07 CAJ YACHACUY
¿Imanoraj Jehová?
Jehovapita parlarga, ¿ima ninquimanraj Paypita? ¿Ninquimanchuraj pipitapis más poderniyoj cashganraycur noganchipita alapa carucho caycashganta? ¿O lapanta puedej carpis cuyacuyniynaj cashganta? Diospa Palabran wilamanchimi Pay imano cashganta, y jucninchi jucninchipäpis yarpachacushganta.
1. ¿Imanirtaj Diosta ricanchichu?
Bibliaga nin: ‘Tayta Diosga espïritumi caycan’ (Juan 4:24). Jehovaga manami aychayojchu ni tuluyojchu, sinoga juc espiritumi. Payga cieluchomi cawan, chaymi ricayta puedinchichu.
2. ¿Ima nishwantaj Jehovapita?
Jehovata mana ricarpis, Pay imano cashganta yachacushpanchega cuyashunmi y rasunpa amigunchitano ricaycäshun. Bibliaga nin: “TAYTA DIOSGA cuyan allita rurajtami. Pay munashannölla cawajcunataga manami gonganchu” (Salmo 37:28). Aumi, payga “ali shongu y cuyapäcoj” carmi nacaycajcunata yanapan (Santiago 5:11). “Jucha rurashganpita laquicojcunataga TAYTA DIOS cuyapanmi. Ima ruraytapis mana camäpacujcunata paymi yanapan” (Salmo 34:18). Öraga rurayninchicunawan Jehovapa shongunta cushichishwan o laquichishwan. Chaymi mana alicunata rurashpanchega laquircachishwanmi Diosninchita (Salmo 78:40, 41). Pero ali cajcunata rurarga Jehovapa shonguntaga cushichishunmi (leiriy Proverbios 27:11).
3. ¿Jehová cuyamanchichuraj o mana?
Taytalanchi Jehovaga amatar cuyacojmi. Chaymi Bibliaga “Diosga cuyacojmi” nin (1 Juan 4:8). Jehová cuyamashpanchi imaycatapis camashga y Palabran Bibliatapis gomashcanchi (leiriy Hechos 14:17). Yarpay imano ruraycalämashganchita: tucuy niraj colurcunata ricanchi, mishqui micuycunata yawarcur ‘achalau’ ninchiraj y musicatapis wiyarcur cushicurcunchiraj. Payga cushi cushila cawananchitami munan.
SHUMAJ YACHACURCUNAPAJ
Yachacushun Jehová imanopataj imaycatapis ruran y tantiarcushun Pay imano Dios cashgantapis.
4. Diosga espíritu santunwanmi imaycatapis ruran
Noganchicunaga maquinchiwanrämi imaycatapis ruranchi. Jehovaga espíritu santunwanmi lapanta ruran. Bibliaga manami ninchu espíritu santo juc runa cashganta, sinoga yachachicun Diospa podernin cashganta. Leipäcuy Lucas 11:13 y Hechos 2:17 y caycunapita parlapacäriy:
-
Espíritu santunta Diosta mañacuptinchega Payga gomäshunmi. Chauraga, ¿ninquimanchuraj espíritu santo juc runa cashganta o Diospa poderninchuraj? ¿Ima ninquitaj?
Jehovaga espíritu santunwanmi imaycatapis ruran. Leipäcuy Salmo 33:6 y 2 Pedro 1:20, 21 y caypita parlapacäriy:
-
¿Imacunatataj Jehová rurargan espíritu santunwan?
5. Jehová imano cashganga cushicuypämi
Moisesga Diostami cuyaj, chaymi payga imano cashganta musyayta munargan. Jehovata cayno nergan: “Imata yarpashgayquitapis wilaycalämay. Chaynöpami cuyapämashgayquita musyashaj” (Éxodo 33:13). Y Jehovanami tantiachergan pay imano cashganta. Leipäcuy Éxodo 34:4-6 y caycunapita parlapacäriy:
-
¿Imano Dios cashgantataj Jehovaga Moisesta wilapargan?
-
¿Ima ninquitaj Jehová imano cashganpita?
6. Jehovaga runacunatami cuyan
Unay Diospa marcan Israelga, Egipto naciuncho esclavucunami cargan. Nacarcaycajta ricarga, ¿imanotaj Jehová ricacurgan? AUDIUTA wiyar leej cajta gatipäcuy, o leipäcuyla Éxodo 3:1-10. Nircur caycunapita parlapacäriy:
-
Wiyashgayquino Jehovaga laquicunmi runacuna nacaptin, ¿imataj Jehovapita yachacunqui? (7 y 8 versiculucunata ricäriy).
-
¿Rasunpachuraj Jehová runacunata yanapayta munan? ¿Chayta rurananpäga calpan caycanchuraj? ¿Imanirtaj chayta ninqui?
7. Camashgancunata ricarmi Jehová imano cashganta musyanchi
Jehová imano cashganta musyanapäga lapan camashgancunapita yachacushwan. VIDEUTA ricapäcuy. Nircur leipäcuy Romanos 1:20 y caypita parlapacäriy:
-
Jehová camashgancunata ricarga, ¿imataj paypita yachacunqui?
WAQUINCUNA NIPÄCUN: “Diosga wayrano may chaychopis caycan, paytaga quevä reguiytapis puedinchimanrächu”.
-
¿Gampis chaynochu yarpanqui?
-
¿Imanir?
ICHIC YACHACUY
Jehovaga juc espiritumi, ricaytaga puedinchichu. Imano cashganga cushicuypämi, imapitapis amatar cuyacojmi payga.
Yarpänapaj
-
¿Imanirtaj Jehovata ricayta puedinchichu?
-
¿Ima nishwantaj espíritu santupita?
-
Wilacamuy Jehová imano cashganpita
MASLATA YACHACUNAYQUIPAJ
Jehovata shumaj reguinayquipaj imano cashganpita yachacuy.
Tantiarcuy imanir Jehovaga may chaychopis mana caycashganta.
“¿Diosga may chaychopis caycanchuraj?” (jw.org paginapita yachachicuy)
Ricäriy imanirtaj Biblia espíritu santupita parlaptenga, Diospa ‘maquin’ yupay caycashganta.
“¿Ima nishwantaj espíritu santupita?” (jw.org paginapita yachachicuy)
Juc gapra runa manami yäracurganchu Dios paypaj yarpachacushganta. Ricäriy imataj yanapashga Diosman creinanpaj.
“Cananga waquincunata yanapänäpaj munaycö” (Wilacamoj, 1 octubre quilla, 2015)
