Arrishsho hoogoommero uullate aana heeshshote yinanniri diheeˈranno. Arrishsho, haqqe daro fushshitanno gede, daraartanno gedenna guma laaltanno gede kaaˈlitanno. Qoleno arrishsho, haqqe rumushshu widoonni bushshu giddonni waa adhite darchoho sayissanno gedenna wayi foorare ayyarete giddora eanno gede assitanno.

Xeenu, muxxe Maganu eltooti; baatto inteemmo sagale fushshitannohu xeena afidhurooti. Maganu gordunni xeena dirrisanno, hattono gidu laalanno wogga heedhanno gede assino; konni garinni sagale oye hagiirrunni wodananke kassi assanno.

Batinye annuwa maatensara gari sagalenna uddano shiqishate yaaddanno. Maganu Qaali yaannota wodanchi: “Hanni iima buubbanno cea laˈe; insa diwixidhanno; dimixxitanno; [gootaaraho] diwodhitanno. Ikkollana gordu Anniˈne itisannonsa. Kiˈne cea lowo geeshsha diroortinanni?”—Maatewoosi 6:25, 26.

“Dubbu daraaro ikkite lophitanno gara laˈe. . . . . ; Ani yeemmoˈneti kayinni, [Moote] Selemooni nafa kunni baalu ayirrinyisinni daraarote giddonni mittu daraarchi gede diuddiˈrino. . . . Maganu . . .  [hayisso] togo asse uddisiisannoha ikkiro, kiˈne hiitto roorse diuddisiisannoˈne?”—Maatewoosi 6:28-30.

Sagalenna uddano aannonke Magani, heeshshote hasiisannore wolereno afiˈneemmo gede kaaˈlannonketa dihuluullammeemmo. Maganu fajjo wonshineemmoha ikkiro, isi loosiˈne sagale fushshiˈneemmo gede woy hasiisannonkere hidhineemmo woxi heeˈrannonke gede looso afiˈnammora kaaˈlankera dandaanno.—Maatewoosi 6:32, 33.

Addanko, arrishsho, xeena, ceanna daraaro hendeemmo woyite, Magano banxeemmo gede assannonkehu ikkadu korkaati no. Aane noo birxichira, Kalaqaanchinke mannu oosora sokkasi kulino gara ronseemmo.