Jeremias 33:1-26
33 Saya so mensahe nen Jehova a sinmabi ed si Jeremias diad komaduan pankanawnawa, legan a sikatoy nipriso ed Sular na Guardia:+
2 “Oniay inkuan nen Jehova, say amalsa ed dalin, si Jehova ya amorma tan malet ya angiletneg ed satan; Jehova so ngaran to,
3 ‘Ontawag kad siak, tan ebatan ta ka tan tampol ya ibagak ed sika iray makapadinayew tan agnatalosan a bengatla ya agmo amta.’”+
4 “Ta oniay inkuan nen Jehova a Dios na Israel nipaakar ed saray kaabungan ed sayan syudad tan kaabungan na saray arari ed Juda a nigeba lapud saray tambak a dinalan ed impangubkob tan lapud espada,+
5 tan nipaakar ed saramay onsabin milaban ed saray Caldeo, a panoen da irayan pasen na saray bangkay na pinapatey to lapud pasnok tan sanok to, saramay totoo a lapud inkauges da et pinaulyan to iyan syudad:
6 ‘Sikatoy paabigen ko tan pakasilen ko,+ tan tambalen ko ra tan iter kod sikara so daakan a kareenan tan katuaan.+
7 Tan ipawil ko iramay narel a totoo na Juda tan saramay narel a totoo na Israel,+ tan ipaalagey ko ra a singa ginawak ed gapo.+
8 Tan linisan ko ra ed amin a kasalanan dad siak,+ tan perdonaen koy amin a kasalanan tan lingo rad siak.+
9 Tan magmaliw a makapaliket ed siak so ngaran to, sakey a dayew, tan karakpan ed pakanengneng na amin a nasyon ed dalin a makadngel ed amin a kamaongan a ginawak ed sikara.+ Tan ontakot tan onggiwgiw ira+ lapud amin a kamaongan tan kareenan ya inter ko ed sikato.’”+
10 “Oniay inkuan nen Jehova: ‘Diad sayan pasen ya ibaga yon dalin ya agnapanayaman, ya andian na too odino kokomponien ya ayep, diad saray syudad na Juda tan diad saray karsada na Jerusalem ya ataynanan, ya andian na too odino manaayam odino ayayep, narengel lamet ditan
11 so tanol na panliliket tan gayaga,+ say boses na nobyo tan nobya, say boses na saramay mangibabagan: “Misalamat kayo ed si Jehova na saray armada, ta si Jehova et maomaong;+ say matoor a panangaro to et mansiansia ya anggad angga!”’+
“‘Awiten dad abung nen Jehova iray apay parad pisasalamat,+ ta ipawil ko iramay naaripen a totoo ed sayan dalin, a singa diad gapo,’ so inkuan nen Jehova.”
12 “Oniay inkuan nen Jehova na saray armada: ‘Diad sayan dalin ya agnapanayaman, ya andian na too odino kokomponien ya ayep, tan diad amin a syudad ditan et niwala lamet iray pasen a pangipastolan na saray managpastol ed saray pulok da.’+
13 “‘Diad saray syudad ed mapalandey a rehyon, diad saray syudad ed abeban pasen, diad saray syudad ed abalaten, diad dalin na Benjamin, diad kaliberliber na Jerusalem,+ tan diad saray syudad na Juda,+ et manbilang lamet na karnero iray managpastol,’ so inkuan nen Jehova.”
14 “‘Onsabi agew,’ so imbaga nen Jehova, ‘a sumpalen ko so maabig a sipan ya imbagak nipaakar ed sankaabungan na Israel tan sankaabungan na Juda.+
15 Diad saratan ya agew tan diad satan a panaon et patuboen ko so sakey a matunong a simit*+ parad si David, tan ipatnag toy inkahustisya tan inkatunong diad dalin.+
16 Diad satan a panaon et niliktar so Juda+ tan manayam ed kaligenan so Jerusalem.+ Tan saya so panawag ed sikato: Si Jehova So Lapuan na Inkatunong Tayo.’”+
17 “Ta oniay inkuan nen Jehova: ‘Agbalot naandian so pamilya nen David na anak a laki ya onyurong ed trono na Israel,+
18 tan agmet naandian iray saserdoten Levita na sakey a too ya onalagey ed arapan ko pian mangiyapay na interon apay a popoolan, mamool na saray apay a kakanen, tan mangibagat.’”
19 Tan oniay mensahe nen Jehova a sinmabi lamet ed si Jeremias:
20 “Oniay inkuan nen Jehova, ‘No sarag yon deralen so sipanan ko nipaakar ed agew tan say sipanan ko nipaakar ed labi, pian amperen so isabi na agew tan labi ed dugan panaon,+
21 naderal met sirin so sipanan ko ed si David a lingkor ko,+ ta pian sikatoy agnawalaan na sakey ya anak a laki a manuley bilang ari ed trono to,+ tan ontan met ed impisipanan kod saray saserdoten Levita, saray lingkor ko.+
22 Singa saray amin a bengatla ed tawen ya agnayarin bilangen, tan saray buer ed dayat ya agnayarin sukaten, ontan met so pamarakel kod ilalak* nen David a lingkor ko tan saray Levita a manlilingkor ed siak.’”
23 Tan oniay mensahe nen Jehova a sinmabi lamet ed si Jeremias:
24 “Agmo ta naimano so ibabaga na sarayan totoo, ‘Ipulisay nen Jehova so duaran pamilya a pinili to’? Tan agda rerespetoen iray totook, tan agda la ra ipapasen bilang sakey a nasyon.
25 “Oniay inkuan nen Jehova: ‘Singa impangiletneg kod sipanan ko nipaakar ed agew tan labi,+ saray ganggan* ed tawen tan dalin,+
26 agkon balot met ipulisay so ilalak* nen Jacob tan si David a lingkor ko, tan mantultuloy a diad ilalak* to so pangalaan ko na saray manuley ed kapolian* nen Abraham, Isaac, tan Jacob. Ta tiponen ko iray narel ed sikara+ tan kasian ko ra.’”+
Paimanod leksab
^ Odino “tomatawir.”
^ Literal, “bini.”
^ Odino “totontonen.”
^ Literal, “bini.”
^ Literal, “bini.”
^ Literal, “bini.”
