Con Nos Por Ta un Creyente Sincero y Alabes un Ciudadano Responsabel?

KICO tabata dos cos cu a caracterisa e sirbishi di Hesus? Di prome, Hesus a trata di cambia curason individual, no institucion politico. Por ehempel, tuma nota di loke el a enfatisa den su Sermon Riba Sero. Un poco prome cu el a papia tocante e necesidad di ta manera salo y luz, el a bisa su oyentenan cu ta hende cu ta “consciente di nan necesidad spiritual” ta realmente feliz. Y el a agrega: “Feliz ta esnan cu tin un genio suave, . . . esnan di curason puro, . . . esnan pacifico.” (Mateo 5:1-11) Hesus a yuda su siguidonan mira e importancia di sirbi Dios di henter nan alma y di ahusta nan manera di pensa y nan sintimentonan pa esakinan cuadra cu Dios su norma di loke ta bon y malo.

Di dos, ora Hesus a mira hende sufri, su compasion pa prohimo a motiv’e pa alivia nan sufrimento. Sinembargo, e no a pone como meta cu e ta bay elimina tur sufrimento. (Mateo 20:30-34) El a cura hende malo, pero maleza a keda un parti di bida. (Lucas 6:17-19) El a trece alivio pa hende oprimi, ma inhusticia a sigui causa sufrimento. El a provee cuminda pa hende hambra, pero hamber a sigui tormenta humanidad.​—Marco 6:41-44.

Hesus A Cambia Curason di Hende y Alivia Sufrimento

Dicon Hesus a concentra riba cambia curason di hende y alivia sufrimento pero no riba cambia institucionnan of riba elimina angustia? Hesus tabata sa cu Dios su proposito ta pa uza Su Reino den futuro pa caba cu tur gobierno humano y elimina tur loke ta causa sufrimento. (Lucas 4:43; 8:1) Pesey, un biaha cu e discipelnan a urgi Hesus pa dedica mas tempo na cura hende malo, el a bisa nan: “Laga nos bay otro caminda, na e pueblonan den bisindario, pa mi por predica eynan tambe, pasobra ta pa e motibo aki mi a bin.” (Marco 1:32-38) Hesus a alivia e sufrimento fisico di hopi hende, ma el a duna prioridad na e trabou di predica y di siña hende e palabra di Dios.

Testigonan di Jehova ta haci esfuerso pa imita Hesus den nan trabou di predica awe. Nan ta sinti nan motiva pa duna yudansa practico na hende den necesidad y asina alivia nan sufrimento. Pero e Testigonan no ta trata di elimina e inhusticianan di mundo. Nan tin fe cu e Reino di Dios lo caba cu tur loke ta causa sufrimento. (Mateo 6:10) Mescos cu Hesus, nan ta haci esfuerso pa cambia curason, no institucionnan politico. E forma di actua ey ta realistico, ya cu e problemanan principal di hende no ta politico, sino moral.

Ciudadano Responsabel

Testigonan di Jehova alabes ta kere cu nan tin e responsabilidad cristian di ta bon ciudadano. Pesey, nan ta honra y respeta autoridad di gobierno. Pa medio di nan publicacionnan y nan trabou di predica, nan ta anima nan prohimo pa cumpli cu ley. Pero ora un gobierno ta exigi algo cu ta na conflicto directo cu e mandamentonan di Dios, e Testigonan no ta cumpli cu esey. Nan ta “obedece Dios na prome luga, y no hende.”​—Echonan 5:29; Romanonan 13:1-7.

Testigonan di Jehova ta bishita tur hende den nan comunidad pa ofrece nan educacion di Bijbel gratis. E educacion aki a cambia miyones di curason caba. Tur aña, cientos di miles di hende ta haya yudansa pa vence practicanan dañino manera humamento, buracheria, uzo di droga, wega di placa y promiscuidad (ora un hende tin mas cu un partner sexual). Nan ta bira ciudadano responsabel cu moralidad halto, pasobra nan a siña aplica e principionan di Bijbel den nan bida.​—Wak e articulo “Bijbel A Cambia Nan Bida”, na pagina 18 di La Atalaya di 15 di juni 2012.

Ademas, e educacion di Bijbel ta yuda miembronan di famia haya mas respet pa otro y drecha nan comunicacion, tanto entre esposa cu esposo como entre mayor cu yiu y tambe entre e yiunan mes. E comunicacion aki ta fortalece e lasonan di famia. Anto famia mas fuerte ta resulta den comunidad mas fuerte.

Kico bo ta pensa despues di a repasa e puntonan cu a bin padilanti den e articulonan aki? Hende cu ta mescla religion cu politica tin e aprobacion di Bijbel? E contesta ta bisto: No, nan no tin su aprobacion. Acaso cristiannan berdadero mester ta ciudadano responsabel? Si! Con nan por logra esey? Nan mester haci loke Hesus a manda y ser manera salo y manera luz di mundo.

Hende cu ta haci esfuerso pa aplica e instruccionnan practico aki di Cristo lo beneficia nan mes, nan famia y tambe e comunidad den cua nan ta biba. Testigonan di Jehova den bo area gustosamente lo comparti mas informacion cu bo tocante e programa di educacion di Bijbel cu actualmente nan ta efectua den bo comunidad. *

[Nota]

[Comentario na pagina 7]

Hesus a trata di cambia curason, no institucionnan politico

 [Comentario na pagina 8]

Testigonan di Jehova ta kere cu nan tin e responsabilidad di ta bon ciudadano