17 YACHACHIKUY
¿Imaynan Jesús?
Jesuspa vidanmanta imachus yachachisqanmantawan astawan yachasunchis chayqa, astawanmi payta Taytantapas munakusunchis. ¿Imaynan Señor Jesús? ¿Imatan ruwasunman pay jina kananchispaq?
1. ¿Imakunapin Jesús Taytan jina?
Jesusqa mana yupay atiy watakunañan janaq pachapi Papanwan tiyashan, chaymi payqa Taytan jina munakuq; Taytan jinan piensanpas ruwanpas (leey Juan 5:19). Chaymi Jesusqa juj kutin nirqan: “Pipas noqata rikuwaqqa janaq pacha Taytatapas rikullantaqmi”, nispa (Juan 14:9). Chhaynaqa, sichus Jesusta allinta reqsinki chayqa, Taytantapas allintan reqsillankitaq. Imaynan Jesusqa anchatapuni runakunata khuyapayarqan, chhaynallataqmi Jehová Diospas khuyapayawanchis, munakuwanchis ima.
2. ¿Imaynapin yachanchis Jesús Taytanta munakusqanta?
Jesusmi nirqan: “Kay pacha runakuna Taytayta munakusqayta yachanankupaqmi noqaqa Taytaypa kamachiwasqanman jinapuni ruwashani”, nispa (Juan 14:31). Kay pachapi kashaspaqa tukuy imapin Jesusqa Taytanta kasukuq, chaywanmi rikuchirqan payta maytapuni munakusqanta. Chaymantapas Jesusqa may kusisqan Taytanmantaqa willaq; kusikuqmi Taytanwan amigontin kanankupaq jujkunata yanapaspa (Juan 14:23).
3. ¿Imakunapin Jesús rikuchirqan runakuna munakusqanta?
Bibliaq nisqan jina, Jesusqa “runakunatan anchata munakun” (Proverbios 8:31). Payqa runakunata munakuspan paykunata kallpacharqan, yanaparqan ima; runakunata khuyapayaspan milagrokunatapas ruwarqan (Marcos 1:40-42). Jesusqa llapa runatan munakuywan qhawariq, manataqmi pimanpas sayapakuqchu. Payqa kallpachariq jinan llapa uyariqninkunata rimapayaq. Chaymantapas Jesusqa lliu runakunata munakusqanraykun sufrirqan, wañurqan ima. Chaywanpas Jesusqa kamachikuyninkunata kasukuqkunatan astawanqa munakun (leey Juan 15:13, 14).
ASTAWAN YACHASUNCHIS
¿Imaynan Jesús? ¿Imaynapin pay jina munakuq, qoykukuq kasunman? Chaykunamantan kunan astawan yachasunchis.
4. Jesusqa anchatan Taytanta munakun
Imayna kausasqanwanmi Jesusqa rikuchirqan imas Diosta munakuy chayta. Leeychis Lucas 6:12; Juan 15:10; 17:26 textokunata. Sapanka textota leesqaykichis qhepaman jamuq tapuykunaman jina parlariychis:
-
¿Imatan Jesús ruwarqan Taytanta munakuspa? ¿Imatan noqanchispas ruwananchis?
Jesusqa anchatan Taytanta munakuq, chaymi sapa kutillan paymanta mañakuq.
5. Jesusqa llakipi tarikuqkunamantan llakikun
Jesusqa jujkunaq allinnintan ñaupaqtaqa maskhaq, chaymi sayk’usqaña kashaspapas jujkunata yanapaq, kallpachaq ima. Leey Marcos 6:30-44 textota, jinaspa jamuq tapuykunaman jina parlariychis:
-
Chaypi leesqanchisman jina, ¿imatan Jesús ruwarqan runakunamanta llakikuspa? (Qhawaychis 31, 34, 41, 42 versiculokunata).
-
¿Imaraykun Jesús chay runakunata yanaparqan? (Qhawaychis 34 versiculota).
-
Jesusqa Taytan jinataq chayqa, ¿imaynataq Taytan Jehová Diosri kanman?
-
Noqanchisri, ¿imaynatan Jesús jina jujkunaq allinninta maskhasunman?
6. Jesusqa qoykukuqmi
Jesusqa manan qhapaq runachu karqan, chaywanpas qoykukuqmi karqan. Noqanchispas chhaynan kananchis. Leeychis Hechos 20:35 textota, jinaspa jamuq tapuyman jina parlariychis:
-
Jesuspa nisqan jina, ¿ima ruwaypin aswan kusikuy kan?
VIDEOTA qhawaychis, jinaspa jamuq tapuyman jina parlariychis:
-
¿Imaynatan qoykukuq kasunman manaña askhachu imanchispas kaqtin?
¿Yacharqankichu?
Bibliaq nisqan jina, Jesuspa sutinpin Diosmanta mañakunanchis (leey Juan 16:23, 24). Chaywanmi rikuchisunchis noqanchisrayku Jesuspa imachus ruwasqanmanta agradecekusqanchista. Payqa Jehová Diospa amigon kananchispaqmi noqanchisrayku wañurqan.
WAKIN RUNAKUNAN NINKU: “Diosmanqa manan imapas qokunchu runakunaq ñak’arisqanqa”, nispa.
-
Jesusqa Taytan jinataq chayqa, ¿imaraykun nisunman “Jehová Diosqa munakuwanchismi” nispa?
IMATAN YACHAMURQANCHIS
Jesusqa Jehová Diostapas runakunatapas anchatan munakun. Jesusqa Taytan jinataq chayqa, payta astawan reqsispan Jehová Diostapas astawan reqsisunchis.
Yuyarisun
-
¿Imaynatan Jesús jina Jehová Diosta munakusqanchista rikuchisunman?
-
¿Imaynatan Jesús jina runakuna munakusqanchista rikuchisunman?
-
¿Jesuspa imayna kasqanmi masta gustasunki?
ASTAWAN YACHANAYKIPAQ
¿Ima ruwaykunapin Jesús jina kasunman? Chaymantan kaypi yachanki.
“Jesús jinan kananchis” (Jesusmi ñanpas, cheqaq kaqpas, kausaypas, 317 página)
¿Imaraykun Jesuspa sutinpipuni mañakunanchis? Chaymantan kay qelqapi yachanki.
“¿Imaraykun Jesuspa sutinpi mañakunanchis?” (Qhawaq, 2008 watapi 1 febrero)
¿Willanchu Biblia imayna rijch’ayniyoqchus Jesús karqan chayta? Chaymantan kaypi yachanki.
“¿Imayna rijch’ayniyoqmi Jesús karqan?” (jw.org paginapi leey)
¿Imaynatan Jesús warmikunata rikuq? ¿Imaynatan noqanchispas rikunanchis? Chaymantan kaypi yachanki.
“Diosqa sumaqtan qhawarin warmikunata” (Qhawaq, 2012 watapi 1 octubre)
Astawan yachanaykipaq
SAPA KUTILLA TAPUKUSQANKU
¿Imaynatan Jehová Diospa testigonkuna Bibliamanta yachachinku?
Jehová Diospa testigonkunawan Bibliata estudiaspaqa, munasqayki Bibliawanmi estudiawaq. Chaymantapas llapa familiaykita amigoykikunata iman invitawaq. Chayqa manan qolqepaqchu.
