فِلپّیوں دے ناں خط 1:1-30
1 پولُس تے تیمُتھیُس وَلّوں خط جیہڑے مسیح یسوع دے غلام نیں۔ ایہہ خط فِلپّی چ رہن والے اوہناں سارے مُقدس لوکاں، کلیسیا دے بزرگاں تے خادماں لئی اے جیہڑے مسیح یسوع نال اِک مُٹھ نیں۔
2 میری دُعا اے کہ ساڈا باپ خدا تے مالک یسوع مسیح توانوں عظیم رحمت تے سلامتی بخشن۔
3 مَیں جدوں وی توانوں یاد کرنا واں، اپنے خدا دا شکر کرنا واں
4 تے اپنی ہر اِلتجا چ تواڈے ساریاں دا خوشی خوشی ذکر کرنا واں
5 کیونکہ جیس دن توں تُسی خوشخبری نُوں قبول کیتا اے، اوس دن توں تُسی ایہنوں پھیلان لئی بڑی محنت کیتی اے۔
6 مینوں پورا بھروسا اے کہ خدا نے تواڈے چ جیہڑا چنگا کم شروع کیتا اے، اوہ اوہنوں مسیح یسوع دے دن تک پورا وی ضرور کرے گا۔
7 تواڈے ساریاں بارے میری ایہہ سوچ بالکل صحی اے کیونکہ تُسی میرے دل چ وَسدے او تے خدا دی عظیم رحمت چ میرے حصےدار او۔ تُسی نہ صرف قید چ میرا ساتھ دِتا سگوں اِختیار والیاں دے سامنے خوشخبری دی خاطر بولن تے ایہدی مُنادی کرن دا حق حاصل کرن دی قانونی لڑائی چ وی میرا ساتھ دِتا۔
8 خدا میرا گواہ اے کہ مَیں توانوں ساریاں نُوں مِلن لئی کِنّاں ترس رہیا واں کیونکہ مَیں مسیح یسوع وانگوں توانوں دِلوں پیار کرنا واں۔
9 مَیں ہمیشاں ایہی دُعا کرنا واں کہ تواڈا پیار ہور وی ودھدا جائے تے ایہدے نال نال تُسی صحی علم تے پوری سمجھ حاصل کردے رہوو۔
10 نالے پتہ لاندے رہوو کہ کیہڑیاں گلاں زیادہ اہم نیں تاکہ مسیح دے دن تک تُسی بےعیب رہوو تے دُوجیاں دے ضمیر نُوں ٹھیس نہ پونچاؤ
11 تے تُسی یسوع مسیح دی مدد نال زیادہ توں زیادہ نیک کم کرو تاکہ نہ صرف توانوں فائدہ ہوئے سگوں خدا دی تعریف تے وڈیائی وی ہوئے۔
12 بھراوو، مَیں توانوں دَسنا چاہنا واں کہ میرے نال جو کجھ وی ہویا اے، اوہدی وجہ توں خوشخبری ہور وی زیادہ پھیلی اے
13 تے رومی بادشاہ دے سپاہیاں تے باقی سارے لوکاں نُوں پتہ لگ گیا اے کہ مَیں مسیح دی خاطر قید آں۔
14 میرے قید چ ہون دی وجہ توں مالک دی خدمت کرن والے زیادہتر بھراواں دی ہمت ودھی اے تے اوہ بغیر ڈرے ہور وی زیادہ دلیری نال خدا دا کلام سُنا رہے نیں۔
15 ایہہ سچ اے کہ کجھ لوک حسد تے مقابلہبازی دی وجہ توں مسیح بارے مُنادی کر رہے نیں جد کہ دُوجے چنگی نیت نال اِنج کر رہے نیں۔
16 اوہ پیار دی وجہ توں مسیح بارے مُنادی کر رہے نیں کیونکہ اوہ جان دے نیں کہ مینوں خوشخبری دے حق چ بولن لئی چُنیا گیا اے۔
17 پر حسد تے مقابلہبازی دی وجہ توں مُنادی کرن والیاں دی نیت چنگی نئیں۔ اوہ قید چ میرے لئی مصیبتاں ودھانا چاہندے نیں۔
18 پر ایہدا کیہہ نتیجہ نکل رہیا اے؟ لوکاں دی نیت بھانویں بھیڑی ہووے یاں چنگی، ہر طریقے نال مسیح بارے مُنادی ہو رہی اے۔ مَیں ایس گلوں خوش آں تے خوش ہوندا رہواں گا
19 کیونکہ مینوں پتہ اے کہ تواڈیاں اِلتجاواں تے اوس پاک روح دے ذریعے مینوں نجات ملے گی جیہڑی یسوع مسیح دیندا اے۔
20 مینوں پورا بھروسا تے امید اے کہ مَیں کسے وی وجہ توں شرمندہ نئیں ہونواں گا سگوں دلیری نال گل کراں گا تے پہلے وانگوں ہُن وی میرے* ذریعے مسیح دی وڈیائی ہوئے گی فیر بھانویں مَیں زندہ رہواں یاں مر جاواں۔
21 جے مَیں زندہ رہیا تے مسیح لئی زندہ رہواں گا تے جے مَیں مر گیا تے ایہدے چ میرا ای فائدہ اے۔
22 جے مَیں زمین تے زندہ رہیا تے مَیں مسیح لئی ہور کم کر سکاں گا۔ پر مَیں ایہہ کسے نُوں نئیں دَساں گا کہ مَیں کیہہ چاہنا واں۔
23 مینوں سمجھ نئیں آ رہی کہ مَیں ایہناں دونواں وچوں کیہہ چُناں۔ مَیں چاہنا تے ایہی آں کہ مَیں چھٹکارا پا کے مسیح نال ہونواں کیونکہ ایہی سب توں بہتر اے۔
24 پر زیادہ ضروری ایہہ وے کہ مَیں تواڈے فائدے لئی زندہ رہواں۔
25 ایس لئی مینوں یقین اے کہ مَیں زندہ رہواں گا تے تواڈے ساریاں دے نال ہونواں گا تاکہ تُسی خدا دی خدمت چ اَگے ودھدے رہوو تے توانوں اپنے ایمان توں خوشی ملے
26 تے جدوں مَیں دُبارہ تواڈے کول ہونواں گا تے میری وجہ توں تواڈی ایہہ خوشی دُگنی ہو جائے گی کہ تُسی مسیح یسوع دے شاگرد او۔
27 دھیان رکھو کہ تواڈے طورطریقے* مسیح دی خوشخبری دے مطابق ہون۔ فیر بھانویں مَیں تواڈے کول آواں یاں نہ آواں، مینوں ایہہ خبر مِلدی رہوے کہ تُسی اِک دل تے اِک جان ہو کے مضبوطی نال کھڑے او تے خوشخبری تے ایمان لیان چ دُوجیاں دی مدد کرن لئی مِل کے محنت کر رہے او
28 تے تُسی اپنے دُشمناں توں بالکل نئیں ڈردے۔ تواڈی دلیری خدا وَلّوں ایس گل دا ثبوت اے کہ اوہ تواڈے دُشمناں نُوں ختم کر دَوے گا تے توانوں نجات بخشے گا۔
29 توانوں صرف مسیح اُتے ایمان لیان دا ای نئیں سگوں اوہدی خاطر دُکھ سہن دا وی مان بخشیا گیا اے۔
30 تُسی وی اوہناں مشکلاں دا سامنا کر رہے او جنہاں دا سامنا کردیاں تُسی مینوں ویکھیا اے۔ نالے تُسی سُنیا اے کہ مَیں حالے وی اوہناں مشکلاں دا سامنا کر رہیا واں۔
