Diciembre killapiqa enteron Pachapim tukuyta ruwanku otaq dibujanku Jesus naceruptin animalpa mikunan artesapi imayna siriykachisqa kasqanta. ¿Jesusqa wawallaraqchu kunankama kachkanman? . . . * Ichaqa Bibliapa yachachisqanman hinam paytaqa yuyarinanchik. ¿Imaynata? Yachasunyá Belen llaqtapa hichpanpi oveja michiqkunata huk tutapi ima pasasqanmanta.

Oveja michiqkunamanmi qonqayllamanta huk angel rikuriykurqa kaynata nispa: “Salvaqnikichikmi nacerapusunkichik [...]. Payqariki Cristo Señormi”, nispa. Chaymantapas nirqam: ‘Wawachatam tarinkichik animalman qarana artesapi siriykachisqata’, nispa. Hinaptinmi achka angelkuna rikuriykamuspanku Diosta alabarqaku.

¿Imaniwaqtaq angelkuna Dios alabasqankuta uyarispaykiqa? . . . Oveja michiqkunaqa ancha kusisqam tarikurqaku. Chaymi nirqaku: “Belen llaqtaman rispanchikyá yachamusunchik Señorpa imam willachiwasqanchikmanta”, nispa. Chayman chayaruspankum tarirurqa ‘Mariatawan Joseyta chaynataq uywaman qarana artesapi siriykachisqa wawatapas’

Chaymanta qepallatam huk runakunapas Belenman chayarqaku. Ima pasasqanmanta chay runakunaman oveja michiqkuna willaptinkum anchata kusikurqaku. Diosta kuyaqkunaqa paykuna hinam sientekunchik. ¿Munawaqchu yachayta Jesus naceruptin chay runakuna imanasqa kusikusqankumanta? . . . Chaypaqqa puntatam yachananchik Maria solterallaraq kaptin ima pasasqanmanta.

Gabriel sutiyoq angelmi Mariaman watukuspan willarqa wawayoq kananmanta. Chaymantapas willarqam chay wawanqa ancha reqsisqa chaynataq ‘Diospa Churin’ kasqanmanta, rey kaspan gobernante kananmanta chaynataq chay gobiernon wiñaypaq kananmantapas.

 Mariaqa manaraqmi pi qariwanpas puñurqaraqchu, chaymi yachayta munarqa imayna wiksayakunanmanta. Chaymi Gabriel nirqa: ‘Diospa atiyninmi puyu hina pampaykusunki. Chayraykum Diospa sapaqchasqan naceq wawapas sutichasqa kanqa Diospa Churinwan’, nispa. Jehova Diosqa milagrota ruwaspanmi Churinpa vidanta Mariapa wiksanman churarqa paypa wiksanpi wiñananpaq.

¿Rikurqankichu Jesuspa nacimienton ruwasqankupi “reyes magos” nisqanku kimsa runakunata? . . . ¿Pikunataq paykunaqa karqaku? . . . Chay runakunaqa karqaku suerte qawaqkunam otaq layqakunam, paykunaqa manam Diospa agradonpaqchu kawsarqaku. Jesusta reqsinankupaq chayaptinkum ima pasasqanmanta yachasun. Bibliam nin: “Wasiman yaykuykuspankuñataqmi rikuykurqaku wawatawan otaq warmachatawan maman Mariata”, nispa. Chay runakunaqa manam animalpa mikunan artesapi siriykachisqatachu Jesustaqa tarirqaku, aswanqa yuyaychayoqtañam chaymantapas Joseywan Mariaqa wasipiñam karqaku.

¿Imataq yanapanman karqa Jesusta tarinankupaq chay “reyes magos” nisqanku runakunata? . . . ‘Lucero’ kaqlla achkipa kanchayninta qatispankum tarirurqaku. Ichaqa Belenman manaraq chayachkaptinkum chay achkiqa Jerusalenpi rey Herodesman guiarqa. Bibliam willakun wawallaraq Jesusta wañuchinanpaq rey Herodes maskasqanmanta. Piensariy: ¿pitaq chay kanchaywan, chay runakunata guianman karqa Herodesman chayanankupaq? . . . Manam Dioschu; Satanasmi chayta ruwarqa.

Jesusqa wawallaraq kasqanpi piensanankutam Satanasqa munan. Ichaqa yuyariy Mariaman angelpa willasqanta, payqa nirqam Jesusqa rey kananmanta chaynataq gobiernon haykapipas mana tukunanmanta. Jesusqa hanaq pachamanta kamachimuspanmi Diospa enemigonkunata chaylla chinkachinqaña. Payqa atiyniyoq rey kasqanpim piensananchik chayna kasqanmantataqmi hukkunamanpas yachachinanchik.