Peidek kan en Paipel Pasapengla
Ia duwe, pelien lamalam koaros kin wauneki Koht?
Ni omw kin rongorong nuhs en sampah, ele ke kin tehk me soahng suwed kan kin ekei pak wiawi pwehki pelien lamalam akan. Kaidehn pelien lamalam koaros tepisang rehn Koht mehlelo. (Mad. 7:15) Ni mehlel, pali laud en tohnsampah mi pahn manaman en me suwedo.—Wadek 1 Sohn 5:19.
Ahpw, Koht kin ketin tehk aramas akan me kin uhdahn poakohng dahme mwahu oh mehlel. (Sohn 4:23) Koht kin ketin luke soangen aramas pwukat pwe ren sukuhlki padahk mehlel sang sapwellime Mahsen, Paipel.—Wadek 1 Timoty 2:3-5.
Ia duwen omw kak esehda pelien lamalam me mehlel?
Siohwa Koht kin ketin kaminiminpene aramas akan sang soangsoangen pelien lamalam kan sang ni eh kin ketin kasukuhliong irail padahk mehlel oh pil ketin padahkihong irail en poakohng emenemen. (Maika 4:2, 3) Eri ke kak esehda irail kan me kin kaudok ni mehlel sang ni mwomwen arail kin nsenohki emenemen.—Wadek Sohn 13:35.
Siohwa Koht ketin kaminiminpene soangsoangen aramas akan sang ni eh ketin doadoahngki kaudok mehlel.—Melkahka 133:1
Pwoson en tohnkaudok mehlel kan oh arail elen mour kin poahsoankihda Paipel. (2 Timoty 3:16) Re pil kin wauneki mwaren Koht. (Melkahka 83:18) * Oh re kalohki duwen Wehin Koht me ihte koapworopwor ong tohnsampah. (Daniel 2:44) Re kin alasang Sises sang ni arail mweidohng arail “marain en sansal” oh sang ni arail wiewia mwahu ong mehn mparail kan. (Madiu 5:16) Eri kitail kak esehki Kristian mehlel kan sang ni arail kin kalohkla ni imwen aramas akan pwe ren ehukihong irail rongamwahu en Wehin Koht.—Wadek Madiu 24:14; Wiewia 5:42; 20:20.
^ Nan Kawehwehpen Lepin Mahsen kan nan Pwuhk Sarawi ni Mahsen en Pohnpei: “KAUN-O—Nan kawehwe wet lepin mahsen lepet wiliandi Iahweh, mwaren [Koht] ni mahsen en Ipru.”
