг, Корейӕ).

«Ӕз арӕх хъуыды кодтон, цымӕ йӕ мӕлӕты фӕстӕ мӕ фыд (фыднозт кодта) кӕдӕм бахауд: зындонмӕ ӕви уӕлӕрвтӕм. Ӕз тынг тарстӕн мӕлӕтӕй, зындоны койӕ-иу мӕ хъуын арц сбадт. Мӕ зонд ӕй нӕ ахста, уарзаг Хуыцауӕн уый йӕ бон куыд у, ӕмӕ искӕй зындонмӕ ӕнустӕм хъизӕмар кӕнынмӕ арвита» (раздӕр католик чи уыди, ахӕм сылгоймаг Бразилийӕ).

«Цымӕ зӕхх ӕмӕ адӕммӕ цы ’нхъӕлмӕ кӕсы? Цы хъӕуы, цӕмӕй адӕм ӕнустӕм цӕрой? Зӕххыл ӕцӕг сабырдзинад ӕмӕ фарн искуы уыдзӕн?» (кӕддӕры католик Германӕй).

«Мӕлӕты фӕстӕ адӕймаджы уд ӕндӕр цӕмӕдӕр ахизы, зӕгъгӕ, уыцы хъуыдыйыл мӕ зонд нӕ разы кодта. Цӕрӕгойтӕ Хуыцауӕн нӕ кувынц, ӕмӕ уымӕ гӕсгӕ дӕ тӕригъӕдтӕ бафидынӕн цӕрӕгой куы суай, уӕд дӕ бон куыд бауыдзӕн дӕ рӕдыдтытӕ сраст кӕнын ӕмӕ уӕлдӕр къӕпхӕнмӕ схизын?» (раздӕр индуизмыл хӕст чи уыди, ахӕм нӕлгоймаг Хуссар Африкӕйӕ).

«Ӕз схъомыл дӕн, Конфуцийы диныл хӕст бинонты ’хсӕн, ӕмӕ ныл нӕ мард фыдӕлтӕ цӕмӕй хӕрзмӕ аудой, уый тыххӕй сын цы кӕндтӕ кодтой, уым-иу ӕз дӕр фӕстӕ нӕ фӕлӕууыдтӕн. Мӕрдтӕн хӕларгӕнинӕгтӕ-иу фынгыл куы ӕрӕвӕрдтон, стӕй-иу сын мӕ сӕрӕй ныллӕг куы куывтон, уӕд-иу арӕх хъуыды кодтон, цымӕ мӕрдтӕн цы ныххӕлар кодтам, уыдон ӕцӕгдӕр бахӕрдзысты ӕмӕ сын куыд табу кӕнӕм, уый уынынц» (кӕддӕры конфуционист, Корейӕ).

Ацы адӕймӕгтӕй алчидӕр йӕ фарстытӕн дзуапп ссардта, Иегъовӕйы Ӕвдисӕнтимӕ Библи ахуыр кӕнгӕйӕ.