Llullakuyqa imapas mana cierto kasqanta yachachkaspa niymi. ¿Haykallapipas llullakurqankichu? a . . . Diosta kuyaq wakin runakunapas llullakurqakum. Hukninpa sutinmi Pedro, paymantam Bibliapi willakun, yaqapaschá reqsichkanki. Jesuspa 12 apostolninkunamanta huk kaqninmi karqa. ¿Munawaqchu yachayta imanasqa llullakusqanmanta? Uyariy kay willakuyta.

Jesusta presocharuspankum sacerdotekunapa jefenpa wasinman aparunku. Chawpi tuta pasayñam kachkan. Pedroqa wasipa pationmanmi mana pipapas reqsisqallan yaykurun hinaspam nina patanpi qonikuchkan. Sirvientam reqsiruspan nin: “Qampas [. . .] Jesuswanmi purirqanki”, nispa. Pedrom ichaqa mancharikuspan negarqa.

Tumpa unayniqmantam huk sirvientapas nin: “Kay runapas [. . .] Jesuswanmi purichkarqa”, nispa. Kaqmantam Pedroqa negakun. Chaymantam hukkunapas asuykuspa ninku: ‘Qampas paykunamanta kaqmi kanki’, nispa.

Pedroqa mancharisqam kachkan, hinaspam kimsa kaq kutipipas llullakuykun: “Manam chay runataqa reqsinichu”, nispa qaparin. Chay ratollam gallo waqaramurqa. Jesusñataqmi Pedrota qawarin, hinaptinmi Pedroqa yuyarirun: “Manaraq gallo waqachkaptinmi kimsa kutikama negawanki”, nispa Jesuspa nisqanta. Pedroqa aminankama waqaspanmi pesakun.

¿Qamtapas chayna pasasunkimanchu? . . . Piensay escuelaykipi estudiaqmasikikuna Jehova Diospa testigonkunamanta kayna nisqankuta: “Paykunaqa manam banderataqa saludankuchu”, “Manam nacionninkupaq peleayta munankuchu”, “Manam cristianokunachu, chaymi mana Navidad fiestatapas ruwankuchu”, nispa.  Chaymantañataq huknin estudiaqmasiki qawariykususpayki nisunkiman: “Qamqa Jehova Diospa testigonmi kanki, ¿aw?”, nispa. ¿Ima niwaqtaq? . . .

Preparakunaykim chayna pasasuptiki allinta contestanaykipaq. Pedroqa manam preparasqachu karqa, chaymi hikutaptinku llullakurqa. Ichaqa, chay ruwasqanmanta pesakuptinmi Diosqa pampachaykurqa.

Kunanñataq rimasun Ananiasmanta, payqa Pedropa tiemponpim kawsarqa. Paypas llullakurqam, hinaptinmi señoran Safirapas chay ruwasqanta allinpaq hapirqa. Diosmi ichaqa mayqenninkutapas mana pampacharqachu. Qawasun imanasqa.

Chunka punchawñam pasarun hanaq pachaman Jesuspa risqanmantaqa. Yaqa 3.000 runakunam Jesusmanta uyarispanku Jerusalenpi bautizakurunku. Wakinkuqa karu llaqtakunamantam hamurunku Pentecostes fiestaman hinaspam qepaytaraq munanku mosoq iñiyninkumanta yachanankupaq. Chaymi Jesuspa wakin qatiqninkunaqa qollqenkuta qonku necesitaqkunaman.

Ananiaswan señoranmi chakrankuta rantikurunku chayllaraq bautizakuqkunaman qollqeta qonankupaq. Chay qollqeta apostolkunaman qospanmi Ananiasqa nin, chaynallapi rantikusqankuta, ichaqa manamá ciertochu karqa, wakintam puchurachikunku. Jehova Diospa yanapakuyninwanmi pedroqa musyarun llullakusqanta hinaspam nin: “Diostam llullakurunkiqa, manam runakunatachu”, nispa. Chaypim Ananiasqa qonqaymanta wañurun. Yaqa kimsa hora pasaytañataqmi señoran chayaramun. Manam yacharqachu qosanwan ima pasasqantapas hinaspanmi paypas llullakuykun, chaymi chayllapi wañukun.

¡Suma-sumaq yachachikuymi! Haykapipas cheqap kaqta rimaymi ancha allinqa, chaytam llapanchik ruwananchik. Ichaqa llapanchikmi pantaq kanchik, aswanraqmi mozo-sipaskunaqa. ¿Manachu kusikunki Jehova Dios kuyasusqaykimanta hinaspa Pedrota hina pampachasunaykimanta yachaspayki? . . . Haykapipas, yuyarinchikmi cheqap kaqta rimananchikmanta. Sichum haykapipas llullakuruspaqa, Jehova Diostam ruegakunanchik pampachawananchikpaq. Chaytachá Pedropas ruwarqa, chaymi Diosqa uyariykurqa. Yapamanta manaña llullakunapaq kallpanchakuptinchikqa, ñoqanchiktapas Diosqa pampachawasunmi.