Marta, un Testigu di Yehova na Guatemala ta siña e idioma kekchi pa e por kompartí e mensahe di Beibel ku hende ku ta papia e idioma ei. Un dia el a mira un hòmber sali for di un hospital. Na e hòmber su aparensia, Marta a pensa ku lo e ta for di un di e pueblitonan ku ta papia kekchi den e serunan kaminda Testigunan di Yehova no sa prediká mashá. El a aserká e hòmber i a papia kuné den esun tiki kekchi ku e tabata sa.

 Marta a ofresé e hòmber un estudio di Beibel. E hòmber tabata ke un estudio Beibel, pero el a bisa Marta ku lo e no por paga pa e estudio. E ora ei, Marta a splik’é ku Testigunan di Yehova no ta kobra pa studia Beibel ku hende. Tambe el a splika e hòmber ku e por hasi esaki via di telefòn i ku henter su famia por partisipá den e estudio. E hòmber a bai di akuerdo ku esei. Debí ku e hòmber por a papia i lesa spañó, Marta a dun’é un Tradukshon di Mundu Nobo di e Skritura Santu na spañó. Marta a dun’é e buki Kiko Beibel Ta Siña Realmente na kekchi tambe. E siguiente siman, tantu e hòmber komo su esposa i su dos yunan a kuminsá studia Beibel ku Marta via telefòn. Nan tabata studia dos biaha pa siman. Marta a bisa ku pasobra e no tabata por a papia kekchi bon, nan a hasi e estudio na spañó i e hòmber tabata tradusí pa su esposa. E dos yunan sí tabata komprondé spañó.

 E hòmber tabata un pastor di su iglesia i el a kuminsá siña su miembronan di iglesia tur loke e tabata siña durante su estudio di Beibel. E miembronan a gusta loke nan tabata tende i a puntr’é ta na unda e tabata siña tur e kosnan ei. Ora nan a haña sa ku ta for di su estudio di Beibel el a siña e kosnan ei, un pa un nan a kuminsá asistí na e estudio. Ku tempu, 15 persona tabata partisipá na e estudio di Beibel ei via di telefòn ku Marta. Ku tempu nan a pone un mikrofon banda di e telefòn pa tur hende por a tende.

 Ora Marta a konta e ansianonan di su kongregashon tokante e estudio di Beibel ei, un di nan a bishitá e pueblo kaminda e studiantenan ei ta biba. Asina, e ansiano a invitá nan pa bin skucha un diskurso ku e superintendente di sirkuito a lo a duna den un pueblito ku ta keda mas òf ménos un ora ku outo for di einan òf dos ora na pia. E studiantenan a aseptá e invitashon ei i 17 di nan a bishitá e reunion.

 Algun siman despues, e superintendente di sirkuito i algun testigu di Yehova a pasa kuater dia serka e studiantenan. Durante mainta, nan tabata wak algun vidio basá riba Beibel na kekchi riba jw.org i studia e foyeto Ken Awe Ta Hasi e Boluntat di Yehova? Anto atardi, nan tabata wak e programanan di JW Broadcasting. E superintendente di sirkuito a hasi areglo pa kada un di e studiantenan ei haña un ruman pa studia Beibel ku nan personalmente.

 Durante e kuater dianan ei, e Testigunan a prediká den e pueblitonan den serkania ku ta papia kekchi, i nan a invitá e hendenan na un reunion spesial. Durante e reunion, e rumannan a animá e 47 bishitantenan pa nan tin nan propio estudio di Beibel. Diesun famia a aseptá e invitashon ei.

 Algun luna despues, e ansianonan a hasi areglo pa tene reunion den e pueblito tur wikènt. Awe, tin 40 hende ta asistí regularmente na e reunion. Anto 91 hende a asistí na Memorial.

 Ora Marta a kòrda bèk kon e bunita eksperensia akí a kuminsá i kon el a desaroyá, el a bisa: “Mi ta gradisí Yehova. Tin biaha, mi ta pensa ku mi no por hasi hopi kos. Pero nos ta simpel instrumènt den Yehova su man. Yehova tabata sa kiko ta biba den kurason di e personanan ei i el a hala nan serka su pueblo. Yehova stima nan.”