Лащи новость лэ Матфеёстар 28:1-20
28 Прожыля и субота, и андо пэрво лэ куртеско дес, кала ля тэ сирой, и Мария Магдали́на и авэр Мария авелэ тэ диқэн и моӷилка.
2 Котэ затиносайля и ԥув, важ кода кай па нэбо змэкляпэ лэ Иеговаско анӷело. Во виля о бар па входо и бэшля пэр лэстэ.
3 О анӷело свитияспэ сар молния, ай лэстири ӥда сас парни, сар ӥв.
4 Кала лэс диқлэ и мануша, савэ котэ сторожынас, вонэ затиносайлэ даратар и замулинэ*.
5 О анӷело ԥэндя лэ жувлянди: «На́ даран. Мэ ӷанав, кай тумэ родэн лэ Иисусос, савэс казнисардэ по столбо.
6 Лэс катэ нинай, важ кода кай во жунделя, сар ԥэнэнас. Жан и диқэн о ҭан, кай во пашлёлас.
7 И май ӥто пэрэдэн лэстирэ учениконэнди, кай во жунделя, и ԥэнэн лэнди: „Во аштярэла тумэн андэ Галиле́я. Тумэ диқэна лэс котэ“. На́ бистрэн, со мэ тумэнди ԥэндэм».
8 И жувля грабисайлэ тэ ужан котар. И хоть лэндэ сас дар, вонэ фартэ зарадосайлэ и прастае тэ росԥэнэн пала вся лэ Иисусостирэ учениконэнди.
9 Па дром вонэ додиқлэ лэ Иисусос, и во поздоровкыисайля лэнца. Вонэ пашэлэ каринг лэстэ, хутилделэ пала лэстирэ пэрнэ и тэлелэ лэсти.
10 Тоди о Иисусо ԥэндя: «На́ даран! Жан и ԥэнэн мэрнэ ԥралэнди, кай вонэ тэ авэн андэ Галиле́я. Котэ мэ диқавапэ лэнца».
11 Пока вонэ сас андо дром, дэсавэ анда кодэла, ко сторожыяс лэ Иисусостири моӷилка, жылэ андо форо и росԥэндэ лэ барэ рашанди пала вся, со диқлэ.
12 И барэ рашая стидэпэ лэ ԥоромэнца, подинэ дума, динэ лэ воинонэнди бут ловэ*
13 и ԥэндэ: «Ԥэнэн кадя: „И рят авелэ лэстирэ ученикоря и вичордэ лэстири тила, пока амэ совасас“.
14 Ай если пала када уӷанэна о правителё, тоди нэ пэрэжывайте: амэ лэсти вся объяснисараса».
15 И воиноря линэ и ловэ и стердэ кадя, сар лэнди ԥэндэ. И кадэва хохаимос идоси ԥирэл машкар евреёря.
16 Ай и 11 ученикоря жылэ андэ Галиле́я, пэ кодэва плай, каринг ԥэндя лэнди тэ жан о Иисусо.
17 Вонэ додиқлэ лэ Иисусос и тэлелэ лэсти, хоть дэсавэнди на патяласпэ, кай када во.
18 О Иисусо пашэля каринг лэндэ и ԥэндя: «Мэрно Дад дя манди вся и власть по нэбо и пэ ԥув.
19 Важ када жан каринг всаворэ народоря и, кай тэ поможын лэ манушэнди тэ ашэн ученикоря, болэн кодэлэн, ко прижанэн лэ Дадэс, лэ Шавэс и о зор лэ свынтонэ духоско,
20 ай кадяжэ сытярэн лэн тэ жувэн па законо, саво мэ тумэнди дэм. И мэ авава тумэнца кажно дес, пока на поджала и время кадэла люмати*».