¿CIERTOPACHACHU SHAMUJ PUNLLACUNAPI IMASHINA CAUSANATA AGLLAITA USHAPANGUI? Huaquin gentecunaca destinopi o Taita Dios tucuita controlajujtami crin. Chaimandami paicunapa munaita na pactachi ushashpaca desanimarishpa nin, “shina pasanami carianga” nishpa.

Cai mundopi llaquicunalla miranajujta ricushpami shujcunaca ninanda llaquirin. Munashpapash guerracunamanda, ungüicunamanda, nali gentecunamanda, terremotocunamanda o imapash llaquicunamandami ali causaitaca na ushan. Chaimandami ali causana munaitapash chingachin.

Cungashcapi imapash pasashcamandami huaquinbica, ñucanchi munaicunata na pactachi ushanchi (Eclesiastés 9:12). Shinapash, imashina causanataca tucuicunami decidita ushapanchi. Bibliaca yachachinmi, jipacunaman imashina causanataca cada unomi decidita ushanguichi nishpa. Shinaca Biblia imata nijta ricupashun.

Taita Dios carasha nishca alpacunaman israelitacuna ña yaicugrinajujpica, Moisestami Jehová Diosca cashna ningui nirca: “Causaitapash, huañuitapash, bendiciai tucunatapash, ninanda nalicachi tucunatapash, cangunapaj ñaupajpimi churani. Cambash, cambaj miraicunapash causangapaca, causaita agllaichiyari. Cangunata Mandaj Taita Diosta juyashpa, pai rimashca shimicunata uyashpa, paita catinguichiyari” nishpa (Deuteronomio 30:15, 19, 20).

‘Causaitapash, huañuitapash, bendiciai tucunatapash, ninanda nalicachi tucunatapash, cangunapa ñaupajpimi churani. Causaita agllaichiyari’ (Deuteronomio 30:19).

Jehová Diosca israelitacunata Egiptomanda llujchishpami, paicunamanga pai carasha nishca alpacunapi cushilla causana oportunidadta curca. Shinapash chaipi causangapaj munashpaca ¿imatata rurana carca? Taita Diosta juyashpa, pai nishcata uyashpa, paita catishpami israelitacunaca ‘causaita agllashcata’ ricuchina carca.

Shamuj punllacunapi imashina causanataca quiquinbashmi agllana capangui. Taita Diosta juyashpa, paita uyashpa, paita catishpaca causaita agllashcata ricuchishpami shuj paraíso Alpagupi para siempre causaita ushapangui. Shinapash, Taita Diosta juyana, paita uyana, paita catinaca ¿imata can? Ricupashun.

Taita Dios yuyachijpimi apóstol Juanga nirca: “Taita Diosca, ninandapacha juyajmi” can nishpa (1 Juan 4:8). ¿Imatata pundapica pactachina canchi? nishpa tapujpica Jesusca nircami: “Mandashcapica cashnami nijun: ‘Cambaj Taita Diostaca, tucui shunguhuan, tucui almahuan, tucui yuyaihuan juyangui’” nishpa (Mateo 22:37). Shinaca, Taita Diosta juyaimandami paipa amigocuna capanchi. Na manllaimanda, na cazuna cashcamandallachu Taita Diostaca cazunchi. Shinapash ¿imamandata paitaca juyana capanchi?

Jehová Diosca shuj taita cuendami gentecunataca juyan. Taitacunaca juchayucuna cashpapash, huahuacuna cushilla, ali causachun munashpami huahuacunata ayudangapaj, animangapaj, aliguta intindichishpa yachachingapaj esforzarin. Chaimandami taitacunaca huahuacuna paicunata juyachun, cazuchun, paicunapa alipallata yachachijushcata intindichun munan. Pensaripai. Jehová Diosca na juchayuchu can. Shinaca ¿nachu paita juyachun, tucuimanda agradicichun Jehová Diospash munanga?

Bibliata escribishca shimicunapi uyana nishpaca cazuna cashcatami shina nin. Huahuacuna cazuchun munashpami, taitacunaca “uyaichi” nin. Shinaca, Taita Diosta uyana nishpaca, Taita Dios imata nijujta intindishpa pactachinatami shina nin. Cunanbica Taita Diosca na chimbapura parlanllu. Chaimandami Taita Diosta uyangapaca, paipa Shimi Bibliata liina capanchi, imata liishcatapash pactachina capanchi (1 Juan 5:3).

Taita Diosta uyana minishtirishca cashcata aliguta intindichingapami Jesusca nirca: ‘Gentecunaca na tandahuanlla causangachu. Taita Dios rimashca tucuilla shimicunahuanmi causanga’ nishpa (Mateo 4:4). Micuna minishtirishca cajpipash, Taita Diosmanda yachajunami ashtahuan minishtirishca can. Rey Salomonga nircami: ‘Ali yachajushca canaca, jarcarina jirrushnami. Culquipash jarcarina jirrushnallatami. Ashtahuangarin ali yachaica, alipacha yachajushcacunaman causaita cashcamandami ashtahuan ali’ can nishpa (Eclesiastés 7:12). Ali yachaita charinapash, Taita Diosmanda yachajunapash, para siempre causaiman apaj ali ñanbi purichunmi ayudan.

Ñaupa temapi Mateo 7:13, 14​pica Jesusca nircami: “Causaita causangapaj yaicuna punguca quichijimi, ñambash quichijimi. Chai ñandaca, huaquingunallami tarin” nishpa. Chai ñanbi puringapaca, pipash chai ñanda alipacha rijsishpa, para siempre causaiman apaj ñanda pushachunmi minishtinchi. Chaimandami Taita Diosta catina capanchi (Salmo 16:8). Shinapash chaipaca ¿imatata rurana capanchi?

Tucuicunami cada punlla ashtaca cosascunata ruranata charinchi, ashtahuan rurangapapash munanchi. Ocupadocuna caimanda, shuj cosascunapira pensarijuimandami, Taita Dios imata nishcata pensaringapaca na tiempota charinchi. Chaimandami Bibliaca nin: ‘Juizu illanshnaca, na causanachu canguichi. Alipacha yachajushcami causana canguichi. Cunan punllacunapillata, aliguta yarishpa [“tiempota aliguta ocupashpa”, NM] causaichi. Nali punllacunapimi causanajunchi’ nishpa (Efesios 5:15, 16). Taita Diosta catingapaca, Taita Diospa amigo canatami pundapi churana capanchi (Mateo 6:33).

Punda imata rurashcata ñana cambiai ushashpapash, jipa punllacunapi quiquinbash, quiquinba familiapash ali causanataca quiquinllatami agllaita ushapangui. Bibliapi yachachishca shinaca, ñucanchi Taita Jehová Diosca ninandami ñucanchitaca juyan, ñucanchicuna imata rurana cashcatapashmi nin. Ricupai Miqueas libropica cashnami nin:

“Huañuna aichayu runalla. Paica, ñami cambaj ima ali canatapash villarca. Mandaj Diosca, caitallami can rurachunga mañan: [Alita] ruraj cachun, llaquishpa juyaj cachun, cambaj Taita Diospaj ñaupajpi na jariyashpa causachunmi [o purichunmi] munan” nishpa (Miqueas 6:8).

Quiquinga ¿Taita Dioshuan puringapaj munapanguichu? Paihuan purishpaca, paipa amigocunaman carana ashtaca bendiciongunatami para siempre chasquipangui. Paihuan purinata o na purinataca quiquinmi ricuna capangui.