DOA ES EN DE LATSTE TIET SEA VÄL ÄWA NOJEFORSCHT WORDEN, WOO DEE DAUT JEIT, WAUT WÄM HABEN MUST BEGROWEN. Soo aus wie en de väaje Artikjels jeseenen haben, paust de Rot von de Jelieede foaken met daut toop, waut de Schreft sajcht. Un daut wiest, daut de Schreft noch emma sea fein to brucken es. Oba en de Schreft es nich bloos Rot bennen; dee jeft ons uk waut, waut eena sest noanich wua finjen kaun, un waut deejanje sea treesten kaun, waut truaren.

• Wie sent ons secha, daut dee, waut jestorwen sent, nich lieden brucken

  “De Vestorwne weeten nuscht”, sajcht de Schreft en Liera 9:5. Wan dee stoawen, “es daut met aul äa Väanämen jewast” (Psalm 146:4). Doawäajen sajcht de Schreft uk, wan eena stoaft, es daut soo, aus wan eena ruich schlapt (Johanes 11:11).

• Een stoakja Gloowen aun dän leeftoljen Gott jeft ons Troost

  De Schreft sajcht en Psalm 34:16: “De HAR [ooda Jehova *] haft de jerajchte em Uag, un siene Uaren hieren wan dee schrieen”. Wan wie to Gott bäden, dan treest ons daut väl dolla, aus wan wie bloos met Menschen doaräwa räden, woo ons daut jeit. Un bäden es uk nich bloos toom onse Jedanken unja Kontroll hoolen. Daut halpt ons en Werkjlichkjeit, Frind to woaren met onsen Schepfa, waut de Krauft haft, ons to treesten.

• Wie haben eene scheene Tiet ver ons

  Wudd daut nich scheen sennen, wan dee, waut aul jestorwen sent, hia oppe Ieed wada wudden vom Doot oppstonen? De Schreft rät ieremol doavon, daut et soo sennen woat. Dee sajcht, Gott woat “aule Tronen von de Uagen weschen. Doa woat kjeen Doot ooda Trua ooda Hielen ooda Weedoag mea sennen” (Openboarunk 21:3-4).

Jehova Gott, von dän de Bibel kjemt, haft ons de Hopninj jejäft, daut wie onse leewe Vestorwne noch wada seenen woaren. Dise Hopninj haft väle, waut aun Jehova jleewen, aul Troost jejäft. Biejlikj soo jeit eene Fru daut, waut Ann heet. See wia aul 65 Joa befriet un dan storf äa Maun. See sajcht: “De Schreft sajcht, daut daut gaunz secha es, daut onse leewe Aunjehieeje, waut aul jestorwen sent, nich lieden motten un daut Gott aul dee woat oppwakjen, waut hee en siene Jedanken oppbewoat haft. Ekj denkj emma aun dit Vespräakjen, wan ekj aun mienen Maun denkj. Un doawäajen kaun ekj bäta met daut schlemste, waut mie passieet es, foadich woaren.”

Tiina, von dee wie aul ea en dise Artikjels räden, sajcht: “Von dän Dach aun, aus Timo storf, hab ekj emma dietlich jespäat, woo Gott mie unjastett un biestunt, wan mie daut schwoa wia. Un daut Vespräakjen ut de Schreft, daut de Doodes wada woaren oppstonen, es sea kloa fa mie. Daut halpt mie, stoakj to sennen un wiedatomoaken bat dän Dach, wan ekj Timo wada seenen woa.”

Soo aus dit jeit daut millionende Menschen, waut sikj secha sent, daut opp de Schreft to veloten es. Wan daut veleicht uk schwoa es to jleewen, waut de Schreft sajcht, rod wie die doawäajen too, selfst mea uttofinjen äwa dän Rot un de Vespräakjungen enne Schreft. Dan woascht du veleicht enwoaren, daut de Schreft de baste Help es fa soone, waut truaren.

Kjikj soone Videos, wua daut uk om soowaut jeit opp de Websied jw.org.

 WAUT ES MET DEE, WAUT JESTORWEN SENT?

WURSCHT DU WELLEN EENE GOODE NORECHT HIEREN?