Manna Banxeemmota Leellisha Dandiineemmo Gara
Ninke baalunku umi manchi Addaami sircho ikkinoommo daafira, mitte maateeti. Mitte maate miilla mimmito baxxannonna ayirrissanno yine hendanniha ikkirono, xaa yannara togoo baxilli bashile diyiino. Baxannonke Maganinke hasiˈrannoti tenne diˈˈikkitino.
QULLAAWA BORRO BAXILLU DAAFIRA MAYITANNO?
“Manna umiˈne gede assitine baxxe.”—LEEWAAWOOTA 19:18.
“Baarigaaraˈne baxxe.”—MAATEWOOSI 5:44.
MANNA BAXATE YAA MAYYAATE?
Maganu Qaalisi giddo 1 Qorontoosi 13:4-7 aana baxillu daafira mayinoro wodanchi:
“Baxillu cincanno; baxillu elanno.”
Hanni tenne hedi: Wolootu cincite saˈannoheha, shaqqille leellishshannoheha, hattono soˈro loosittoro hanqitannohekkiha ikkiro mayi macciishshamannohe?
“Baxillu dihinaasanno.”
Hanni tenne hedi: Wolootu quwa saˈe huluullantannoheha woy dhiibbifattannoheha ikkiro mayi macciishshamannohe?
“Baxillu umisire diroorsiˈranno.”
Hanni tenne hedi: Wolootu yaattore macciishshitannohanna insa hedo calla maahoyye yite adhatto gede xixxiibbannohekkiha ikkiro dibaxisannohe?
“Baxillu koma dikiiranno.”
Hanni tenne hedi: Maganu loossino cubbira maaro eˈannore maaranno. Isi “cubbonke marro marro hige dikulanno; hanqino gedeennino diheeˈranno.” (Faarso 103:9) Koffi assinoommo manchi maarannonke woyite hagiidhineemmo. Hakko daafira ninkeno wolootu koffi assitannonke woyite maara hasiissannonke.—Faarso 86:5.
Baxillu “bunshete coyira dihagiidhanno.”
Hanni tenne hedi: Qarru iillannonke woyite wolootu iillinonke qarrinni hagiidhitannota dibanxeemmo. Hakko daafira, wolootaho qarru iillannonsa woyite wole agurina miiccinonkere ikkituro nafa dihagiidhineemmo.
Maganu atoote afiˈrate, manna baalanka konni garinni baxa hasiissannonke. Tenne assa dandiineemmoti mitte doogo, kaaˈlo hasiissannonsare kaaˈlate.
