A traves di historia, hende di diferente background a yega na e conclusion cu Bijbel ta papia berdad. Actualmente tin miyones di hende ta aplica su consehonan den nan bida. Pero tin hopi hende ta consider’e un buki ouderwets cu yen di cuenta. Kico abo ta pensa? Bo por haya e berdad den Bijbel?

Con bo por haya sa cu Bijbel ta confiabel? Wel, imagina cu durante hopi aña un amigo semper a papia berdad. Sigur lo bo consider’e un hende confiabel, no ta berdad? Kico di Bijbel? E ta manera un amigo confiabel cu semper ta papia berdad? Laga nos wak algun ehempel.

Escritornan Honesto

Escritornan di Bijbel tabata asina honesto cu hopi biaha nan a papia di nan propio foutnan y defectonan. Por ehempel, profeta Jonas a conta con el a desobedece Dios. (Jonas 1:1-3) Na fin di e buki cu ta carga su nomber, Jonas a conta con Dios a corigie, pero e no a hala atencion na su mes door di bisa con el a cambia su actitud. (Jonas 4:1, 4, 10, 11) E sinceridad di e escritornan di Bijbel ta mustra cu nan tabata profundamente interesa den e berdad.

Conseho Practico

Semper Bijbel ta duna conseho practico pa nos bida di tur dia? Sigur cu si. Wak por ehempel ki conseho Bijbel ta duna nos pa nos por tin un bon relacion cu otro hende. “Tur loke boso kier pa hende haci cu boso, boso tambe mester haci cu nan.” (Mateo 7:12) “Un contesta suave ta kita rabia, ma un palabra skerpi ta lanta rabia.” (Proverbionan 15:1) En berdad, e consehonan di Bijbel ta mes practico awe cu tempo nan a ser skirbi.

 Su Historia Ta Confiabel

A traves di añanan, hopi descubrimento arkeologico a comproba existencia di varios hende, luga y suceso menciona den Bijbel. Laga nos wak, por ehempel, un detaye interesante. Bijbel ta bisa cu den tempo di Nehemias, hende di Tiro (esta, e Fenicionan di e stad lehano Tiro) cu tabata biba na Jerusalem “tabata trece pisca y tur sorto di mercancia.”—Nehemias 13:16.

Tin prueba pa confirma esey? Si, arkeologonan a descubri obhetonan di Fenicia na Israel, locual ta indica cu den pasado e dos nacionnan aki tabata haci negoshi cu otro. Ademas, na Jerusalem, arkeologonan a descubri e restonan di pisca di Mediteraneo. Arkeologonan ta kere cu comerciante di otro parti a trece e piscanan. Despues di analisa tur prueba, un experto a saca e siguiente conclusion: “Tur cos ta parce di indica cu loke Nehemias 13:16 ta bisa ta berdad, esta cu hende di Tiro a bende pisca na Jerusalem.”

Cientificamente Confiabel

Aunke Bijbel ta principalmente un buki religioso y historico, e ta exacto ora e ta papia di asuntonan cientifico. Laga nos wak un ehempel.

Un 3.500 aña pasa, Bijbel a bisa cu Tera ta colga “riba nada.” (Job 26:7) Esaki ta full diferente for di e dos mitonan di e tempo ey cu tabata bisa cu Tera ta flota riba awa of cu un turtuga grandi ta carg’e. Un 1.100 aña despues cu e buki di Job a ser skirbi, hende a sigui kere cu Tera no por ta djis colga den espacio y cu algo mester want’e. Ta solamente tresshen aña pasa, na 1687, Isaac Newton a publica su obra tocante gravedad y a splica cu un forsa invisibel ta mantene Tera na su luga den espacio. E descubrimento cientifico aki ta confirma cu loke Bijbel a bisa mas cu 3.000 aña pasa ta berdad.

 Su Profecianan Ta Confiabel

Con confiabel e profecianan di Bijbel ta? Laga nos wak un ehempel: e profecia di Isaias tocante e caida di Babilonia.

E Profecia: Den siglo 8 prome cu Cristo, e escritor di Bijbel, Isaias a profetisa cu Babilonia—cu despues lo a bira e capital di un imperio poderoso—lo a ser conkista y cu tempo ningun hende lo no a biba eynan mas. (Isaias 13:17-20) Isaias hasta a menciona nomber di e homber cu lo a conkista Babilonia: Ciro. Ademas, Isaias a describi Ciro su strategia, esta cu lo e laga e riunan “seca.” Y el a predeci tambe cu lo a laga e portanan di e stad habri.—Isaias 44:27–45:1.

Su Cumplimento: Un 200 aña despues cu Isaias a skirbi e profecia ey, un rey di Persia a ataca Babilonia. Con yam’e? Su nomber tabata Ciro. Dicon tabata asina dificil pa Ciro y su ehercito drenta Babilonia? Wel, e stad tabata bon proteha pa su murayanan y Riu Eufrates tabata pasa rond di dje. Pesey Ciro y su ehercito a coba un canal na e parti mas ariba di e riu pa e awa desvia bay den un moeras. Ora e nivel di awa a baha te na nan bil di pia, nan a pasa door di dje. Anto pa straño cu por parce, e Babilonionan a laga e portanan di e stad habri! Asina Ciro y su ehercito a logra drenta Babilonia y a conkist’e.

Pero ainda ta falta un detaye cu mester a cumpli: E stad a keda sin ningun habitante? Pa algun siglo, hende a sigui biba eynan. Pero actualmente, e ruinanan di Babilonia, cu ta keda cerca di Bagdad, ta confirma cu e profecia ey a cumpli te den e ultimo detaye. Si, Bijbel ta confiabel ora e ta papia tocante loke lo bay sosode den futuro.