A ENOK a kmal mle kemanget a klengar er ngii. Alta ngmeringel er kid a omtab er ngii, engdi ngika el chad a kiliei el bekord el 365 el rak, el klengar er ngii a mle eua el chachisois a klemengetel er a klengar er a chad er chelecha el taem! Engdi ngdimlak el sal chuodel a doltirakl er a taem el lekiliei er ngii. Seikid el taem, el bekord el 5,000 el rak er a mla me mong, e a rechad a kiliei el kmal kemanget a klengar er tir. Ngike el kot el chad el Adam, a kiliei el kuk betok er a elolem el dart el rak er a uchei er a lemechell a Enok, e dirk mle chad el edei el dart el rak er a uriul! A rekuk bebil er a ruldidellel a rsechel a Adam a kiliei el kuk kemanget er tiang. Me alta ngmle 365 a rekil, el locha mle kemanget a klengar er ngii, engdi a mera er ngii e ngdimlak.

Ngmle ocherur a kodall. Ka molatk er ngii el chemiis, e di omdasu a mederir tirke el chad el lullekoi a klemechel a Dios el mo er tir. Tirka kmal mle kesib a rengrir er ngii. Ngmle chetirir a klumech el lulebang e uluuketui er ngike el Dios el lulderchii. Ngdimlak el sebechir el oldechelakl er a Dios er ngii, me te uliit a ngesechel a rengrir er a Enok! Me a Enok a locha millatk el kmo, ngmo sebechel lmuut el mesa telungalek er ngii? Nglocha ulemdasu er a bechil me a rengelekel el redil me a ngelekel er a Methusela me a lechub a ngelekel a ngelekel el Lamek? (Genesis 5:21, 23, 25) Tiang ngmo ulebongel?

Ngdiak a kmal omesodel a Biblia el kirel a Enok. Ngdi edei el mekedeb el bades a mesaod er ngii. (Genesis 5:21-24; Hebru 11:5; Jude 14, 15) Engdi aika el bades a ungil mesaod er a klengar er ngii el mle chad er a klaumerang. Kau ke mesiou er a telungalek er kau? Ngmla ta el kirem el dechor el kirel a tekoi el modengelii el kmo ngmelemalt? A leuaisei, e ngsebechem el suub a betok er a klaumerang er a Enok.

Sel taem er a lemechell a Enok, e ngkmal mle mekngit a blekerdelir a rechad. Ngmle ongeuid el telecheroll er a Adam. Me a rechad a dirk mle kmeed er a chelerrungel el klengar el Adam me a Eva a urridii. Sei a uchul me a rechad a kiliei el kmal kemanget a klengar er tir. Engdi ngdimlak el klikiid a klengar er tir e dimlak longull er a Dios. Ngdirrek el kmal mle klou a uldikel, e tia el blekeradel a ulemuchel er a ongeru el telecheroll er sel taem el Kain a milekodir a ochellel er a Abel. A ta er a uldidellel a rsechel a Kain a kmal mle dmeu a rengul e le ngkuk mle mekngit a blekerdelel er a Kain! E sera ongedei el telecheroll, e a beches el mekngit el blekeradel a mlo er ngii. A rechad a ulemuchel el omekedong er a ngklel a Jehovah, engdi ngdimlak lousbech er ngii er a omengull. Te bai uluusbech er ngii er a kmal mekngit el rolel.​—Genesis 4:8, 23-26.

A chouaitia el mekngit el rolel a omengull a kmal mle klou er a taem er a Enok. Me a lorael el mo klou, e ngmla er ngii a omelilt el mle kirel rullii. Ngmo mesuub er a rechad er a taem er ngii, me a lechub e ngmo mesiou er a mera el Dios el Jehovah, el ngii a milebii a eanged me a chutem? Nglocha kmal mle rutechii a rengul er a losuub el kirel a Abel, el ngii a mlad e le ngmilsiou el oltirakl er a soal a Jehovah. Me a Enok a mlo meruul er a osisiu el tekoi. A Genesis 5:22 a kmo: “A Enok a mle blak a rengul el oltirakl er a Dios.” Tia el tekoi a ochotii el kmo ngdi mle ngii el tang a milluu er a Dios er seikid el taem. Ngii a kot el chad el Biblia a mesaod er ngii el uaisei.

 Tia el osisiu el bades a melekoi el kmo a Enok a millemolem el oltirakl er a Jehovah er a uriul er a bo loungalek er a Methusela. Me ngsebeched el mesa el kmo a Enok a mlo er ngii a telungalek er ngii er a lebekord el 65 a rekil. Ngmla er ngii a bechil, el diak el medung a ngklel er a Biblia, me a diak el ulterekokl a ildisir el “ngelekel el sechal ma redil.” Me a lsekum a chedam a oltirakl er a Dios e osisiu el taem e ngomekerreu er a telungalek er ngii, e ngkirel el melasem el meruul er tiang el oltirakl er a rolel a Dios. A Enok a mle ungil medengei el kmo a Jehovah a soal a bo leblak a rengul er a bechil. (Genesis 2:24) E ngii a millasem er a tkurrebab el sebechel el olisechakl er a rengelekel el kirel a Jehovah. E ngera mlo rsel?

A Biblia a diak a kmal omesodel el kirel tiang. Ngdiak losaod el kirel a klaumerang er a ngelekel a Enok er a Methusela, el ngii a kot el mle kemanget a klengar er ngii el chad el ngar er a Biblia e mlad er sel rak er a lebo er ngii a Ieleb. Engdi a Methusela a mlo er ngii a ngelekel el Lamek a ngklel. E ngika el Lamek a mle kiei el obengkel a demal el rubak el Enok el kuk betok er a 100 el rak. E mlukeroul el kmal mlo mesisiich a klaumerang er ngii. A Jehovah a ulemekrael er ngii el mo omlaoch el kirel a ngelekel er a Noah, e tia el ulaoch a mlo tmaut er a uriul er a Ieleb. A Noah a di mle ua demal a demal rubak el Enok, el di mle ngii el tang a uleltirakl er a Dios. A Noah a dimlak a ta lesa Enok, engdi Enok a milecherei a kmal ungil el kerebai. A Noah a locha milsuub el kirel a blakerreng er a Enok er a demal er a Lamek, me a lechub a demal a demal er a Methusela, me a lechub a demal a Enok er a Jared, el mlad er a bo el 366 a rekil a Noah.​—Genesis 5:25-29; 6:9; 9:1.

Ka molatk er a klekakerous er a delongelel a Enok me a Adam. A Adam alta ngmle cherrungel engdi ngmlo er a klengit el omtok er a Jehovah el mlo uchul a ultok me a chelebuul el mo er a rengelekel. A Enok a dimlak el cherrungel engdi nguleltirakl er a Dios e milecherei a ungil kerebai el kirir a rengelekel. A Adam a mlad er a bo el 308 a rekil a Enok. Me a telungalek er a Adam te milengeiung er a kodellel ngika el demerir el kmal mle bechelechelingaol a rengul? Ngdiak dodengei. Engdi kede medengei el kmo a Enok a “lilemelemii a klengar er ngii el oltirakl er a Dios.”​—Genesis 5:24.

A lsekum e ke omekerreu er a telungalek er kau, e momtab a bebil er a tekoi el sebechem el suub er a klaumerang er a Enok. Alta ngklou a ultutelel a momekerreu aike el lousbech a telungalek er kau er a klechad, engdi nglmuut el klou a ultutelel a momekerreu er a deleuill er tir me a Dios. (1 Timothy 5:8) Ngsebechem el meruul er tiang el oeak a tekingem me a dirrek el omerellem. A lsekum e ke oltirakl er a Dios el di uai a Enok, e mecherei a llechul a Dios me lomekrael er a klengar er kau, e ngmo sebechem el kutmeklii a kmal ungil el kerebai el kirel a telungalek er kau.

A Enok a locha millatk el kmo ngkmal di mle ngii el tang a ullecholt a klaumerang er a chelsel a beluulechad el dimlak loumerang. Engdi a Jehovah el Dios er ngii, ngmilsang? Chochoi. Tia el tekoi a dilubech er sel taem el Jehovah a milengedecheduch er ngika el blak a rengul el mesiungel. A Dios a milsa Enok a klumech el mle kirel omerk er ngii el mo er a rechad. Me ngrirellii a Enok el mo profet, el ngike el kot el chad el klemechel a medung er a Biblia. Kede medengelii tiang e le Jude, el ta delal ngii me a Jesus, a mlukreng el mo  meluches el kirel a ulochel a Enok er a betok el dart el rak er a uriul. *

Ngera mle ulochel a Enok? Ngmillekoi el kmo: “Mesang, a Rubak a chilteklterir ar diak le mochur el mechedaol er ngii el mei, el kirel loukerrekeriil ra rokuil chad, el dirrek lomlals a rokuil diak loluu ra Dios el omeruul, el le mlarngii tirikel diak loluu ra Dios e ullechib a mederir er ngii, e dirrek lomlals a ikel rokuil teleberechel lomelekoi el lullekoi lomtok ra Rubak tirikel mekngit el chad el diak loluu ra Dios.” (Jude 14, 15, BT) Sel kot el tekoi el sebechem el mtebengii er tia el bades a kmo, a Enok a milengedecheduch el di uai a Dios a bla lerellii a tekoi el lolekoi a ulaoch. E tiaikid a rolel a omelechesel a betok el ulaoch. Me a tekoi el kired el mtebengii a kmo: Ngika el profet a milsaod er a tekoi el kmal mle ulterekokl el mo tmaut me ngmilsaod er ngii el di ua bla bo el merek!​—Isaia 46:10.

Ngmle ua ngera uldesuel a Enok er a losubed er tia el tekoi, el locha mo er a rokui el chad el mle sebechir el rongesii? Ka momtab a klisichel tia el uleklatk. Ngousbech er a tekoi el diak loluu er a Dios el mesaod er a rechad, me a omerellir, me a rolel a loruul a tekoi. Tia el ulaoch a ulemeklatk er a rokui el chad el kmo a blekeradel er a beluulechad er a uriul er a letobed er a sers er a Eden a kmal mle mekngit. E sel beluulechad a mo metemall sel lemei a Jehovah me a “diak le mochur el mechedaol er ngii” el mo oumekemad. A Enok a kmal mle bekeu el ouchais er tia el uleklatk er a Dios e di mle ngii el tang a meruul er ngii! A Lamek a locha ulemes a tekoi el dilubech, e kmal mle mechas a rengul er a blekengel a demal rubak. Me a leuaisei, e ngkmal sebeched el mesa ungil uchul.

A klaumerang er a Enok a rullid el di kid el oker el kmo, kede oba osengel a Dios el kirel a beluulechad el dekiei er ngii me a lechub e ngdiak. A kerrekeriil el lullekoi er ngii a Enok a kmal dirk osisiu el kirel a beluulechad er chelechang el di uai sel beluulechad er a taem er ngii. Ngoltirakl er tia el uleklatk er a Enok, e a Jehovah a ultengelii a Ieleb el mo tomellii sel beluulechad el dimlak loluu er a Dios er a taem er a Noah. E tia el tellemall a dirrek el melutk er a klou el tellemall el di kmedung el mei. (Mateus 24:38, 39; 2 Petrus 2:4-6) Me chelechang, e a Dios a dirrek el kltmokl el obengterir a rediak lemochur el anghel er ngii el mo oukerrekeriil er tia el beluulechad el diak loluu er a Dios. A derta er kid a kired el mo ungil omtab er a uleklatk er a Enok e mo ouchais er ngii el mo er a rebebil. A rechad er a blid me a resechelid a locha mo choitid, engdi a Jehovah a dimlak a ta el lechitii a Enok, me ngkmal diak bo lechititerir a reblak a rengrir el mesiungel er chelechang!

Ngmle ua ngera ulebengelel a klengar er a Enok? Ngsebeched el melekoi el kmo, a kodellel a lmuut el mle mengasireng er a klengar er ngii. A babier er a Genesis a kmo: “Ng lilemelemii a klengar er ngii el oltirakl er a Dios e sola e mlo dibus ele Dios a ngiluu el merael.” (Genesis 5:24) Ngmilekerang a Dios e nguu a Enok? A apostol el Paulus a milsaod er a uriul el kmo: “Ma kloumera uchul ma Henok a mlengai me lak lesa kodall; me ngmlo diak le mesiik, le Dios a ngiluu. Ser uchei ra le mengai e ngmlocholt el kmo a Dios a dmeu a rengul er ngii.” (Hebru 11:5, BT) Ngera mle belkul a tekingel a Paulus el “mlengai me lak lesa kodall”? A bebil er a oidel a Biblia a melekoi el kmo a Dios a ngiluu a Enok el mo er a eanged. Engdi tia diak el sebechel el uaisei, e le Biblia a olecholt el kmo a Jesus Kristus a mle kot el chad el mlokiis el mo er a eanged.​—Johanes 3:13.

Me a leuaisei, e ngmilekerang a Enok e “mlengai me lak lesa kodall”? A Jehovah a locha uliuelii a klengar  er ngii el mo er a kodall me lak bo el chelebangel er a meringel el kodall er a chimorir a rumtok er ngii. Engdi uchei er sei, e “ngmlocholt el kmo a Dios a dmeu a rengul er ngii.” Ngokiu a ngera el rolel? Telkib el taem er a uchei er a kodellel, e a Dios a locha milsa Enok a ues, el locha olecholt er a beluulechad el mla mo baradis. Me sera lenguu tia el olechotel a kengei er a Jehovah, e ngmlad. Me a loluches el kirel a Enok me a lmuut el bebil er a reblak a rengrir el sechal me a redil, e a apostol el Paulus a dilu el kmo: “Tirkal rokui el chad a mlad el uluumerang.” (Hebru 11:13) Me a uriul, e a recherrouel a locha ulsiik er a bedengel, engdi “ngmlo diak le mesiik” e le Jehovah a locha rirellii el mo dibus, me lak lousbech er ngii er a mekngit el rolel me a lechub e lousbech er ngii el melisiich a klsuul el omengull. *

Me sel dolatk er tia el omesodel a Biblia el kirel a ulebengelel a klengar er a Enok, e ka me domtab el kmo nglocha ngera dilubech. A Enok a chemiis e kmal mla mo mesaul a bedengel. Tirke el ulemtok er ngii a oltoir er ngii e kmal kesib a rengrir er a klumech el lulemerk er ngii. Me a Enok a metik er a basio el sebechel el mo omart er ngii e olengull el telkib, engdi ngmedengei el kmo te di mo metik er ngii. Ngdi kmedung e te mo mekodir. Me tia er a lolengull e ngmocha meluluuch el mo er a Dios e mlo melechesuar a budech. E sola e milsa ues, el kmal mle bleketakl me ngdi ngii me a lemla er sei.

Ka molatk er tia el ues el lilsang el olecholt er a beluulechad el kmal mle ngodech er a beluulechad el lodengelii. Ngkmal mle klebokel el di ua sers er a Eden, engdi ngdimlak a kerubim el mengkar er ngii me lak a chad el mo tmuu er ngii. Ngmla er ngii a rebetok el sechal me a redil el mesisiich a bedengir. E mle budech a rokui el tekoi. Ngdimlak a kltui me a ultok er a klechelid, el tekoi el Enok a mle chelebangel. E a Enok a mle sebechel el melechesuar a ulekerreu me a bltikerreng me a kengei er a Jehovah. Ngmle ulterekokl a rengul el kmo seikid el basio a mle delengcheklel. Me a Enok er sera bo lebudech a rengul, e ngmilutek a medal e mlo mechiuaiu.

Me a Enok a mlad e chelechang e ngngar er a omeltkel a Jehovah el Dios! Ngdi ua letilbir a Jesus, ngmo er ngii a taem el tirke el rokui el ngar er a omeltkel a Dios a mo rongesii a ngerel a Kristus e mekiis el mo mesa klebokel el beches el beluulechad el budech a tekoi er ngii.​—Johanes 5:28, 29.

Kau ngsoam el mo ta er tir? Ka di molatk er kau el sebechem el mo mesa Enok. E ka molatk el kirel aike el betok el ungil el tekoi el sebeched el suub er ngii! Ngsebechel el mo ouchais er kid a lsekum e ngklemerang sel uldesued el kirel a ulebengelel a klengar er ngii. Engdi ngar er ngii a klou a ultutelel el tekoi el sebeched el suubii er ngii er chelechang. A uriul er a losaod el kirel a Enok, e a Paulus a millekoi el kmo: “Ng diak a chad el diak loumerang e sebechel el odeuir a rengul a Dios.” (Hebru 11:6) Tiang a mesisiich el uchul me ngkirel a derta er kid el mo oukerebai er a klaumerang er a Enok!