Génesis 6:1-22
6 Gentecunaca ushashcatami* cai alpapica mirai callarirca. Y chai gentecunaca ushicunatami* charirca.
2 Angelcunaca* chai huarmicuna* juyaillagucuna cashcatami ricui callarirca. Chaimi mashna munashca huarmicunahuan cazarai callarirca.
3 Chaita ricushpami Jehová Diosca cashna nirca: “Ñucaca* na para siemprechu gentecunataca aguantajushalla. Porque paicunaca pecadorcunami can. Chaimandami paicunaca solo 120 añostalla causanga”.
4 Taita Dios shina nishca punllacunapica, ñami cai alpapica jatun jatun gentecuna* tiashcarca. Chaicunaca angelcuna* cai alpapi huarmicunahuan pacta puñushpa charishca huahuacunami carca. Chaicunami punda tiempo gentecunapurapica poderoso y famosocuna carca.
5 Cai alpapi gentecunaca ashtahuan ashtahuan nalicuna tucunajujta y paicunapa shungupipash tucui tiempo solo nalicunatalla pensanajujtami Jehová Diosca ricurca.
6 Jehová Diosca cai alpapi gentecunata rurashcamandaca ninandami nali sintirirca,* shungu faquirinshnami sintirirca.
7 Chaimi Jehová Diosca cashna nirca: “Ñuca rurashca gentecunataca cai alpamandami anchuchigrini. Gentecunatapash, na sacha animalcunatapash, llucashpa purij animalcunatapash* y cielopi volaj animalcunatapashmi anchuchigrini. Porque paicunata rurashcamandaca ninandami llaquirini”.
8 Shinapash Noetaca alicachishpami* Jehová Diosca ricurca.
9 Noepa causaica cashnami carca:
Noeca alita ruraj* runagumi carca. Chai tiempo gentecunamandaca diferente y ima culpapash illami carca. Noeca Taita Dioshuanmi* purirca.*
10 Jipacunamanga Noeca quimsa churicunatami charirca. Paicunaca Sem, Cam y Jafet shuticunami carca.
11 Taita Diosca* cai alpa huaglishca cashcata y nalipacha nali ruraicunahuanlla junda cashcatami ricurca.
12 Ari, Taita Diosca cai alpa huaglishca cashcatami ricurca. Cai alpapi gentecunaca nalipacha nalicunami carca.
13 Chaimi Taita Diosca Noetaca nirca: “Tucuilla gentecunata tucuchinatami decidishcani. Porque cai alpaca gentecunapa culpamandami nalipacha nali ruraicunahuanlla junda can. Chaimandami gentecunatapash y causaita charijcunatapash cai alpapica tucuita tucuchigrini.
14 Shinaca ali caspicunahuan* shuj arcata* rurangui. Chai arcapica cuartocunata rurangui. Arcataca canllamanbash y ucumanbash breahuanshnalla pintangui.
15 Arcataca 134 metros de largo,* 22 metros de ancho* y 13 metros de altota* rurangui.
16 Primer piso, segundo piso y tercer pisotami rurana cangui. Arca punchalla cachunga techomanda cazi medio metro* uramanmi ventanata* churana cangui. Arcapica shuj pungutapashmi churana cangui.
17 ”Cutin ñuca partemandaca cai alpa enteropi causana samaita* charijcunata tucuchingapami ushashcata tamiachigrini. Y cai alpapi causaita charijcunaca tucuillami huañunga.
18 Ñucaca canhuanmi shuj tratota* rurajuni. Arcamanga canba churicunahuan, canba huarmihuan y canba jachungunahuanbashmi yaicuna cangui.
19 Shinallata causashpa catichunmi cada laya animalmandaca shuj parejaguta arca ucuman churana cangui. Shuj jari y shuj huarmimi cana can.
20 Cielota volaj animalgucunapash según paicunapa clasemi ishcai ishcai shamunga. Na sacha animalgucunapash según paicunapa clasemi ishcai ishcai shamunga. Y alpata llucashpa purij animalgucunapash* según paicunapa clasemi ishcai ishcai canbaman shamunga y arcaman yaicunga. Shinami paicunaca causashpa catita ushanga.
21 Cutin canba partemandaca, canbash micungapaj y animalcunapash micuchunmi tucui laya micunacunata tandachina cangui”.
22 Chaimi Noeca Taita Dios tucui imata mandashcata rurarca. Taita Dios nishcashnami rurarca.
Notacuna
^ O “pudishcatami”.
^ O “hijacunatami”.
^ Hebreo shimipica “Taita Diospa churicunaca” nijunmi.
^ Hebreo shimipica “gentecunapa ushicuna” nijunmi.
^ Hebreo shimipica “ñuca espirituca” nijunmi.
^ Hebreo shimipica “nefilimguna” nijunmi. Shina nishpaca shujcunata urmachij nijunmi yarin. Glosariopi “nefilim” shimita ricupangui.
^ Hebreo shimipica “Taita Diospa churicuna” nijunmi.
^ O “ninandami llaquirirca”.
^ Shina nishpaca talvez culebracunamanda, lagartijacunamanda, ucuchacunamanda y jurucunamandapashmi parlajun yarin.
^ Hebreo shimipica “paipa ñavipica alimi ricurirca” nijunmi.
^ O “Dios verdadero”. Glosariopi “Dios verdadero” shimita ricupangui.
^ Purirca nishpaca “Taita Diospa voluntadta rurashpa causajushcatami” shina nijun.
^ O “Dios verdadero”. Glosariopi “Dios verdadero” shimita ricupangui.
^ Caipica shuj laya pino quirumandami parlajun yarin.
^ Arcaca shuj jatun y largo caja cuendami carca. Shuj barcoshnami yacupi huambuita ushan carca.
^ Hebreo shimipica “300 codos” nijunmi. Glosariopi “codo” shimita ricupangui. Apéndice B14ta ricupangui.
^ Hebreo shimipica “50 codos” nijunmi.
^ Hebreo shimipica “30 codos” nijunmi.
^ Hebreo shimipica “shuj codo” nijunmi.
^ Hebreo shimipica “tsóhar” nijunmi. Shina nishpaca arca muyundipi shuj ventana tiajushcatami nijun yarin.
^ O “causaita cuj espirituta”. Hebreo shimipica “rúaj” nijunmi. Glosariopi “espíritu” shimita ricupangui.
^ Shina nishpaca talvez culebracunamanda, lagartijacunamanda, ucuchacunamanda y jurucunamandapashmi parlajun yarin.
