OMESODEL A SUOBEL ER A MEDAL TIA EL BABIER | NGUA NGERA ULDESUEL A DIOS EL KIREL A MEKEMAD?

A Uldesuel a Dios el Kirel a Mekemad er Chelechang

Chelecha el taem e a rechad a kmal chuarm. Me a rebetok a lmangel el olengit a ongelaod er a Dios e oureng me lemonger a nglunguchir. Me a Dios, ngremenges a lengelir? E kuk mekerang el kirir tirke el mo oumekemad e le rebebil a omekcharm er tir? A Dios, ngolengeseu er tir e le ngomes er a mekemad el loruul er ngii el ua lemelemalt?

A kot, e bo lulterekokl a rengum el kmo: A Dios a omes a ringel er a beluulechad er chelechang, e kltmokl el mo torebengii. (Psalm 72:13, 14) Me ngar er a Tekingel el Biblia e ngtibir el kmo tirke el “ngar a ringel” a ‘mo ngma ulengellir.’ Er oingerang? “Sel be ledum el ngar a eanged el mei a Rubak el Jesus ma re mesisiich el anghel er ngii, . . . el mo omals er tirkel chetirir el mengull er a Dios ma re dimlak bo loltirakl a Ungil Chais el chisel a Rubak er kid el Jesus.” (2 Thesalonika 1:7, 8) Tia el tekoi a mo meketmokl el okiu a “mekemad el mor ngii er sel klou el Sils er a Dios el Olab a Bek el Klisiich,” el dirrek el okedongall el Armakedon.​—Ocholt 16:14, 16.

Me ngar seikid el mekemad e a Dios a mo ousbech er a Ngelekel el Jesus Kristus me a remesisiich el anghel er ngii el mo oumekemad er a remekngit, el diak lousbech er a rechad. Tia el mekemad a mo okngemed a rokui el ringel.​—Isaia 11:4; Ocholt 19:11-16.

Me ngme lmuut er chelechang e ngdirkak lemengodech a uldesuel a Dios el kirel a mekemad. Ngdirk omes er a mekemad el ua melemalt el rolel e ngolekngemed a chelebirukel me a ringel. Me nguaisei, engdi ngdi ta el Dios a ngar er ngii a llemeltel el melilt el kmo ngoingerang e ngmo er ngii a mekemad e melilt er a remo oumekemad. Me ngbleketakl el kmo, a Dios a mla oterekeklii a taem el bo loumekemad el olekngemed a chelebirukel, e a Ngelekel el Jesus a ngike el mo oumekemad el melaitechei el kirir tirke el chormang. Me tia belkul a kmo, a Dios a kmal diak  lekengei aike el mekemad el ngar er ngii er a beluulechad er chelechang, alta e ngar er ngii a ungil el uchul me te kaumekemad.

Me domekesiu er ngii el ua tiang: A reteru el ngalek el sechal a omuchel el kakoad er a taem el demerir a dibus. Te mo diak el kakoad e mocha omekedong er a demerir. Me a tang a kmo ‘ngike el tang a ulemuchel,’ e a tang a kmo ‘ngkmal mle mekngit a omerellel el me er ngak.’ Te mesaod er tir er a demerir e le te di dul sorir a demerir a bo losebechakl er tir. Me a demerir a dmu er tir me lak lekakoad e lechilii el mo er a blai e losaod er tia el mondai. Me te mengiil er a demerir, e kuk luueta el mo kakoad. Me ngdi mle telkib e a demerir a mei e kmal mlo chetil a omerellir me ngmilengelebus er tir el terung e le ngdimlak lorrenges a tekingel.

Me chelecha el taem e aike el beluu el kaumekemad a olengit er a Dios me lolengeseu er tir, engdi a Dios a diak losebechakl a ngii di el beluu el kaumekemad er chelechang. A Tekingel el Biblia a bai meketeklii el kmo: “Lak momtechei er sel mekngit el oba mekngit,” e “lak molaitechei.” (Rom 12:17, 19) Me a lmuut el tang, ngmla meketeklii el kmo a rechad a kirir el “moba kllourreng el mengiil” er sel temel a Armakedon, e Ngii a mo ouedikel el kirel. (Psalm 37:7) Me a lsekum a beluu a diak longiil er a Dios e bai di tir el omuchel el kaumekemad, e ngomes aika el mekemedir el olechotel a kldidairreng, e dirrek el melemall er a rengul. Me ngar er a Armakedon e ngmo ochotii a cheldechuderreng er ngii, e di ta el taem e ngsumechokl a rokui el klaititekangel, e ‘torob a mekemad er a beluulchad el rokir.’ (Psalm 46:9; Isaia 34:2) Me a Armakedon a mekemad el mo okngemed a rokui el mekemad.

A okngemedel a mekemad a di ta er aike el betok el klengeltengat el mei el okiu a Rengedel a Dios. E a Jesus a milsaod er tia el kabelment er a loluluuch el kmo: “A Rengedem le mei; bo le motaut a soam er a beluulchad el ua ingii er a eanged.” (Mateus 6:10) Me a Rengedel a Dios a diak di bo lokngemed a rokui el mekemad e ngdirrek el mo okngemedii sel uchul me ngar er ngii a mekemad el ngii a chelebirukel el omeruul. * (Psalm 37:9, 10, 14, 15) Me a rultirakl er a Jesus a kmal semeriar el mengiil er sel taem el bo lemotaut aika el klengeltengat er a Rengedel a Dios.​—2 Petrus 3:13.

Me ngua klemengetel a ngerang el dongiil er a Rengedel a Dios el mo olekngemed a rokui el ringel me a chelebirukel? A otutel a ulaoch er a Biblia a meketeklii el kmo kede kiei er a uriul el sils. (2 Timothy 3:1-5) * Me ngdi kmedung a Rengedel a Dios el mo okngemedii tia el mekngit el blekeradel er a beluulechad el okiu a mekemad er a Armakedon.

Me ngua dulsaod er a uchei, tirke el rokui el mo mad er a chelsel tia el ulebongel el mekemad a tirke el “dimlak bo loltirakl a Ungil Chais el chisel a Rubak er kid el Jesus.” (2 Thesalonika 1:8) Engdi a Dios a chetil a lemad a rechad, el uldimukl er a remekngit el chad. (Esekiel 33:11) Me a Dios el “diak el soal a ngii di le chad a leriid” a uchul me ngsoal a ungil chais el kirel a Jesus a bo el “mosisechakl er a beluulchad el rokir el kirel el mo ocholt el mor a rokui el chad,” e sola e ngmochu ulebongel. (2 Petrus 3:8, 9; Mateus 24:14; 1 Timothy 2:3, 4) Me ngokiu a berkel a klumech el loruul er ngii a Resioning er a Jehovah er a beluulechad el rokir, e a rechad a mo er ngii a techellir el mo medengelii a Dios e mo kongei er a ungil chais el kirel a Jesus, me ngmo sebechir el kiei el mesa sel taem el bo lak a mekemad.

[Aike el footnote]