SANO saray duron et manma-migrate, sanuulop ira. Say karakel da et manga “80 milyon kada kilometro kuadrado.” Balet, ag-ira manbabanggaan. Antoy sekreto ra?

Nonot mo pa: Diad dalem na kada mata na duron et walay neuron ya sensitibod galaw, tatawagen iyan lobula giant movement detector (LGMD). No ngalngali la nasapigar na duron so arum, man-signal iray neuron ed saray payak tan sali to pian masiglat ya makapaliis. Diad tua, mas maples na limaran beses ed kirem na mata so reaksion na duron.

Inaral na saray scientist iray mata tan neuron na duron pian makagawa na computerized ya melag a robot ya makalikas tan makalikir ed saray nasabat ton bengatla, anggano anggapo lay komplikadon radar odino infrared detector. Uusaren met iya na saray researcher ed panggawa na luluganan pian maples tan susto so warning system, diad ontan et ag-ira bastabasta nabangga. Oniay imbaga na Professor ed University of Lincoln, United Kingdom ya si Shigang Yue: “Dakel so naaralan ed simsimplin insekto a singa say duron.”

Antoy nibagam? Kasin nanlapud ebolusyon so neuron na duron ya sensitibod galaw? Odino walay nandesinyo?