E kahanan di plaka tabata den e Plenchi di Hende Muhé. E buki The Temple​—Its Ministry and Services ta splika: “Rònt di e plenchi tabatin un pasio tur na pilá, parti paden, kontra e muraya tabatin diestres kaha òf ‘tròmpèt’ [kaminda] tabata tira kontribushon.”

Nan tabata yama e kahanan tròmpèt debí ku nan tabata smal ariba anto hanchu abou. A marka kada kaha di akuerdo ku e tipo di ofrenda. P’esei, e sèn kolektá for di kada kaha tabatin su uso spesífiko. Hesus tabata den e Plenchi di Hende Muhé ora el a mira kon hende, inkluso un biuda den nesesidat, tabata tira kontribushon.—Lukas 21:1, 2.

Kaha 1 i 2 tabata pa e belasting di tèmpel di e aña koriente i esun anterior. Kaha 3 te ku 7 respektivamente tabata pa kubri kosto di tòrteldùif, pichon, palu, sensia i e skalchinan di oro. Si un hende a sobra sèn despues di kontribuí pa su sakrifisio, e por a tira e sèn sobrá den un di e kahanan ku a resta. Kaha 8 tabata reservá pa sèn sobrá di ofrenda pa piká. Den kaha 9 te ku 12 por a tira sèn ku a sobra di ofrenda pa kulpa, ofrenda di para, di nazareonan i di hende leproso ku a kura. Anto kaha 13 tabata pa kontribushon boluntario.

Lukas a skirbi dos buki di Beibel: e Evangelio di Lukas i Echonan di e Apòstelnan. El a bisa ku el a “investigá tur kos for di prinsipio ku eksaktitut,” pero algun eksperto di Beibel ta kuestioná su relatonan. (Lukas 1:3) Ken nos tin ku kere awor?

E datonan históriko ku Lukas a skirbi di dje ta kosnan ku por ser komprobá. Por ehèmpel, ora el a referí na e ofisialnan públiko romano, el a usa vários título ku tabata eksistí den e idioma original. Awendia a tradusí e títulonan ei komo funshonario sivil di Filipo, gobernante di Tesalónika i organisadó di fiesta di Efeso. (Echonan 16:20; 17:6; 19:31) Tambe Lukas a menshoná ku Heródes Antipas tabata gobernante di distrito i ku Sergio Paulo tabata prokònsùl di Chipre.—Echonan 13:1, 7.

Lukas su uso korekto di título ta remarkabel pasobra ora e státus polítiko di un teritorio romano a kambia, e título di su gobernantenan tambe tabata kambia. Bruce Metzger, un eksperto bíbliko, a bisa: “Kada bes di nobo e referensianan den e buki di Echonan ta kuadra ku e lugá i tempu ku e relato ta papia di dje.” E arkeólogo William Ramsay a yama Lukas “un historiadó di primera klase.”