TÓPIKO PRINSIPAL | BO POR KOMPRONDÉ BEIBEL
Dikon Bo Mester Komprondé Beibel?
“Beibel ta un buki religioso bon konosí. Pero, pa nos komo chines, e ta un buki deskonosí i no ta konta pa nos.”—LIN, CHINA.
“Ni e bukinan santu di mi religion hindú mi n’ ta komprondé, ban kòrda Beibel Santu.”—AMIT, INDIA.
“Komo ku Beibel ta un buki bieu, mi tin rèspèt p’e. M’a tende ku e ta un buki hopi bendí. Pero, nunka mi mes no a yega di mira un Beibel.”—YUMIKO, HAPON.
Hopi hende rònt mundu tin masha rèspèt pa Beibel. Sinembargo, nan sa masha tiki di dje; esta, si nan sa algu mes. Esei ta e kaso ku miónes di hende ku ta biba na Asia, pero tambe pa esnan ku ta biba den pais kaminda Beibel ta disponibel tur kaminda.
Pero, kisas bo ta puntra bo mes: ‘Dikon mi mester ta interesá pa komprondé Beibel?’ Wèl, ora bo haña sa kiko tin den e buki santu akí, bo por:
-
Haña satisfakshon i felisidat den bida
-
Trata ku problema di famia
-
Vense ansiedat
-
Tin un mihó relashon ku otro hende
-
Manehá plaka na un manera sabí
Tuma por ehèmpel Yoshiko di Hapon. E tabata puntra su mes ta kiko tur tin den Beibel. Anto el a disidí di les’é i wak pa su mes. Ku ki resultado? El a bisa: “Beibel a yuda mi haña un propósito den bida i speransa pa futuro. Ya mi n’ ta sinti un bashí di paden.” Amit, kende nos a sita ariba, tambe a disidí di analisá Beibel pa su mes. El a bisa: “M’a keda masha impreshoná. Beibel tin informashon práktiko pa tur hende.”
Beibel a kambia bida di miónes di hende. Pues, pakiko no analisá Beibel pa bo mes i wak kon e por yuda bo?
