JESÚS ashca cuti Diosta mañanamanda yachachica. Panda religionda pushaj judioguna Jesús punzhaunai “ñambi rayais” mañanuj anuca. ¿Imangaj ruranuj aca? “Runauna paigunara ricungaj”. Paiguna sirtu quirishcara ricunuchu. Ashca paigunamanda Yaya Diosta suni mañaira ruranuca chillarara chillarara rimasha “ashca cuti rimashcamanda ‘Uyai tucuni’, nisha” iyanuca (Mateo 6:5-8). Shinajpi Jesús yachachica chi rurashcauna yangamanda ashcara, shina yachachica Yaya Diosta mañaushcai ima mana rurana ashcara. Jesús mas ansa yachachica.

Jesús yachachica ñucanchi Yaya Diosta mañashcauna ricuchina an Diospa shuti ahuayachishca achu munashcara, paihua mandana shamuchu, pai munashcauna pactarichu. Shinallara yachachica ñucanchi Jehovara mañashcaunai mañana ushanchi ñucanchi ministishcaunaras (Mateo 6:9-13; Lucas 11:2-4). Yanapangaj ejemplogunahua yachachica ñucanchi mañashcaunara Jehová uyachu ana anchi mansu shunguyuj, chapaisiqui shunguyuj, fe charinaras (Lucas 11:5-13; 18:1-14). Caita paihua quiquin ejemplohua ricuchica (Mateo 14:23; Marcos 1:35).

Cai yachachishcauna Jesusta catijcunara yanapaca paiguna quiquin mañanara ali rurangaj. Jesús pai huañuna tutai shu valishca yachachishcaunara yachachica Diosta mañanamanda.

Jesús intiru tuta paita catijcunara animachisha aca. Chi ratui shu mushuj yachachinara yachachingaj ali aca, pai nica: “Ñuca ñambi ani, sirtu shimi ani, causais ani. Mana pihuas Yayajma shamunzhu mana ñucahua shamujpi”. Huasha animachij shimiunara rimaca: “Canguna tucui imaras Yayara mañajpi ñuca shutii, cai tucuira rashami, Yaya Churimanda sumajyachishca angaj. Canguna imaras ñuca shutii mañajpi, rashami”. Cuintarinara tucuringaraushcai rimaca: “Cuna hurascama imaras mana mañashcanguichi ñuca shutii. Mañaichi, cui tucunguichimi, canguna cushi pactaringaj” (Juan 14:6, 13, 14; 16:24).

¡Cai Jesús rimashcauna ashca valishca anuca! Shu Bibliamanda diccionario caimanda rimasha nin cai “shu valishca turcai aca Diosta mañanamanda”. Jesús mana rimacachu chi timpumanda tucui oracionda rurashcauna paita mañashca achu Diosta randimanda. Maspas shu mushuj ñambira pascauca Yaya Diosma mayanllayangaj.

Dios tucui huras uyashca chuyaj shunguhua paita sirvijcunara (1 Samuel 1:9-19; Salmo 65:2). Jehová Israel shu pacto rurashca timpumanda mañashcauna Dios uyachu munajcuna, intindina anuca Israel Jehová ajllashca llacta ashcara. Huasha Salomón timpumanda paiguna chasquina anuca, templo Jehová ajllashca lugar aca sacrificiogunara rurangaj (Deuteronomio 9:29; 2 Crónicas 6:32, 33). Shinajpi casna tunu adurana mana huiñaigama aca. Apóstol Pablo quillcashca cuinta Israelma cushca Ley, templo huasii sacrificiora rurashcauna “shamuj aliunamanda llandura charin, shina ashas chigunamanda quiquin ricurinara mana charinzhu” (Hebreos 10:1, TNM, 2). Chi llandu sirtu pasanara ricuchina aca (Colosenses 2:17). 33 huatamanda ña Moisesma cushca Leyra mana catina acanchi Jehovahuaj amigo angaj. Maspas Ley rimashca cuinta Jesusta casuna anchi (Juan 15:14-16; Gálatas 3:24, 25).

Jesús ali ruranara ricuchica Yaya Diosma mayanllayangaj. Shu yapa ushaira charij amigo cuinta aca, ñambira pascaca Yaya Dios ñucanchi mañashcaunara uyasha cutipachu. ¿Imarasha Jesús caita ñucanchimanda rurana ushan?

Uchayuj asha pagarisha imaras rurashcauna ñucanchi uchara mana quichuna ushan, shinallara mana shu dirichu charinchi Jehová santu Dioshua amigo angaj (Romanos 3:20, 24; Hebreos 1:3, 4). Chiraigu Jesús pai ucha illaj causaihua runauna uchamanda pagaca (Romanos 5:12, 18, 19). Jesús sacrificiora rurashcai quirisha paihua shutii mañasha “Diospa ñaupajpi icunara charinchi” shinallara chuyaj ana ushanchi (Efesios 3:11, 12).

Jesús shutii mañashcai quinsa cosasgunai quirinchi Jesús rurashcara Diospa munaira pactachingaj: 1) “Diospa Burigu” an, paihua sacrificiomanda uchaunara quishpichina ushan. 2) Jehová cuti atachishca huasha cuna “sacerdote atun apu” asha yanapana ushan. 3) Jesusllami “ñambi” an Diospa mayanllangaj oracionda rurasha (Juan 1:29; 14:6; Hebreos 4:14, 15).

Jesús shutii mañasha paillarara ahuayachinchi. Cai yapa ali an, Jehová munanmi “Jesuspa shutii tucui cungurinauchu. [...] Shinallara tucui shimi rimachu, ‘Jesucristo señormi,’ nisha, Yaya Diosta ahuayachingaj” (Filipenses 2:10, 11). Mas yapa valishca an Jesús shutii mañana Jehová Diosta ahuayachingaj imasna Jehová paihua Churira cuca ñucanchimanda (Juan 3:16).

Jesús valishca puistura charishcara ricuchingaj Biblia huaquin titulogunara cun. Cai tituloguna yanapanun ricungaj ñaupa, cuna, shamuj punzhai Jesús rurashcauna ñucanchira yanapashca (Ricungui “ Jesús valishca rurashcauna” nishca partii). Jesusta “tucui shutiunamanda yali atun shutira paita cuca”, tucui mandanara cushca ahua pachai allpais (Filipenses 2:9; Mateo 28:18). a

Ña ricushca cuinta ñucanchi mañashcaunara rurana anchi Jesuspa shutii Jehová uyangahua (Juan 14:13, 14). “Jesús shutii” mañashcauna mana caran cuti ruranamandalla rurana anchi. ¿Imarasha?

Ricushun shu ejemplora. Shu catujmanda shu cartara chasquishcai puchucai cartaibi rimashca tucuringaj “atentamente” nisha, ¿cai catuj runa quillcashca shungumanda quillcashcachu anga, yangamandachu quillcashca an? Jesús shutira mañashcaunai utilizashca yanga atentamente nishca quillcashcallachu cuinta mana anzhu. Ñucanchi “mana saquisha” mañashca tucui shungumanda mana chillarara rimasha mañana anchi (1 Tesalonicenses 5:17; Salmo 119:145).

¿Imasnara Jesuspa shutii rimashcara ali utilizashun? Iyarishun Jesús imasna ashcara. Iyarishun pai rurashcai pai ñucanchimanda rurana munashcais. Ñucanchi mañashcaunai Jehovara pagarachusha ahuayachishunchi paihua Churira alira utilizashcamanda. Shina rurasha Jesús rimashcai mas quirishun: “Tucui imaras Yayara mañajpi ñuca shutii, pai cungami” (Juan 16:23).