Cristiannan Djawe Mester Ta den Politica?

CRISTIANNAN berdadero djawe no ta participa den politica. Dicon no? Pasobra nan ta imita Hesus. El a bisa tocante su mes: “Ami no ta parti di mundo.” Y el a bisa tocante su siguidonan: “Boso no ta parti di mundo.” (Juan 15:19; 17:14) Laga nos wak algun motibo pakico cristiannan no mester mete den politica.

1. Hende su capacidad ta limita. Bijbel ta declara cu hende no tin e capacidad ni e derecho di goberna su mes. Profeta Jeremias a skirbi: “No ta keda na hende pa dirigi su pasonan.”​—Jeremias 10:23.

Mescos cu Dios no a crea hende pa move su brasanan y bula manera parha, e no a cre’e pa goberna su mes cu exito tampoco. Papiando tocante e limitacionnan di gobierno, e historiado David Fromkin a bisa: “Gobiernonan ta consisti di ser humano; pesey nan ta inclina na fracasa y nan futuro ta insigur. Nan ta eherce cierto poder, pero esey ta limita.” (The Question of Government) Pues, ta di compronde pakico Bijbel ta spierta nos pa no pone nos confianza den hende!​—Salmo 146:3.

2. Actualmente forsanan spiritual di maldad ta eherce influencia. Ora Satanas a ofrece Hesus poder pa goberna mundo, Hesus no a nenga cu Diabel tabatin e autoridad pa ofrec’e tur e reinonan di mundo. De echo, na un otro ocasion, Hesus a yama Satanas “e gobernante di mundo.” Algun aña despues, apostel Pablo a describi Satanas como “e dios di e mundo aki.” (Juan 14:30; 2 Corintionan 4:4) Pablo a skirbi su rumannan cristian: “Nos lucha [ta] contra gobernante di mundo di e scuridad aki, contra forsanan spiritual di maldad den luganan selestial.” (Efesionan 6:12) Tras di escenario, forsanan spiritual di maldad ta e berdadero gobernantenan di e mundo aki. Ki efecto esey mester tin riba nos punto di bista di politica?

Pensa riba e comparacion aki: Mescos cu coriente fuerte di lama ta hala boto chikito bay cu ne, asina forsanan spiritual poderoso di maldad ta hala e sistemanan politico humano bay cu ne den un cierto direccion. Y mescos cu nabegante den e boto chikitonan ey no por haci nada pa cambia e coriente fuerte, asina politiconan tampoco no por haci nada pa cambia e influencia di e forsanan spiritual poderoso ey. E forsanan aki ta dicidido pa corumpi hende completamente y causa “ay” pa e tera. (Revelacion 12:12) Pues, ta un persona mas poderoso cu Satanas y su demoñonan so por trece berdadero cambio. Anto e Persona ey ta Jehova Dios mes. *​—Salmo 83:18, NW; Jeremias 10:7, 10.

3. Cristiannan berdadero ta leal na un solo gobierno: e Reino di Dios. Hesus y su discipelnan tabata sa cu na e debido tempo Dios mes lo a establece un gobierno den cielo cu lo a goberna henter e tera. Bijbel ta yama e gobierno aki e Reino di Dios y ta revela cu Hesucristo a keda nombra como su Rey. (Revelacion 11:15) Como cu e Reino ta toca bida di tur hende, Hesus a haci “e bon noticia di e Reino di Dios” e tema principal di su siñansa. (Lucas 4:43) Tambe el a siña su discipelnan pidi den oracion: “Laga bo Reino bin.” Dicon? Pasobra bou di e Reino ey, Dios su boluntad lo sosode sigur, tanto den cielo como riba tera.​—Mateo 6:9, 10.

Kico lo bay pasa anto cu e gobiernonan forma pa hende? Segun Bijbel, e gobiernonan “di henter e tera habita” lo ser destrui. (Revelacion 16:14; 19:19-21) Si un persona di berdad ta kere cu e Reino di Dios ta cerca di elimina tur sistema politico forma pa hende, logicamente lo e no apoya e sistemanan politico ey. De echo, si e ta purba di sostene e gobiernonan forma pa hende y destina pa destruccion, lo e ta tumando un posicion contra Dios.

[Nota]

 [Comentario na pagina 6]

Testigonan di Jehova activamente ta promove e Reino di Dios, no reformanan politico