1, 2. Na ndo wa e lingbi ti kpe dä laso ti bata tele ti e si sioni asi na e pëpe?

BÂ SO mo yeke tambela na tele ti mbeni lege. Mo ye ti bâ, ngu alondo na lê ti nduzu ato nda ti vuko. Nyekpa aza na bekpa asungba. Ngu-nzapa akomanse ti pika ngangu. Mo to nda ti mû loro na mo yeke gi na lê ti mo mbeni ndo so mo lingbi ti honde tele ti mo na gbe ni. Mo ye ti bâ kâ na tele ti lege mbeni nzoni gbe ti da so zo alingbi ti gue na gbe ni. A leke ni si a kpengba pendere, nga yâ ni ahule nzoni na a nzere gi ti tene zo aduti na gbe ni. Mo kpe hio mo lï na gbe ti da so. Fade tele ti mo ayeke nzere pëpe?

² Laso, e yeke na yâ angoi ti wusuwusu so akpa ngoi ti kota ngu-nzapa so. Aye na ndo ti sese ayeke ga gi sioni ti gue na li ni. Ye oko, mbeni ndo ti bata tele ayeke dä so tongana e kpe dä, e lingbi ti bata tele ti e yongoro na aye so alingbi ti sala sioni na e biaku. E ye ti sala tënë ti nyen mbilimbili? Bâ tënë so Bible atene: “Fade mbi sala tënë ti L’Eternel, Lo yeke Ndo Ti Bata Tele ti mbi na Gbada Ti Bira ti mbi; Nzapa ti mbi, Lo so mbi zia bê ti mbi na Lo.”​—Psaume 91:2.

3. E lingbi ti sala nyen ti tene Jéhovah aga tongana ndo ti bata tele ti e dä?

³ Zia e gbu li ti e kete na ndo ti ye so! Jéhovah  so asala ye kue na so akomande na ndo dunia kue alingbi ti bata e yongoro na ye ti sioni. Lo lingbi ti sala tongaso na e teti ngangu ti lo ahon ngangu ti zo kue nga na ye kue so alingbi ti sala sioni na e. Même tongana a si so sioni awara e, Jéhovah alingbi ti lungula aye so asi na pekoni si ye kue akiri nzoni teti e. E lingbi ti sala tongana nyen si Jéhovah aga tongana ndo ti bata tele ti e dä? A lingbi e zia bê ti e na lo. Na ndo ni, Mbeti ti Nzapa awa e, a tene: “I bata tele ti i na yâ ndoye ti Nzapa.” (Jude 21). Biani, a ku na mbage ti e ti ngbâ na yâ ndoye ti Nzapa, so ti tene ti ngbâ ti kpengba kamba ti ndoye so ayeke na popo ti e na Babâ ti e ti yayu. A yeke gi na salango tongaso si e lingbi ti bâ biani so lo yeke bata e. Me e lingbi ti sala tongana nyen ti duti na mara ti songo tongaso na Nzapa?

4, 5. Fa ambeni lege so Jéhovah afa na ndoye ti lo na mbage ti e.

⁴ Ti ngbâ na yâ ndoye ti Nzapa, a yeke ti e ti bâ tongana nyen Jéhovah afa ndoye ti lo na mbage ti e. Gbu li ti mo na ndo ti ambeni ye so mo manda na yâ buku so. Jéhovah so asala ye kue na dunia amû na e sese tongana pendere ndo ti lango dä. Lo zia na ndo ni gbâ ti kobe na ngu, aye tongana amosoro ti gbe ti sese, mara ti anyama nde nde nga apendere keke na gbako. Nzapa asala nga si Bible abâ gigi, na lo fa na yâ ni iri ti lo nga na asalango ye ti lo na e. Na ndo ni, Tënë ti lo afa so lo to lani Molenge ti lo Jésus so Lo ndoye lo mingi ti ga na sese, na Lo zia si lo bâ pasi na lo kui ndali ti e (Jean 3:16). Me ye ti nzoni wa e yeke wara na lege ti matabisi so? A yeke mû na e beku ti mbeni pendere gigi ti kekereke.

⁵ Mbeni ye nde ayeke dä so Jéhovah asala, na so, na lege ni, fade beku ti e ti kekereke so ayeke ga tâ tënë. A yeke so Jéhovah azia mbeni ngorogbia na yayu. Ngorogbia so ayeke Royaume so Messie ti lo la ayeke na li ni. Fade Royaume so ayeke zi apasi kue na ayeke sala si sese aga Paradis. Gbu li kete: e lingbi ti ngbâ na ndo ti sese so na yâ siriri nga na ngia teti lakue lakue (Psaume 37:29). Me ti ku na ngoi ni so, Nzapa afa na e awe tongana nyen ti leke gigi ti e tâ nzoni. Lo mû nga na e matabisi ti sambela lo, so ti tene ti sala lisoro na lo na ndo kue nga na ngoi kue. Aye so ayeke gi ambeni  lege ni oko oko so Jéhovah afa na ndoye ti lo na mbage ti azo kue nga na mbage ti mo mveni.

6. Tongana nyen mo lingbi ti fa na gigi so ndoye so Jéhovah afa na mbage ti mo andu bê ti mo?

⁶ Kota tënë ni so a lingbi mo bâ ndo dä ayeke so: Tongana nyen mbi yeke fa na gigi so ndoye ti Jéhovah andu bê ti mbi? Azo mingi ayeke tene ande: “A yeke ti mbi nga ti ndoye Jéhovah.” Mo pensé tongaso nga? Jésus atene so komandema so ahon komandema kue ayeke so: “A lingbi mo ndoye Seigneur Nzapa ti mo na bê ti mo kue, na âme ti mo kue, na bibe ti mo kue.” (Matthieu 22:37). Kite ayeke pëpe so mo yeke na anda ti tënë mingi ti ndoye Jéhovah Nzapa. Me gi ti hinga na bê ti mo so a lingbi mo ndoye Jéhovah ayeke ye kue so a hunda ni ti ndoye lo na bê ti mo kue, na âme ti mo kue nga na bibe ti mo kue?

7. Lege ayeke dä ti sala mbeni ye si ndoye ti mo na mbage ti Nzapa angbâ gi pëpe na yâ bê ti mo?

⁷ Tongana ti so Bible afa, tongana e ye Nzapa, a lingbi a ngbâ gi na yâ ti bê ti e pëpe. Biani, ti ye Jéhovah na yâ bê ti mo ayeke kota ye mingi, me a yeke gi tongo nda ti tâ ndoye so a lingbi mo fa na mbage ti lo. E mû gi mbeni tapande: a yeke na ndo ti mbeni lê ti mango oko si mbeni keke ti mango ayeke to nda ti maï. Me tongana mo ye mango, fade a yeke nzere na mo ti tene mbeni zo amû gi lê ti mango ni tongaso amû na mo? Ên-ën. Legeoko nga, ti ye Jéhovah gi na yâ bê ti mo ayeke gi tongo nda ni la. Me Bible atene: “So ayeke ndoye ti Nzapa: e bata komandema ti Lo. Na komandema ti Lo ayeke tongana nengo ye pëpe.” (1 Jean 5:3). Tongaso, tâ ndoye so e yeke na ni na mbage ti Nzapa ayeke mbeni ye so a lingbi a bâ ni na lege ti akusala ni.​—Diko Matthieu 7:16-20.

8, 9. E lingbi ti fa ndoye ti e nga na singila ti e na mbage ti Nzapa tongana nyen?

⁸ E yeke fa so e ye Nzapa tongana e bata akomandema ti lo nga na akpengba-ndia ti lo. A yeke mbeni ye so ahon ngangu ti e pëpe. A hon ti tene a ne e, andia ti Jéhovah so ayeke ti mû maboko na e ti duti na ngia na yâ fini ti e (Esaïe 48:17, 18). Tongana e  leke gigi ti e si a gue oko na andia ti Jéhovah, e yeke fa na Babâ ti e ti ndoye so e kiri singila biani na lo teti aye kue so lo sala teti e. Me mawa ni ayeke so gi azo kete na ngoi ti e si akiri mara ti singila tongaso na Nzapa. E ye pëpe ti duti azo so ahinga pëpe ti mû merci, tongana ti ambeni so ayeke lani na fini na ngoi ti Jésus. Tongana lo sava azo ti buruma bale-oko, gi oko la akiri ti mû merci na lo (Luc 17:12-17). Biani, e ye ti duti tongana koli so akiri merci na lo, me e ye pëpe ti mû sioni tapande ti atanga ni gumbaya so ahon ti ala biaku.

⁹ Me akomandema ti Jéhovah so a hunda e ti bata ni ayeke so wa? E sala lisoro na ndo ti ambeni mingi awe na yâ ti buku so, me zia e kiri na ndo ti ambeni. Batango akomandema ti Nzapa ayeke mû maboko na e ande ti ngbâ na yâ ndoye ti lo.

10. Fa ngbanga ti nyen a yeke kota ye mingi ti ngbâ ti manda ti hinga ye na ndo Jéhovah Nzapa.

¹⁰ Ti manda ye na ndo Jéhovah ayeke mbeni kota ye ti sala ti ga  ndulu mingi na lo ahon ti kozo. A yeke mbeni ye so a lingbi mo ngbâ lakue ti sala ni. Na tapande, bâ so mo yeke na gigi na yâ mbeni gbako na yâ ti dê, na mo yeke na tele ti mbeni wâ. Mo ye ti bâ, wâ ni ayeke kiri kete ti gue ti mingo; mo yeke sala tongana nyen? Mo yeke zia gi wâ ni tongaso juska a gue a mingo? Ên-ën. Mo yeke ngbâ ti pusu ayanga ti akeke ti wâ ni dä, na ti gi ambeni hulengo keke ti zia na ndo ni si wâ ni angbâ ti za ti tomba dê na tele ti mo. Mo hinga so tongana wâ ni amingo, fini ti mo la mo yeke zia na yâ ti kpale. Legeoko tongana akeke so mo zia na ndo ti wâ ni, tâ hingango ye ti Nzapa so mo yeke wara ayeke bata ndoye ti mo na mbage ti Jéhovah na wâ.​—aProverbe 2:1-5.

11. Aye so Jésus afa asala nyen na ndo ti adisciple ti lo?

¹¹ Jésus aye lani ti tene adisciple ti lo asala kue si ndoye so ala yeke na ni na mbage ti Jéhovah nga na mbage ti Mbeti ti lo angbâ lakue ti za ngangu. Na pekoni so lo zingo na popo ti akuâ, Jésus afa ye na adisciple ti lo use na ndo ti ambeni prophétie so Moïse nga na ambeni prophète ti giriri amû na so aga tâ tënë na ndo ti lo. Aye so lo fa na ala asala nyen na ndo ti ala? Ala mveni atene na pekoni: “Tongana Lo yeke sala tënë na e na lege kâ, na tongana Lo yeke fa na e tënë ti Mbeti ti Nzapa, bê ti e ayeke tongana wâ pëpe?”​—Luc 24:32.

12, 13. (a) Ye nyen asi laso na azo mingi na ndo tënë ti yengo Nzapa nga na Bible? (b) E lingbi ti sala nyen si ndoye ti e adë pëpe?

¹² Mo dabe mo na ngoi so mo to nda ti hinga tënë ti aye so Bible afa biani? Bê ti mo aduti lani tongana nyen? Kite ayeke pëpe so mo wara lani ngia na wâ mingi, nga mo to nda ti ye Nzapa mingi. A yeke bibe so azo mingi nga awara. Me kpale ni fadeso ayeke ti sala si kota ndoye so angbâ gi ti kono na yâ e. E ye pëpe ti sala ye tongana ti so azo ti laso ayeke sala. Jésus atene: “Fade ndoye ti azo mingi aga dê.” (Matthieu 24:12). Tongana nyen mo lingbi ti sala ti tene ndoye ti mo teti Jéhovah nga na ti atâ tënë ti Bible adë pëpe?

¹³ Ngbâ ti manda ti hinga Jéhovah Nzapa na Jésus Christ (Jean 17:3). Gbu li ti mo mingi na ndo ti aye so mo manda na yâ Mbeti ti Nzapa, na hunda tele ti mo na tënë so: ‘Ye so mbi manda ge afa nyen na mbi na ndo Jéhovah Nzapa? Tënë nde wa asigigi ge, so apusu mbi ti ndoye lo na bê ti mbi kue, na bibe ti mbi kue nga  na âme ti mbi kue?’ (Diko 1 Timothée 4:15.) Tongana mo gbu li ti mo tongaso, a yeke sala ande si ndoye so mo yeke na ni na mbage ti Jéhovah angbâ lakue ti za ngangu.

14. Tongana nyen sambela alingbi ti mû maboko na e si ndoye so e yeke na ni na mbage ti Jéhovah angbâ ti za?

¹⁴ Mbeni lege ti sala si ndoye so mo yeke na ni na mbage ti Jéhovah angbâ ti za lakue ayeke ti sambela lo lakue (1 aThessalonicien 5:17). Na chapitre 17 ti buku so, e manda so sambela ayeke mbeni kota matabisi so Nzapa amû na e. Legeoko tongana ti so azo ayeke kpengba songo so ayeke na popo ti ala tongana ala yeke sala lisoro lakue, songo ti e na Jéhovah ayeke ngbâ nzoni nga na wâ tongana e sambela lo lakue. A yeke kota ye mingi ti tene e zia lâ oko pëpe si asambela ti e aduti gi atënë so e yeke tene pekoni gi tongaso sân ti zia bê ti e na ndo ni. A yeke ti e ti sala tënë na Jéhovah mo bâ mo tene molenge so ayeke tene tënë na babâ ti lo so lo ye lo mingi. Tâ tënë, tongana e yeke sambela lo, e yeke fa so e ne Jéhovah; me e ye si atënë so e yeke tene alondo tâ na bê ti e mveni na e zi bê ti e kue na lo (Psaume 62:9). Biani, ti manda Bible e mveni nga ti tene na Nzapa asambela so alondo na bê ti e ayeke aye so ayeke kota mingi tongana e yeke voro lo, na a yeke mû maboko na e ti ngbâ na yâ ndoye ti Nzapa.

15, 16. Ngbanga ti nyen e lingbi biani ti bâ kusala ti e ti fango tënë tongana mbeni matabisi nga mbeni mosoro?

¹⁵ Ti manda Bible e mveni nga ti sambela ayeke ambeni lege ti vorongo Jéhovah so e lingbi ti sala ni tongana e yeke gi e oko. Me fadeso zia e bâ mbeni ye so andu vorongo ti e na so e yeke sala ni na lê ti azo: a yeke ti fa na azo aye so e mä na bê dä. Mo fa na ambeni zo awe ambeni tâ tënë so mo manda na yâ ti Bible? Tongana mo sala ni awe, so tâ pendere matabisi biani si mo wara (Luc 1:74). Tongana e yeke fa na ambeni zo atâ tënë so e manda ni na ndo Jéhovah Nzapa, a yeke so e yeke mû mbage ti e na mbeni kota kusala so a mû na aChrétien kue ti sala, so ti tene ti fa nzo tënë ti Royaume ti Nzapa.​—Diko Matthieu 24:14; 28:19, 20.

¹⁶ Bazengele Paul abâ lani kusala ti lo ti Chrétien tongana mbeni ye ti ngele mingi, na lo hiri ni mosoro (2 aCorinthien 4:7). Ti  sala lisoro na azo na ndo Jéhovah Nzapa nga na aye so lo leke ti sala ayeke kusala so ahon kusala kue so mo lingbi ti sala. A yeke kusala so mo sala teti Maître so ahon tanga ni kue, na kusala so aga na aye ti nzoni mingi na mo ahon ye kue. Na mungo mbage ti mo na kusala so, mo yeke mû maboko na azo so bê ti ala ayeke nzoni ti ga ndulu na Babâ ti e ti yayu na ti mû lege so ague na  fini ti lakue lakue! Mbeni kusala ti mû ngia na zo ahon so ayeke? Na ndo ni, fango na azo tënë na ndo ti Jéhovah nga na Bible ayeke sala si mabe ti mo akono na ayeke kpengba ndoye so mo yeke na ni na mbage ti lo. Nga, na lê ti Jéhovah, ye so mo yeke sala ayeke kete ye pëpe (aHébreu 6:10). Ti duti na kusala mingi tongaso ti sala ayeke mû maboko na mo ti ngbâ na yâ ndoye ti Nzapa.​—Diko 1 aCorinthien 15:58.

17. Ngbanga ti nyen kusala ti fango tënë laso ayeke ye ti sala fade fade na ti ngbâ dä?

¹⁷ A yeke kota ye mingi ti tene e dabe ti e so kusala ti fango tënë ti Royaume ayeke ye ti sala fade fade na ti ngbâ dä. Bible atene: “Fa Tënë ni, na mo ngbâ dä.” (2 Timothée 4:2). Ngbanga ti nyen ti sala ni fade fade laso na ti ngbâ dä? Mbeti ti Nzapa atene na e: “Kota lâ ti L’Eternel aga ndulu, na a yeke ga fade fade.” (Sophonie 1:14). Biani, ngoi ni ayeke ga hio so Jéhovah ayeke ga ti futi aye ti ngoi ti laso. A yeke nzoni azo ahinga tënë ni kozo! A yeke nzoni ala hinga so ngoi ti fadeso ayeke ngoi ni la ti soro Jéhovah tongana Kota Gbia ti ala. Fade lâ ni so Jéhovah adiko ti futi aye ti fadeso ayeke “manke pëpe” ti si.​—Habakuk 2:3.

18. Ngbanga ti nyen a lingbi e bungbi oko na atâ Chrétien ti voro Jéhovah?

¹⁸ Jéhovah aye si e bungbi oko na atâ Chrétien ti voro lo. Ndani la si Mbeti ti Nzapa atene: “A lingbi e bi bê ti e na ambeni zo na popo ti e ti wa ala si ala ndoye azo, na ala sala kusala nzoni; a lingbi e zia ti bungbi pëpe, legeoko tongana ambeni zo asala, me e wa tele ti e na ambeni zo, na a lingbi i wa tele ti i mingi ahon teti i bâ so lâ ni aga ndulu.” (aHébreu 10:24, 25). Tongana e yeke gue na bungbi si e wara tele na aita ti e, lege azi na e nzoni mingi ti gonda Nzapa so e ye lo mingi na nga ti voro lo. E yeke kpengba nga tele na popo ti mba.

19. E lingbi ti sala tongana nyen ti kpengba kamba ti ndoye so atingbi e na aita ti e na yâ kongregation?

¹⁹ Na ngoi so e yeke bungbi oko na aita ti e ti kongregation ti voro Jéhovah, e yeke kpengba kamba ti ndoye na ti kamarade so atingbi e na ala. A yeke kota ye mingi ti tene e gi ti bâ aye ti nzoni so ayeke na amba ti e, legeoko tongana ti so Jéhovah ayeke gi ti bâ nzoni so ayeke na yâ ti e. Ku pëpe na mbage ti aita ti bungbi ti sala ye kue tâ gi na lege ni. Dabe mo so na lege ti yingo, hingango ye  ti e na asalango ye ti e ayeke oko pëpe, na e kue e yeke sala afaute. (Diko aColossien 3:13.) Gi lege ti kpengba songo ti mo na ala so ayeke na kota ndoye ti Jéhovah. Tongana mo sala tongaso, mo yeke bâ so mo yeke gue na li ni na lege ti yingo. Biani, ti voro Jéhovah legeoko na aita ti mo ti bungbi ayeke mû maboko na mo ti ngbâ na yâ ndoye ti Nzapa. Me tongana nyen Jéhovah ayeke futa ala so avoro lo na be-biani na so angbâ na yâ ndoye ti lo?

20, 21. Fini so ayeke “tâ fini biani” ayeke ti so wa? Na ngbanga ti nyen a yeke mbeni pendere beku mingi?

²⁰ Jéhovah afuta ye na awakua be-ta-zo ti lo na mungo na ala fini, me a yeke duti mara ti fini wa? Mo pensé ti mo so fini la mo yeke na ni fadeso? Mingi ti e alingbi ti tene: ‘Me so mara ti hundango tënë ti nyen la tongaso? E yeke hu pupu, e yeke te ye na e yeke nyon ngu. Gi zo so ayeke na fini la alingbi ti sala aye so.’ Nga, na angoi so tele ti e anzere mingi, e lingbi même ti tene: “Tâ gi gigi ni la awe!” Ye oko, Bible afa so, ti tâ tënë ni, fini so ayeke tâ fini biani, zo oko laso ayeke na ni pëpe.

²¹ Mbeti ti Nzapa awa e ti “gbu fini so ayeke tâ fini biani.” (1 Timothée 6:19). Atënë so afa so “fini so ayeke tâ fini biani” ayeke mbeni ye so e yeke gi ti wara me so ade ti si pëpe. Biani, tongana e ga ande mbilimbili-kue, a yeke na ngoi ni so la e yeke wara tâ fini ni, teti e yeke duti ande na fini so Nzapa aye giriri ti tene e duti na ni. Tongana e yeke duti ande na yâ ti mbeni paradis na ndo sese, na yâ se-tele, siriri nga na ngia, a yeke na ngoi ni so la e yeke wara “fini so ayeke tâ fini biani”, so ti tene fini ti lakue lakue (1 Timothée 6:12). Mara ti beku tongaso ayeke pendere mingi na mo pëpe?

22. Mo lingbi ti sala tongana nyen ti “gbu fini so ayeke tâ fini biani”?

²² E yeke sala tongana nyen ti “gbu fini so ayeke tâ fini biani”? Gi na yâ mbeti ti lo so na Timothée, Paul awa aChrétien ti “sala nzoni”, na ti sala si “nzo kusala ti ala awu”. (1 Timothée 6:18). Na pekoni, aye ni mingi aluti na ndo lege so e yeke sala ye alingbi na atâ tënë so e manda na yâ ti Bible. Me Paul aye ti tene so gi anzoni kusala ti e so la asala si e wara “fini so ayeke tâ fini biani”? Oko pëpe, teti mara ti pendere beku tongaso aga na lege ti “grâce” ti  Nzapa wala nzobe ti lo so e lingbi na ni pëpe (aRomain 5:15). Ye oko, Jéhovah ayeke na ngia ti futa ala so ayeke sala na lo be-ta-zo. Lo ye si mo wara “fini so ayeke tâ fini biani”. Fini tongaso ti ngia, ti siriri na so ayeke hunzi lâ oko pëpe ayeke ye so aku ala so angbâ na yâ ndoye ti Nzapa.

23. Ngbanga ti nyen a yeke kota ye mingi ti ngbâ na yâ ndoye ti Nzapa?

²³ A yeke nzoni e oko oko e hunda tele ti e: ‘Mbi yeke voro Nzapa tongana ti so lo fa ni na yâ ti Bible?’ Tongana e sala kue si lâ oko oko kiringo tënë na hundango tënë so aduti ‘En’, a yeke fa so e yeke na ndo ti nzoni lege. E lingbi ti bâ biani so Jéhovah ayeke bata e. Fade lo yeke bata ala so aduti be-ta-zo na lo si ye ti sioni asi na ala pëpe na yâ lâ ti nda ni ti wusuwusu ti aye ti sese so. Jéhovah ayeke zi nga e na lo yeke gue na e na yâ pendere fini sese so ayeke ndulu ti si. E yeke ku tâ kungo na ngia ti bâ ngoi so na lê. Nga, e yeke duti ande na ngia mingi so e soro aye na lege ni na yâ lâ ti nda ni so. Tongana mo soro ye tongaso laso, fade mo yeke wara “fini so ayeke tâ fini biani”, fini so Jéhovah aye si mo wara ni teti lakue lakue.