Лащи новость лэ Матфеёстар 6:1-34
6 Слидин, кай тумэ тэ на терэн лашымос кати важ кода, кай тэ диқэл о миро, ато тумэнди на авэла блаӷословения тумарэ небеснонэ Дадэстар.
2 Кала поможыс лэ чорорэнди, на хвалисав англа всаворэ, сар када терэн и лицымероря андэ лэ собраниятирэ цэра и пэ вулицы, кай пала лэндэ драго тэ дэл дума о миро. Ԥэнав тумэнди чачимос: лэндэ ужэ исин вся лэндири наӷрада.
3 Ай тутэ, кала поможыс лэ чорорэнди, мэк о лево вас на ӷанэн, со терэл о право,
4 кай пала тири лащи дила нико тэ на ӷанэн. И тоди тиро Дад, саво диқэл вся, со терэлпэ чоралэс, блаӷословия тут.
5 Кадяжэ, кала мангэнпэ, на́ андярэн пэс сар лицымероря, савэнди чалёл тэ мангэнпэ андэ ла собраниятирэ цэра и пэ барэ вулицы*, кай лэн тэ диқэл о миро. Ԥэнав тумэнди чачимос: лэндэ ужэ исин пэстири наӷрада.
6 Ай ту, кала мангэспэ, зажа андэ пэско цэр, заԥандав и двэри, и мангпэ тирэ небеснонэ Дадэсти*. И тоди тиро Дад, саво диқэл вся, со терэлпэ чоралэс, блаӷословия тут.
7 Кала мангэнпэ, на́ ԥэнэн ек и ек, сар и мануша анда авэр народоря. Вонэ гиндон, кай о Дэл ашунэла лэн, если вонэ бут дэна дума.
8 На́ авэн сар вонэ, важ кода кай тумаро Дад ӷанэн, со тумэнди трэбуй, инке сар на манглэ лэс пала када.
9 Важ када мангэнпэ кадя: «Амаро небесно Дад, мэк тиро алав авэл свынто*.
10 Мэк правий тиро Царство. Стер пэ ԥув вся, со ту камэс*, сар ту стердян по нэбо.
11 Дэ амэнди котор марно пэ кадэва дес
12 и простисар амэнди о вужылимос*, сар и амэ простисардям кодэлэн, ко амэнди вужылэ*.
13 Поможысар амэнди тэ на подаспэ лэ бэзэхэсти и фэрисар амэн лэ Сатанастар*».
14 Если тумэ простин кодэлэн, ко стердя бэзэх против тумэндэ, тоди тумаро небесно Дад простия тумэн.
15 Ай если тумэ на простин кодэлэн, ко стердя бэзэх против тумэндэ, тоди и тумаро небесно Дад на простия тумэн важ тумаро бэзэх.
16 Кала ритярэн о посто, старыинпэ тэ слидин пала пэстэ, кай тумэ тэ на авэн сар лицымероря. Вонэ ԥирэн помэклэ муеса*, кай о миро тэ диқэл, кай вонэ ритярэн о посто. Ԥэнав тумэнди чачимос: лэндэ ужэ исин вся лэндири наӷрада.
17 Ай кала ту ритярэс о посто, мак о шэро вулееса и халадюв,
18 кай най о миро тэ диқэл, кай ту ритярэс о посто, ай кати тиро небесно Дад*. И тоди тиро Дад, саво диқэл вся, со терэлпэ чоралэс, блаӷословия тут.
19 Хутила тэ тидэн о барвалимос пэ ԥув, кай лэс можэт тэ похал и моль и тэ римой* и ржавчина и кай и мануша моӷут лэс тэ чорэн.
20 Но тидэн о барвалимос по нэбо, кай лэс на похала и моль и на римоя* и ржавчина и каринг на заӷулена и чордэӷаря.
21 Вижал, кай стидэс о барвалимос, котэ авэла и тиро ди.
22 И яқа — када свето важ и тила. Важ када если тирэ яқа диқэн пэ варисо ек*, тоди вся тири тила лэла тэ свитийпэ.
23 Но если тирэ яқа завидуин аврэнди*, тоди андэ вся тири тила авэла тэмнота. Если тирэ яқа, савэ трэбуй тэ анэн свето андэ тила, римосайлэ и анэн тэмнота, тоди со ж дэ бари кадэя тэмнота!
24 Нико нэ можэт тэ авэл рабо сразу кай дуй хула́я, важ кода кай или еқэс вэрыцыя, ай аврэс любия, или еқэс кандэла, ай аврэс на шола сама. Тумэ нэ можэте тэ авэн раборя и лэ Дэвлэсти, и лэ барвалимасти.
25 Кочай мэ ԥэнав тумэнди: хутила тэ пэрэжываете пала пэстири жызня — со тэ хан или со тэ пэн, ай кадяжэ пала пэстири тила — андэр со тэ утидэнпэ. Хэба и жызня най май куч, чем о хамос, ай и тила, чем и ӥда?
26 Шон сама пэ птицы: вонэ на сеин, на стидэн о зэрно и никай лэс на гаравэн, но тумаро небесно Дад праварэл лэн. Пэскати жэ тумэ май куч лэндар!
27 Если варико андар тумэндэ лэла пэрэжывать, сможэт тоди во тэ продлий пэстири жызня хоть пэ часостэ*?
28 И пала ӥда состэ пэрэжываете? Диқэн, сар барён и лилии пэ мал. Вонэ нисо на терэн и на сувэн пэсти ӥда,
29 но ԥэнав тумэнди, кай дажэ о царё Соломоно, саво сас фартэ барвало, на утидэласпэ кадя, сар любо андар лэндэ.
30 Если о Дэл кадя утидэл и цвиторя пэ мал, савэ адес исин, ай тэся лэн шона андо бов, то хэба во на утидэла тумэн, ко найсасто андэ вера*?
31 Важ када никала нэ пэрэжывайте и на́ ԥэнэн: «Со амэнди тэ хас?», или «Со тэ пас?», или «Со тэ лас пэр пэстэ?»
32 Важ кода кай всаворэса кадэлэса замардо о шэро кай и мануша анда авэр народоря. Тумаро небесно Дад и кадя ӷанэн, кай тумэнди вся када трэбуй.
33 Важ када вся и время стон о Царство и лэ Дэвлэско справедливо законо по пэрво ҭан андэ тумари жызня, и тоди вся, со трэбуй, авэла тумэндэ.
34 Никала нэ пэрэжывайте пала кода, со авэла тэся, важ кода кай тэся авэна пэстирэ пэрэжывании. Пэ кажно дес хутилэл пэско ԥаримос.
Сноски
^ Или «пэ вуӷлоря пэ барэ вулицы».
^ Или «тирэ Дадэсти, савэс нико нэ можэт тэ диқэл».
^ Или «мэк о миро стол бари патив пэ тиро алав».
^ Или «тири воля».
^ Или «бэзэх; ӷрехо».
^ Или «против амэндэ стердя бэзэх; ӷрехо».
^ Или «лэ Бэнгэстар; лэ найлашэстар».
^ Или «на слидин пала пэско внешнё видо».
^ Или «тиро Дад, савэс нико нэ можэт тэ диқэл».
^ Или «тэ похал».
^ Или «на похала».
^ Или «драго диқэн». Букв. «прости».
^ Или «найдраго диқэн». Букв. «найлашэ; вэрыти».
^ Букв. «пэ ек куй».
^ Или «кастэ слабо вера».
