سبق 12
تُسی خدا دے نزدیک کیویں جا سکدے او؟
1. کیہہ خدا سب لوکاں دیاں دُعاواں سُن دا اے؟
خدا سب لوکاں نوں دعوت دیندا اے کہ اوہ دُعا دے ذریعے اوہدے نزدیک آؤن۔ (زبور 65:2) پر اوہ ہر اِک دی دُعا نئیں سُن دا۔ مثال دے طور تے خدا اوس آدمی دیاں دُعاواں نئیں سُن دا جیہڑا اپنی بیوی نال بُرا سلوک کر دا اے۔ (1-پطرس 3:7) نالے جدوں اسرائیلی غلط کماں وچ پے گئے تے خدا نے اوہناں دیاں دُعاواں سُنن توں انکار کر دِتا۔ پر جدوں گنہگار اپنے گناہواں توں توبہ کردے نیں تے خدا اوہناں دیاں دُعاواں سُنن لئی تیار ہو جاندا اے۔ واقعی خدا دے حضور دُعا کرنا انساناں لئی بوہت وَڈّا شرف اے۔—یسعیاہ 1:15؛ 55:7 نوں پڑھو۔
ویڈیو ”کیہہ خدا سارے لوکاں دِیاں دُعاواں سُن دا اے؟“ ویکھو۔
2. سانوں کیویں دُعا کرنی چاہیدی اے؟
دُعا ساڈی عبادت دا حصہ اے، ایس لئی سانوں صرف اپنے خالق یہوواہ توں دُعا کرنی چاہیدی اے۔ (متی 4:10؛ 6:9) ایس توں علاوہ سانوں یسوع مسیح دے وسیلے توں دُعا کرن دی لوڑ اے کیونکہ اَسی گنہگار آں تے اوہناں نے ساڈے گناہواں دی خاطر اپنی جان قربان کیتی اے۔ (یوحنا 14:6) یہوواہ خدا نئیں چاہندا کہ اَسی رٹیاں رٹائیاں یاں کسے کتاب وچوں پڑھ کے دُعاواں کرئیے۔ جدوں اَسی دل کھول کے دُعا کرنے آں تے خدا خوش ہوندا اے۔—متی 6:7؛ فِلپّیوں 4:6، 7 نوں پڑھو۔
ساڈا خالق اوہ دُعاواں وی سُن سکدا اے جیہڑیاں اَسی اپنے دل ای دل وچ کرنے آں۔ (1-سموئیل 1:12، 13) اوہ سانوں ہر موقعے تے دُعا کرن دی دعوت دیندا اے۔ اَسی صبح تے رات نوں تے کھانا کھان توں پہلاں دُعا وچ اوہدا شکر ادا کر سکنے آں۔ اَسی مشکل گھڑیاں وچ وی اوہدے اَگے فریاد کر سکنے آں۔—زبور 55:22؛ متی 15:36 نوں پڑھو۔
3. خدا دے لوکاں نوں مِل کے عبادت کیوں کرنی چاہیدی اے؟
خدا نال اپنا رشتہ مضبوط رکھنا آسان نئیں کیونکہ ساڈے آلے دوالے زیادہ تر لوک اوہدے حکماں نوں نئیں من دے۔ اوہ خدا دے ایس وعدے تے وی ایمان نئیں رکھدے کہ زمین تے امن 2-تیمُتھیُس 3:1، 4؛ 2-پطرس 3:3، 13) ایس لئی سانوں یہوواہ خدا دے خادماں نال مِل کے عبادت کرنی چاہیدی اے تاکہ اَسی اِک دُوجے دا حوصلہ ودھا سکیے۔—عبرانیوں 10:24، 25 نوں پڑھو۔
سلامتی ہووے گی۔ (جدوں اَسی خدا نوں پیار کرن والے لوکاں نال مِل کے عبادت کرنے آں تے خدا نال ساڈا رشتہ مضبوط ہوندا اے۔ یہوواہ دے گواہواں دیاں عبادتاں تے دُوسریاں دا ایمان ویکھ کے توانوں حوصلہ ملے گا۔—رومیوں 1:11، 12 نوں پڑھو۔
4. تُسی خدا دے نزدیک کیویں جا سکدے او؟
پاک کلام وچوں سکھیاں گلاں تے سوچ وچار کر کے تُسی یہوواہ خدا دے نزدیک جا سکدے او۔ خدا دے کماں، وعدیاں تے اوہدی صلاح بارے دھیان نال سوچو۔ جے تُسی دُعا کرن دے نال نال ایہناں گلاں تے سوچ وچار کرو گے تے فیر تواڈے دل وچ خدا دے پیار تے اوہدی حکمت لئی قدر ودھے گی۔—یشوع 1:8؛ زبور 1:1-3 نوں پڑھو۔
خدا تے ایمان تے بھروسہ رکھن نال ای تُسی اوہدے قریب جا سکدے او۔ ایمان اِک پودے وانگوں اے۔ جیویں اِک پودے نوں ودھن لئی پانی دی لوڑ ہوندی اے، اوسے طرحاں ایمان نوں مضبوط کرن لئی سانوں پاک کلام دے صحی علم دی لوڑ اے۔ ایس لئی سانوں سوچ وچار کر دے رہنا چاہیدا اے کہ ساڈے عقیدیاں دی بنیاد کیہہ اے۔—متی 4:4؛ عبرانیوں 11:1، 6 نوں پڑھو۔
5. خدا دے نزدیک جا کے توانوں کیہڑے فائدے ہون گے؟
یہوواہ خدا نوں اوہناں دی بڑی فکر اے جیہڑے اوہنوں پیار کر دے نیں۔ اوہ اپنے لوکاں نوں ہر اوس خطرے توں بچاؤن دے قابل اے جیہڑا اوہناں دے ایمان نوں کمزور کر سکدا تے ہمیشاں دی زندگی دی امید نوں توڑ سکدا اے۔ (زبور 91:1، 2، 7-10) اوہ سانوں ایسے کماں توں خبردار کردا اے جیہڑے ساڈی صحت لئی نقصان دہ نیں تے جنہاں دی وجہ توں اَسی اپنی خوشی گنوا سکنے آں۔ بے شک یہوواہ خدا سانوں زندگی گزارن دی سب توں چنگی راہ وکھاؤندا اے۔—زبور 73:27، 28؛ یعقوب 4:4، 8 نوں پڑھو۔