فِلپّیوں دے ناں خط 4:1-23
4 ایس لئی میرے پیارے بھراوو، مَیں توانوں تاکید کرنا واں کہ تُسی وفاداری نال مالک دی خدمت کردے رہوو۔ مَیں توانوں بوہت پیار کرنا واں تے توانوں مِلن لئی ترس رہیا واں۔ تُسی میری خوشی تے میرا تاج* او۔
2 مَیں یُوؤدیہ تے سِنتخے نُوں نصیحت کرنا واں کہ اوہ اِک دُوجے نال صلح کر لین* تاکہ مالک نال اِک مُٹھ رہ سکن۔
3 تُوں* میرا سچا ساتھی ایں، ایس لئی مَیں تینوں درخاست کرنا واں کہ تُوں ایہناں دونواں بھیناں دی مدد کردا رہ۔ ایہناں دونواں نے خوشخبری پھیلان لئی میرے نال، کلیمنس نال تے میرے باقی ساتھیاں نال مِل کے بوہت محنت کیتی اے۔ ایہناں ساریاں دے ناں زندگی دی کتاب چ لکھے ہوئے نیں۔
4 مالک دی خدمت چ ہمیشاں خوش رہوو، مَیں فیر کہنا واں، خوش رہوو۔
5 ساریاں نُوں نظر آئے کہ تُسی سمجھدار* او۔ مالک نیڑے وے۔
6 کسے گل بارے پریشان نہ ہووو سگوں ہمیشاں خدا کولوں دُعا کرو۔ ہر معاملے چ رہنمائی لئی اوہدے کولوں اِلتجا کرو تے اوہدی شکرگزاری کردے رہوو۔
7 فیر خدا توانوں اوہ اِطمینان دَوے گا جیہڑا سمجھ توں باہر اے تے اوہ اِطمینان مسیح یسوع دے ذریعے تواڈے دِلاں تے سوچ دی حفاظت کرے گا۔
8 آخر چ بھراوو، اوہناں گلاں تے سوچوچار کردے رہوو جیہڑیاں سچیاں، اہم،* نیک،پاک، پیار ودھان والیاں، عزت دے لائق، چنگیاں تے تعریف دے لائق نیں۔
9 تُسی میرے توں جیہڑیاں گلاں سکھیاں، قبول کیتیاں، سُنیاں تے میرے چ ویکھیاں، اوہناں تے پورے دھیان نال عمل کردے رہوو۔ فیر خدا جیہڑا اِطمینان* دا چشمہ اے تواڈے نال ہووے گا۔
10 مَیں بڑا خوش آں تے مالک دا شکر کرنا واں کہ تُسی فیر توں میرے لئی فکر ظاہر کر رہے او۔ تُسی تے ہمیشاں ای میری فکر کردے سو۔ پر ایہنوں ظاہر کرن دا توانوں موقع نئیں ملیا۔
11 مَیں ایہہ گل ایس لئی نئیں کہہ رہیا کہ مینوں کسے چیز دی لوڑ اے سگوں مَیں ہر حال چ خوش* رہنا سکھ لیا اے۔
12 مَیں تھوڑے چ وی گزارا کرنا جاننا واں تے بوہتے چ وی۔ مَیں ہر حال چ خوش رہن دا راز جان لیا اے فیر بھانویں مَیں رَجیا ہونواں یاں بُھکھا، بھانویں میرے کول بوہت کجھ ہووے یاں کجھ وی نہ ہووے
13 کیونکہ خدا مینوں اپنی طاقت نال ہر طرحاں دے حالاتاں دا سامنا کرن دی ہمت دیندا اے۔
14 فیر وی ایہہ تواڈی مہربانی سی کہ تُسی مشکلاں نُوں سہن چ میری مدد کیتی۔
15 فِلپّی چ رہن والے بھراوو، اصل چ توانوں پتہ اے کہ جدوں تُسی پہلی واری خوشخبری سُنی تے جدوں مَیں مقدونیہ توں چلا گیا ساں تے تواڈے علاوہ کسے ہور کلیسیا نے میری مدد نئیں کیتی
16 تے جدوں مَیں تھسلُنیکے چ ساں تے اوہدوں وی تُسی میریاں ضرورتاں نُوں پورا کرن لئی اِک وار نئیں سگوں دو وار کجھ بھیجیا۔
17 ایہہ گل نئیں کہ مَیں تحفے حاصل کرنا چاہنا واں سگوں مَیں چاہنا واں کہ توانوں اوہ برکتاں مِلن جیہڑیاں دُوجیاں دی مدد کرن والیاں نُوں مِلدیاں نیں۔*
18 اصل چ میرے کول ضرورت دِیاں ساریاں چیزاں ہے نیں سگوں اوس توں وی ودھ نیں۔ مینوں کسے چیز دی کمی نئیں اے کیونکہ جیہڑیاں چیزاں تُسی اِپَفردِتُس دے ہتھ گھلیاں سن، اوہ مینوں مِل گئیاں نیں۔ تواڈا ایہہ تحفہ اوس خوشبودار چڑھاوے وانگوں اے جنہوں خدا خوشی نال قبول کردا اے۔
19 بدلے چ میرا خدا اپنے شاندار خزانے چوں مسیح یسوع دے ذریعے تواڈی ہر ضرورت نُوں پورا کرے گا۔
20 ساڈے خدا تے باپ دی وڈیائی ہمیشاں ہمیشاں ہوندی رہوے۔ آمین۔
21 اوہناں سارے مُقدس لوکاں نُوں میرا سلام جیہڑے مسیح یسوع نال اِک مُٹھ نیں۔ نالے جیہڑے بھرا میرے نال نیں، اوہ وی توانوں سلام بھیج رہے نیں۔
22 ایتھوں دے سارے مُقدس لوک، خاص طور تے بادشاہ* دے محل چ رہن والے لوک توانوں سلام بھیج رہے نیں۔
23 میری دُعا اے کہ تواڈے نیک جذبے دی وجہ توں مالک یسوع مسیح دی عظیم رحمت تواڈے تے ہووے۔
فٹ نوٹ
^ یاں، ”انعام۔“
^ یونانی چ: ”اِکو جہی سوچ رکھن۔“
^ ایتھے پولُس کلیسیا دے اِک بھرا نُوں ایہناں بھیناں دی مدد کرن لئی کہہ رہیا اے۔
^ یاں، ”لچکداراو، ملنسار او، اپنی گل تے اَڑے نئیں رہندے۔“
^ یونانی چ: ”سنجیدہ۔“
^ یاں، ”امن۔“
^ یاں، ”راضی، مطمئن۔“
^ یاں، ”تواڈا کھاتہ برکتاں نال بھر جائے۔“
^ یونانی چ: ”قیصر۔“
