Tiempo yalijpica ashtaca ashtaca gentecunami cai alpapica tiai callarirca. Ashtaca gentecunaca nali, millaicunami tucurca. Huaquin angelcunapashmi nali, millaicuna tucurca. Chai angelcunaca jahua cielopi causaita saquishpami cai alpaman shamurca. Chai angelcuna ¿imapa shamushcata yachanguichu? Paicunaca cai alpapi huarmicunahuan cazarangapaj munashpami, jahua cielomanda cai alpaman shamushpa gentecuna shina tucurca.

Chai angelcunaca cai alpapi huarmicunahuanmi huahuacunata charirca. Chai huahuacuna viñashpaca millai nalicuna tucushpami, gentecunata llaquichirca. Ama shina catichunmi Jehová Diosca Jatun Manllanai Tamiahuan chai nali gentecunata tucuchigrijurca.

Shinapash shuj jarica na chai gentecunashna carcachu. Chai jarica Noé shutimi carca. Paica tucui shunguhuanmi Jehová Diosta juyarca. Noeca huarmita, quimsa churicunatapashmi charirca. Sem, Cam y Jafet shuticunami carca. Noepa churicunaca cazadocunami carca. Jehová Diosca Noetaca shuj arcata rurachunmi mandarca. Chai arcaca caspihuan rurashca yacupi huambuna shuj jatun caja cuendami carca. Chai arcapimi Noepash, paipa familiapash Jatun Manllanai Tamiamanda salvari ushana carca. Shinallata Jehová Diosca animalcunapash salvarichunmi ashtaca animalcunata chai arcaman yaicuchichun mandarca.

Noeca uchallami chai arcata rurai callarirca. Noepash, paipa familiapash casi 50 huatacunapimi arcata ruraitaca tucuchirca. Jehová Dios mandashca shinami chai arcataca rurarca. Chai huatacunapica Noeca gentecunamanga Jatun Manllanai Tamia tiagrinmi nishpami villachirca. Shina villajpipash nipi na cazurcachu.

Ñami arcaman yaicuna tucurca. Jipaman ¿ima pasashcata yachangapaj munanguichu?