XIDONDZRO 15
I Mani Yesu?
Yesu i mun’we wa vhanu lava viki ni ndhuma leyikulu a matin’wini. Kambe, nambileswi va ku tala va mu tivaka hi vito, a va tivi swa ku tala hi yene, nakone va ku tala va ni mavonela ya ku hambana mayelana ni leswaku Yesu i mani hakunene. Xana Bibele dzri li yini ha yene?
1. I Mani Yesu?
Yesu i ntsrumi leyi nga ni ntamu, leyi tsrhamaka a tilweni. A tumbuluxiwe ha Yehovha Xikwembu Nkulukumba na a nga si tumbuluxa mintxhumu hinkwayu leyin’wana. Xileswo, i ‘mativula ya hinkwaswu leswi vumbiwiki’. (Ba-le-Kolosa 1:15) Leswi Yesu a a li wuswake loko a vumbiwa ha Yehovha, Bibele dzri mu vitana ‘N’wanakwe, lwe wa ku va swakwe’. (Yohan 3:16) Yesu a tizre kusuhi ngopfu swinene na Papayi wake, Yehovha, a mu pfuna ku tumbuluxa mintxhumu hinkwayu leyin’wana. (Dondzra Amaproverbia 8:30.) Ni swoswi Yesu a ha ni wuxaka lebyikulu na Yehovha. A tizra hi ku dumbeka swanga muvulavuleli wa Xikwembu Nkulukumba, kumbe ‘Zritu’, lwa nyikelaka madzrungula ni swileleto swake.—Yohan 1:14.
2. Ha yini Yesu a tile lani misaveni?
Kolomu ka 2.000 wa malembe lama khalutiki, Yehovha a yentxe singita. A tizrise moya wake wa ku xwenga akuva a susa wutomi bya Yesu a tilweni a byi nghenisa a khuzrini dzra n’hwanyana lwa vitaniwaka Mariya. Hi ndlela leyi, Yesu a pswaliwe swanga mhunu wa nyama. (Dondzra Luka 1:34, 35.) Yehovha a zrume Yesu a misaveni akuva a va Mesiya, kumbe Kriste, akuva a huluxa vhanu. a Hinkwaswu leswi Yehovha a swi profetiki a Bibeleni mayelana na Mesiya swi hetisekile ka Yesu. Leswi swi pfune vhanu ku tiva leswaku Yesu a a li “Kriste, N’wana wa Xikwembu Nkulukumba lweyi a hanyaka”.—Matewu 16:16.
3. A kwini Yesu swoswi?
Loko Yesu a file swanga mhunu wa nyama, Xikwembu Nkulukumba a mu pfuxile swanga ntsrumi, a tlhelela a tilweni. ‘Xikwembu Nkulukumba a mu tlakuxile a henhlahenhla ngopfu.’ (Ba-le-Filipi 2:9) Swoswi, Yesu a le xiyin’wini xa wuhosi lebyikulu.
KELISISA
Dondzra swin’wana mayelana ni leswi Yesu a nga swone hakunene ni xivangelo lexi yentxaka leswaku swi va swa lisima ngopfu ku dondzra ha yene.
4. Yesu a hi yene Xikwembu Nkulukumba Lwe Wa Ntamu Hinkwawu
Bibele dzri dondzrisa leswaku nambi leswi Yesu a nga ntsrumi leyi nga ni ntamu, leyi tsrhamaka a tilweni, a le hansi ka Yehovha, lweyi a nga Xikwembu Nkulukumba ni Papayi wake. Ha yini hi hlaya tanu? Vonani VHIDIYU akuva mi twa leswi Bibele dzri swi dondzrisaka mayelana ni ndlela leyi Yesu a hambanaka ha yone na Xikwembu Nkulukumba Lwe Wa Ntamu Hinkwawu.
Matsralwa lama landzrelaka ma hi pfuna ku twisisa wuxaka lebyi nga kone a makazri ka Yehovha na Yesu. Pfulani mabuku lawa ha dzrin’wedzrin’we, mi dondzra tindzrimana, mi gama mi bulisana hi swivutiso leswi landzrelaka:
Dondzrani Luka 1:30-32.
-
Xana ntsrumi yi tlhamuxele leswaku Yesu a a ta va yini ka Yehovha Xikwembu Nkulukumba, “Lwa nga Henhlahenhla”?
Dondzrani Matewu 3:16, 17.
-
A nkama lowu Yesu a nga babatisiwa, xana zritu ledzri humiki a tilweni dzri te yini?
-
Hi mavonela yaku, zritu ledzro a dzri li dzra mani?
Dondzrani Yohan 14:28.
-
I mani a nga nkulu a tlhela a va ni ntamu a ndangwini? I papayi kumbe i n’wana?
-
Xana Yesu a a djula ku hlaya yini loko a te Yehovha i Papayi wake?
Dondzrani Yohan 12:49.
-
Xana Yesu a pimisa leswaku yene ni Papayi wake i mhunu mun’we? Wene ke, u swi vonisa kuyini?
5. Ku ve ni wumboni bya leswaku Yesu hi yene Mesiya
Bibele dzri ni wuprofeta byinyingi lebyi a byi ta pfuna vhanu ku tiva leswaku i mani Mesiya—a nga lweyi Xikwembu Nkulukumba a mu hlawuliki akuva a huluxa vhanu. Vonani VHIDIYU akuva mi kuma ntlhamuxelo wa ku goma wa swiprofeto swa kukazri leswi Yesu a swi hetisisiki loko a te la misaveni.
Dondzrani swiprofeto leswi swa Bibele, mi gama mi bulisana hi swivutiso leswi landzrelaka:
Dondzrani Mika 5:2 akuva mi ta vona lomu Mesiya a a ta pswaliwa kone. b
-
Xana xiprofeto lexi xi hetisekile a ku pswaliweni ka Yesu?—Matewu 2:1.
Dondzrani Amapsalma 34:20 na Zekariya 12:10 akuva mi vona swin’wana leswi swi profetiwiki mayelana ni ku fa ka Mesiya.
-
Xana swiprofeto leswo swi hetisekile?—Yohan 19:33-37.
-
Hi mavonela yaku, xana a nga va na a li Yesu lweyi a yentxiki leswaku xin’wana ni xin’wana xa swiprofeto leswi xi hetiseka?
-
Xana leswi swi ku kholwisa leswaku Yesu hi mani?
6. Ha pfuneka loko hi dondzra mayelana na Yesu
Bibele dzri komba leswaku i swa lisima ngopfu ku dondzra mayelana na Yesu ni ntizro wake. Dondzrani Yohan 14:6 na 17:3, mi gama mi bulisana hi xivutiso lexi:
-
Ha yini swi li swa lisima ngopfu ku dondzra mayelana na Yesu?
Yesu a pfule ndlela ya kuva hi va vanghanu va Xikwembu Nkulukumba. A dondzrise ntiyiso mayelana na Yehovha, nakone hi nga kuma wutomi lebyi nga helikiki hi kola ka Yesu
VAN’WE VA LI: “Timboni ta Yehovha a ti pfumeli ka Yesu.”
-
Xana a wu ta hlamulisa kuyini?
NKATSRAKANYU
Yesu i ntsrumi leyi nga ni ntamu. I N’wana wa Xikwembu Nkulukumba nakone hi yene Mesiya.
Mpfuxeto
-
Ha yini Yesu a vitaniwa ‘mativula ya hinkwaswu leswi vumbiwiki’?
-
Na a nga si ta la misaveni, xana Yesu a a yentxa yini?
-
Hi swi tivisa kuyini leswaku Yesu hi yene Mesiya?
HANDZRISISA
Dondzra swin’wana mayelana ni ntizro wa Yesu swanga Mesiya.
Dondzra mhaka leyi akuva u tiva leswaku Yesu i N’wana wa Xikwembu Nkulukumba hi ndlela yini.
“Ha Yini Yesu A Vitaniwa N’wana Wa Xikwembu Nkulukumba?” (Leswi kumekaka ka jw.org)
Vona leswaku ha yini dondzro leyi liki Xikwembu Nkulukumba i Papayi, ni N’wana ni Moya Lowa Ku Xwenga yi nga li ya Bibele.
“Xana Yesu I Xikwembu Nkulukumba?” (Xihondzro Xa Ku Zrindzra, 1 ka Abrili wa 2009)
Dondzra mayelanu ni ndlela leyi wutomi bya wansati wa kukazri byi txintxiki ha yone ntsrhaku ka loko a kambisisile leswi Bi-bele dzri swi hlayaka ha Yesu.
“Wansati Wa Muyuda A Tlhela A Kambisisa Lipfumelo Dzrake” (Pfukani!, Mayu wa 2013)
a Swidondzro 26 na 27 swi ta khanela hi leswaku ha yini vhanu va vilela ku huluxiwa nakone Yesu a hi huluxisa kuyini.
b Vona Dondzra Swin’wana 2 akuva u kuma xiprofeto lexi nga hlaya hi ku kongoma nkama lowu Yesu a a ta ta ha wone la misaveni.
