Sostar phenelpe ke o Jesus si o Shau le Devlesko?
So phenel e Biblia
Univar e Biblia phenel ke o Jesus si “O Shav le Devlesko” (Iovano 1:49). Kana phenel “O Shav le Devlesko” kamel te sikavel ke o Del si kon kerdias sa ai kon kerdias o traio, godo sikavel ke vo kerdias ka o Jesus (Salmo 36:9; Sicharimos [Apokalipsis] 4:11). E Biblia chi phenel ke ka o Del shai aven les shave sar le manush pe phuv.
E Biblia vi phenel ke le angeluria si shave katar o Del o chacho (Job 1:6). Ai sikavel ke o pervo mursh, o Adan, sas “o shav le Devlesko” (Luk 3:38). Numa e Biblia sikavel ke o Jesus si o shau mai baro katar o Del ke sas o pervo kai sas kerdo ai kai kerdias vo korkorho.
Sas o Jesus ando cheri mai anglal te arakhadiol pe Phuv?
Ei. Mai anglal te arakhadiol sar manush, o Jesus sas iek dujo ando cheri. O Jesus phendias “vulistem anda o cheri” (Jono 6:38; 8:23, E Nevi Viasta ai O Psalmo).
O Del kerdias pervo ka o Jesus. Pa o Jesus e Biblia phenel:
Vo si “o pervo mai anglal sar sa le kolaver dieli” (Kolosiana 1:15).
Anda sa le dieli kai kerdias o Del, o Jesus sas o pervo (Apocalipsis 3:14, La Biblia. Traducción del Nuevo Mundo [NWT]).
Ando Jesus kerdili chachi e profesia kai phenelas pa varekon kai trailas de dumut (Miqueas 5:2; Mate 2:4-6).
So kerelas o Jesus ando cheri mai anglal te avel pe Phuv?
Kerelas iek bari buki ando cheri. O Jesus phendias pa e buki kai kerelas kana manglias katar o Del te bariarel les sar kana sas pasha leste mai anglal te kerdiol e lumia (Iovano 17:5).
Azhutisardias peske Dades te kerel sa le prame. O Jesus kerdias buki pasha o Del sar varekon kai zhanel te kerel mishto e buki (Proverbios 8:30). Pa o Jesus e Biblia phenel: “Ke lestar O Del kerdia swako fielo ando rhaio ai pe phuv” (Kolosiana 1:16).
O Del kerdias mashkar o Jesus sa le prame, de kin le angeluria zhi o universo (Sicharimos [Apokalipsis] 5:11). Shai phenelpe ke o Del si sar iek arkitecto ai o Jesus si kon kerel so vo phenel. O arkitecto delpe gogi ai phenel sar trobul te kerdion le dieli, ai kon vazdel kerel chacho o gindo katar o arkitecto.
Sas e Vorba. Kana e Biblia del duma pa o Jesus mai anglal te avel pe phuv, akharel les e Vorba (Juan 1:1, NWT). Godo kamel te phenel ke o Del mashkar pesko shau phenelas suaturia ka aver dujuria.
Shai avela ke o Jesus sas kon phenelas suaturia katar o Del le manushenge. Ai vi shai avela ke o Jehova dias duma mashkar e Vorba, o Jesus, kana phendias ka o Adan ai e Eva so trobunas te keren ando sado Eden (Génesis 2:16, 17). Shai avela ke o Jesus sas o angel kai ningerdias ka le israeliti te nakhen e pusta ai o glaso kai trobunas te len opre (Éxodo 23:20-23). a
a O Del vi dias duma mashkar aver angeluria. Iek ejemplo si, kana o Jehova dias pesko zakono ka le israeliti kerdias les mashkar aver angeluria ai na mashkar pesko pervo Shau (Le Apostolengo 7:53; Galatiana 3:19; Zhidovuri 2:2, 3, ENV).
