“Nos tur kier nos bida normal bek.”—Angela Merkel, canciyer Aleman.

 Segun cu e pandemia di COVID-19 ta sigui afecta hende rond mundo, kisas bo tambe ta di acuerdo cu loke el a bisa. Pero kico ta “normal”? Kico hende kier logra?

•   Biba manera nan tabata biba prome cu e pandemia. Tin hende lo tin gana di pasa mas tempo cu otro hende. Nan kier un bida caminda nan por brasa otro, duna man y biaha. Manera dr. Anthony Fauci a a bisa, nan ta sinti cu “bay bek na un grado di normalidad di bida”, ta encera bay “restaurant, teater [y] e tipo di cosnan ey.”

•   Mehora nan bida. Tin hende ta mira esaki como un oportunidad pa cambia nan bida y hacie mihor cu e tabata prome cu e pandemia. Nan ta sinti cu tin cos cu mester cambia, manera trabounan demasiado exigente, inhusticia social y e aumento di enfermedad mental. Klaus Schwab, fundador di World Economic Forum, a bisa: “E pandemia ta duna nos un oportunidad unico, pero masha chikito, pa pensa con nos kier pa e mundo bira, anto haci e cambionan necesario.”

 Algun hende a haya nan cu asina tanto problema pa motibo di e pandemia, cu nan ta sinti cu bida nunca lo no bira bek manera e tabata prome. Por ehempel, algun di nan a perde nan trabou, perde nan cas, haya nan cu problema di salud of hasta perde sernan keri den morto.

 Claro cu ningun hende no por bisa exactamente con bida lo ta despues di e pandemia. (Eclesiastes 9:11) Sinembargo, Bijbel por yuda nos ta realistico tocante futuro y yuda nos trata cu cualkier cos cu sosode. Ademas, Bijbel ta papia di un futuro cu nos por tin sigur di dje, un futuro cu kisas nunca bo no a imagina.

 Hopi tempo pasa, Bijbel a bisa cu lo tin maleza of “pest” na un luga tras di otro durante e “conclusion di e era aki.” (Lucas 21:11; Mateo 24:3) Si nos mira e pandemia di COVID-19 for di e punto di bista ey, nos lo realisa cu e pandemia ta un di e hopi cosnan remarcabel cu Bijbel a bisa cu lo a tuma luga, manera guera, temblor grandi y hamber.

 Con esaki ta yuda nos: Aunke cu e situacion actual di e pandemia por mehora, Bijbel ta spierta nos cu nos ta bibando den “temponan critico, dificil pa trata cu ne.” (2 Timoteo 3:1) Ya cu nos sa esaki, nos por ta realistico tocante kico pa verwacht den e tempo dificil aki.

 Bijbel ta duna nos e punto di bista corecto: Nos mundo cu ta yen di dificultad y problema pronto lo bay cambia. Ki cambio lo tuma luga?

 Bijbel no a papia solamente di e problemanan serio cu nos ta enfrentando awor, sino tambe di e mihor tempo cu lo bin pronto. Bijbel ta describi un futuro cu ta mucho mas mihor cu loke gobierno humano lo por logra, un futuro cu ta Dios so por haci bira realidad. “Lo e seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas.”—Revelacion 21:4.

 Jehova b Dios ta priminti: “Tende! Mi ta traha tur cos nobo.” (Revelacion 21:5) Lo e soluciona e problemanan di e mundo aki, incluso e problemanan cu a bira pio pa motibo di e pandemia. Lo e percura pa lo siguiente:

•   Salud fisico y mental perfecto. Lo no tin maleza ni morto mas.—Isaias 25:8; 33:24.

•   Trabou agradabel cu ta duna berdadero satisfaccion. No trabou exigente cu ta laga hende tur frustra y agota.—Isaias 65:22, 23.

•   Un bida prospero pa tur hende, den cual lo no tin pobreza ni hamber mas.—Salmo 72:12, 13; 145:16.

•   Un fin na trauma emocional, y e speransa di mira sernan keri cu a muri atrobe.—Isaias 65:17; Echonan 24:15.

 Con esaki ta yuda nos: Bijbel ta bisa: “Nos tin e speransa aki manera un anker pa nos alma [of: bida].” (Hebreonan 6:19) E speransa cu cos lo bira mihor por yuda nos haya stabilidad den bida awor. E ta yuda nos trata cu e situacionnan dificil awe, ta yuda nos ta menos ansha y pa nos keda calmo y feliz.

 Pero bo por kere cu e promesanan den Bijbel realmente lo cumpli? Wak e articulo “Bijbel Ta un Fuente Confiabel di e Berdad.”

•   Balora bida

   Texto: “Sabiduria ta preserva bida di esnan cu ta pose’e.”—Eclesiastes 7:12.

   Con por aplica e principio aki: Tuma bon decision pa bo tin menos chens di bira malo. Evalua e situacion caminda bo ta biba. Keda na altura di e reglanan cu gobierno ta pone, e cantidad di hende cu ta contagia y e porcentahe di e poblacion cu ta completamente vacuna.

•   Sea cauteloso

   Texto: “Un hende sabi ta cauteloso, y ta aparta su mes for di maldad, ma e bobo ta arogante y sin cuidou.”—Proverbionan 14:16.

   Con por aplica e principio aki: Sigui haci loke ta necesario pa cuida bo salud. Expertonan ta pensa cu e corona virus lo sigui existi pa hopi tempo.

•   Uza informacion confiabel

   Texto: “E hende simpel ta kere tur cos, ma e homber prudente ta wak bon unda e ta bay.”—Proverbionan 14:15.

   Con por aplica e principio aki: Wak bon ki conseho lo bo sigui. Bo decision ta importante. Bo por afecta bo salud si bo tuma decision basa riba informacion robes.

•   Keda positivo

   Texto: “No bisa: ‘Pakico e dianan di antes tabata mihor cu esakinan?’ Pasobra no ta for di sabiduria bo ta puntra esaki.”—Eclesiastes 7:10.

   Con por aplica e principio aki: Sea determina pa biba e mihor bida posibel den bo situacion actual. Evita di pensa cu nostalgia riba bo bida prome cu e pandemia y no sigui pensa riba e cosnan cu bo no por a haci pa motibo di e restriccionnan.

•   Respeta otro hende

   Texto: “Honra tur sorto di hende.”—1 Pedro 2:17.

   Con por aplica e principio aki: No ta tur hende ta reacciona mescos riba e pandemia y su consecuencianan. Respeta nan opinion, pero na mes momento, no cambia e bon decisionnan cu abo a tuma. Tene consideracion cu hende cu no ta vacuna, hende di edad of hende cu tin problema serio di salud.

•   Tene pasenshi

   Texto: “Amor tin pasenshi y ta bondadoso.”—1 Corintionan 13:4.

   Con por aplica e principio aki: Ora otro hende ta expresa miedo pa haci algo cu tabata normal prome cu e pandemia, sea bondadoso cu nan. Si abo ta sinti cu ta dificil pa bo cuminsa haci algun cos bek ora cu e situacion mehora, tene pasenshi cu bo mes.

 Testigonan di Jehova sa di e bunita promesanan cu Bijbel tin pa futuro, y esey ta duna nan consuelo y ta yuda nan pa wak mas aleu cu e pandemia. Ademas, testigonan di Jehova ta anima otro ora nan ta sigui Bijbel su mandamento pa reuni regularmente pa adora Dios. (Hebreonan 10:24, 25) Tur hende ta bon bini pa asisti na e reunionnan di testigonan di Jehova cu ta tumando luga virtualmente durante e pandemia.

 Algun hende tambe ta haya cu e reunionnan di testigonan di Jehova a yuda nan masha hopi mes durante e tempo dificil aki. Por ehempel, un señora cu a haya COVID-19 a acepta un invitacion pa join e reunionnan virtual di testigonan di Jehova. E reunionnan aki a yud’e emocionalmente, aunke cu e virus a pon’e pasa malo. Mas despues el a bisa: “Mi ta sinti cu mi tambe ta parti di e famia aki. Ora mi lesa Bijbel, mi ta haya paz mental y mi ta sinti mi trankil. Bijbel ta yuda mi enfoca riba mi speransa pa futuro en bes di riba mi problemanan. Danki pa yuda mi hala cerca Dios, pasobra esey ta loke mi kier a haci henter mi bida.”