Un dia ku Hesus tabata den Herúsalèm, el a papia di su Tata, Yehova, i a saka na kla e hipokresia di e lidernan religioso di e tempu ei. (Huan 8:12-30) Loke el a bisa einan ta siña nos kon nos mester analisá loke hende ta kere tokante Dios. El a bisa: “Si boso keda fiel na mi palabranan, boso realmente ta mi disipelnan, i boso lo konosé e bèrdat, i e bèrdat lo hasi boso liber.”—Huan 8:31, 32.

Ora Hesus a bisa “si boso keda fiel na mi palabranan,” el a duna nos e klave pa determiná si un siñansa religioso ta “bèrdat” òf nò. Pues, ora un hende bisa bo algu di Dios, puntra bo mes: ‘E ta kuadra ku loke Hesus a bisa i ku otro partinan di e Santu Skritura?’ Imitá esnan ku a tende apòstel Pablo papia i ku ‘tabata analisá e Skritura tur dia pa wak si e kosnan ku nan tabata siña tabata bèrdat.’—Echonan 17:11.

Esei ta loke Marco, Rosa i Raymonde, menshoná den e promé artíkulo di e seri akí, a hasi. Nan a analisá nan kreensianan a base di nan estudio di Beibel ku Testigunan di Yehova. Kon loke nan a siña a benefisiá nan?

Marco: “E Testigu ku a siña nos tokante Beibel a usa e Skritura pa kontestá tur e preguntanan ku ami ku mi esposa tabatin. Nos amor pa Yehova a kuminsá krese i nos relashon ku otro komo esposo i esposa a bira mas fuerte!”

Rosa: “Na prinsipio, mi a kere ku Beibel ta djis un buki di filosofia ku ta purba di splika pa medio di konseptonan humano ken Dios ta. Ma ku tempu mi a bin haña kontesta pa mi preguntanan den Beibel. Awor, Yehova ta un persona real pa mi, unu ku mi por konfia.”

Raymonde: “Mi a resa pidi Dios pa e yuda mi siña konos’é. Djis despues ami ku mi esposo a kuminsá studia Beibel. Por fin nos a bin siña e bèrdat tokante Yehova! Nos a bira masha kontentu ora nos a haña sa ki klase di Dios e ta.”

Beibel ta bai hopi mas aleu ku simplemente saka e mentiranan tokante Dios na kla; tambe e ta papia di su bunita kualidatnan. E ta su Palabra inspirá i ta yuda ‘nos komprondé e kosnan ku Dios bondadosamente a duna nos,’ esta, un mihó komprondementu di e bèrdat i e propósito di Dios. (1 Korintionan 2:12) Pakiko bo no ta wak pa bo mes kon Beibel ta kontestá e preguntanan ku hende sa hasi enkuanto Dios, e propósito di bida i nos futuro? Bo por lesa algun di e kontestanan akí riba www.ps8318.com bou di “Bible Teachings > Bible Questions Answered”. Tambe bo por pidi un estudio di Beibel riba e website òf serka un Testigu di Yehova. Nos ta sigur ku si bo hasi esei, lo bo ripará ku ta mas fásil di loke bo ta kere pa stima Dios.