Qidaame, Dotteessa 13, 2024 Iraani Israeele xaaddote qassuhu gedensaanni, Buusantino Mangistubba Dirijjitehu qaru borreessaanchi Antooniyo Gutireezi togo yiino: “Coye gaˈlabbi assanna qiissa hasiissannohu xaati. Xa coye qitiichisha agurre eemarama hasiissanno.”

 Alamete aana noo oli giddo Mereerimu Soojjaatira kae noo oli mitto lawishshaatilla.

 “Xaa yannara, alamete aana Layinkihu Alamete Oli kawa horo ikke egenninokkihu, lowo mundee duˈnantino oli ikkanni no; konni olinni 2 biliyoone yaano alamete daga giddo shoolki anga ikkanno manni gawajjamino.”—Buusantino Mangistubba Dirijjiteha Gaˈlabbote Amaale Mine, Arfaasa 26, 2023.

 Lowo mundee duˈnantino oli kaino gobbuwa giddo gama: Israeele, Gaaza, Sooriya, Azerbaajaani, Yukireene, Sudaane, Itiyophiya, Nijeri, Miyanimaari, hattono Heyiti. a

 Ikkina olu mamarolla uurranno? Alamete gashshaasine keere abbite affakka? Qullaawu Maxaafi mayyaanno?

 Yannankera alamete aana olu batiˈrasi, olu uurranno yanna mule ikkitinota leellishshanno. Olu batiˈrasi, yannankera ikkanno yine Qullaawu Maxaafi giddo himannoonniri woˈmanni noota leellishshanno. Qullaawu Maxaafi ninke yanna “alamete gumulo” yaanno.​—Maatewoosi 24:3.

•   “Olu luulonna olu duduwo macciishshitinanni. . . . Daga dagate aana, gashshootuno gashshootu aana ola kayisanno.”—Maatewoosi 24:6, 7.

 Yannankera olu batiˈrasi Qullaawu Maxaafi himani woˈmanno gede assitannohu hiittoonniitiro afate, “‘Goofimarchu Barri’ Woy Yanna Malaati Maati?” yaanno birxicho nabbawi.

 Qullaawu Maxaafi mannu mereero kaˈˈanno gaanci uurrannota kulanno. Kuni ikkannohu hiittoonniiti? Kuni ikkannohu mannu sharronni ikkikkinni Armagedooni olinniiti; kuni ‘Woˈmanka Dandaanno Maganihu batiˈru barri olaati.’ (Yohaannisi Ajuuja 16:14, 16) Konni oli gedensaanni, Maganu uyino hexxo garinni mannu ooso geedanno keere afidhe hagiidhitanno.—Faarso 37:10, 11, 29.

 Ola baala hunannohu Maganu oli daafira ledde afate, “Armagedooni Oli Maati?” yaanno birxicho nabbawi.