¿Jasche kbʼixik che ri Jesús are ri uKʼojol ri Dios?
Ri kuya ubʼixik ri Biblia
Ri Biblia kubʼij che ri Jesús are «ri uKʼojol ri Dios» (Juan 1:49). Ri tzij «uKʼojol ri Dios» kraj kubʼij che are ri Dios xyoʼw ri ukʼaslemal, y che are xbʼanow ri Jesús (Salmo 36:9; Apocalipsis 4:11). Ri Biblia kubʼij taj che ri Dios xux jun achi rech xkunik xkʼojiʼ ralkʼwal.
Xuqujeʼ ri Biblia kubʼij che ri ángeles e ralkʼwal ri Dios (Job 1:6). Xuqujeʼ kubʼij che ri nabʼe achi Adán, «ralkʼwal ri Dios» (Lucas 3:38). Are kʼu ri Biblia kubʼij che ri Jesús nim ubʼanik, rumal che are ri nabʼe xbʼan chkiwach konojel ri nikʼaj chik y xaq xiw ri areʼ xbʼan rumal ri Jehová.
¿La xkʼojiʼ ri Jesús pa ri kaj are chiʼ majaʼ kpe cho ri uwach Ulew?
Xkʼojiʼk. Are chiʼ majaʼ kkʼojiʼ cho ri uwach Ulew ri Jesús are jun uxlabʼal pa ri kaj. Ri areʼ xubʼij: «In qajinaq kʼu uloq pa ri kaj» (Juan 6:38; 8:23).
Ri Jesús are ri nabʼe che xbʼan rumal ri Dios. Ri Biblia kubʼij chrij ri Jesús:
«Areʼ ri ukʼojol areʼ ri kʼo nabʼe chuwach ronojel ri bʼanom» (Colosenses 1:15).
«Are ri nabʼe chuwach are taq chi’ ri Dios xukʼiyisaj xutik ri uwach ulew» (Apocalipsis 3:14, Ri Tyoxlaj Wuj).
Ri Jesús ojer chik kʼolinaq y are xtzʼaqatisan ri profecías riʼ (Miqueas 5:2; Mateo 2:4-6).
¿Jas tajin kubʼan pa ri kaj are chiʼ majaʼ kpe cho ri uwach Ulew?
Kʼo jun nim uchak pa ri kaj. Ri Jesús xchʼaw chrij wajun chak are chiʼ xubʼij che ri uTat «chnimarisaj la nuqʼij [junam] rukʼ ri juluwem ri xkʼojiʼ wukʼ, are taq kʼa majoq ri uwach ulew» (Juan 17:5).
Xtobʼan rukʼ ri uTat are chiʼ xkibʼan ri e jastaq. Ri Jesús xchakun rukʼ ri Dios (Proverbios 8:30). Ri Biblia kubʼij: «Rumal kʼut areʼ xebʼan konojel ri jastaq ri e kʼo pa ri kaj xuqujeʼ ri e kʼo cho ri uwach ulew» (Colosenses 1:16).
Rumal ri Jesús, ri Dios xeʼubʼan ronojel ri jastaq, ri ángeles xuqujeʼ ronojel ri kʼo pa ri kajulew (Apocalipsis 5:11). Ri tobʼanik che xuya ri Jesús che ri Dios kjunamataj rukʼ jun arquitecto y jun constructor. Ri arquitecto are kbʼinik jas kbʼan che ri chak are kʼu ri constructor are kbʼanowik.
Ri Tzij. Ri Biblia kubʼij «ri Tzij» che ri Jesús chiʼ majaʼ kpe cho ri uwach Ulew (Juan 1:1). Kraj kubʼij che ri Dios xukoj ri uKʼojol rech xuqʼaxej ri utzij chke ri ángeles.
Ri Jesús xuqujeʼ xuqʼaxej ri utzij ri Dios chke ri winaq. Ri Jehová xukoj ri Jesús are chiʼ xuya taqanik chke ri Adán pa ri kotzʼiʼj Edén (Génesis 2:16, 17). Weneʼ are ri Jesús xkʼamow kibʼe ri israelitas pa ri desierto y weneʼ are ri chʼabʼal che xkito are chiʼ xyaʼ taqanik chke (Éxodo 23:20-23). a
a Ri Dios xaq xiw ta ri Jesús ukojom che uqʼaxexik ri utzij. Jun kʼutbʼal, ri Jehová xeʼukoj nikʼaj chi ángeles che uyaʼik ri Taqanik chke ri israelitas (Hechos 7:53; Gálatas 3:19; Hebreos 2:2, 3).
Wene' xuquje' utz kawilo
E KʼUTUNEM RECH RI BIBLIA NIM KIBʼANIK
¿La are Dios ri Jesús?
¿La are Jesús ri Dios kʼo ronojel ukʼuʼinem? ¿O are e kebʼ winaq che e junam taj?
E KʼUTUNEM ESAM PA RI BIBLIA
Chawilaʼ jas ubʼanik wajun etaʼmanik riʼ
Chakʼamaʼ jun etaʼmanik re ri Biblia che tojom taj chnojimal katbʼe che rilik.