Maarta yinanniti Guwatimaalaho heedhannoti mitte Yihowa Farciˈraasincho, Kekchii yinanni qaale coyiˈranno mannira Qullaawa Maxaafa rosiisate konne qaale rossanni no. Mitto barra, ise hospitaaletenni fulanni nooha mitto mancho laˈu. Maarta danasi laˈe, kuni manchi Kekchii qaale coyiˈranno manni heeˈrannohu ilaalaamu qachinni dayinoha ikkikki digatino yite heddu; hakko qooxeessira Yihowa Farciˈraasine hakkeeshshi geeshsha sabbakke diegentino. Maarta shiqqi yite hakkoye mancho Kekchii afiinni dandiitu geeshsha coyishiishshu.

 Maarta konne mancho Qullaawa Maxaafa xiinxallanno gede koyissusi. Isi xiinxalla baxannotanna xiinxallote baaxxanno woxi kayinni noosikkita kulise. Hakkiinni Maarta, Yihowa Farciˈraasine mannaho Qullaawa Maxaafa woxe baaxxikkinni xiinxallissannota kultusi. Qoleno, silketenni xiinxalla dandaannotanna maatesino gudisante xiinxalla dandiitannota xawissusi. Manchuno maahoyye yii. Isi Ispeenete Afoo coyiˈranna nabbawa dandaanno daafira, Maarta Ispeenete Afiinni qixxeessinoonnita Qullaawa Borrota Haaro Alame Tiro uyitusi. Qoleno, Kekchii Afiinni qixxeessinoonniha Qullaawu Maxaafi Addinta Mayyee Rosiisanno? yaannoha Qullaawa Maxaafa xiinxallate kaaˈlanno maxaafa uyitusi. Layinki lamalara, hakku manchi, minaamasinna lame oosonsa Qullaawa Maxaafa Maarta ledo silketenni xiinxalla hanafi. Insa lamalate giddo lame hige xiinxallanno. Maarta togo yitino: “Kekchii qaale gari geeshsha coyiˈra dandeemmakki daafira, Ispeenete qaalinni xiinxallineemmo; manchuno hasaambeemmore minaamasira tire kulannose. Oosonsa kayi Ispeenete qaale dandiitanno.”

 Kuni manchi beetekiristaanete qeesichaati. Isi Qullaawu Maxaafi xiinxallosinni rosinore beetekiristaane daanno mannira kula hanafi. Hakku mannino macciishshinore baxino; hakko daafira konne haaro roso mamiinni rosinoro hakkoye mancho xaˈmi. Manchuno Qullaawa Maxaafa xiinxallanni noota kulinsata, insano isi xiinxallannowa dagge macciishsha hanaffu. Mulenni, mito 15 ikkanno manni lamalate kiiro gamba yee Maarta ledo silketenni xiinxalla hanafi. Gedensoonni, insa baalunku manni macciishshanno gede silkete mule mayikirafoone wortanno.

 Maarta tenne Qullaawu Maxaafi xiinxallo daafira songose cimeeyyera kultuta, cimeeyyete giddo mittu hakkoye manna laˈˈara insa qacha marino. Hakkiinni kuni cimeessi, woradu aliidi laˈˈaanchi a wole bayicho shiqishannota Qullaawu Maxaafi lallawo daye macciishshanno gede hakkoye manna koyisi; hakko bayichira iillate kayinni umo makeenunni mitte saate, hakkiinni lekkatenni lame saate haˈra hasiissannonsa. Kuni manni daate maahoyye yii; konni garinni insa giddo 17 manni hakkoye gambooshshe dayino.

 Boode lamala gedensaanni, woradu aliidi laˈˈaanchinna wolootu Yihowa Farciˈraasine kuni manni heeˈrannowa marte shoole barra heedhino. Insa soodo soodo, jw.org aana noota Kekchii Afiinni qixxeessinoonnita Qullaawu Maxaafi viidiyubba leellishshannonsa; hattono Xaa Yannara Yihowa Fajjo Assitanni Noori Ayeooti? yitanno biroshere xiinxallissannonsa. Barra barra kayinni, JW Biroodikaastete aaninni mite pirogiraame leellishshannonsa. Qoleno woradu aliidi laˈˈaanchi, mittu mittunku manchi Qullaawa Maxaafa anna anna xiinxallanno gede assi.

 Hakkunni shoolu barri giddo, Yihowa Farciˈraasine martinowa qooxeessaho noohu wolu qachirano fulte sabbakkino, hattono baxxino gambooshshira manna koyissino. Roduuwu, hakko gambooshshira dayinoha 47 manna mittu mittunku addi addinni Qullaawa Maxaafa xiinxallanno gede koyissino. Tonaa mitte maate xiinxallate maahoyye yitino.

 Boodu agani gedensaanni, cimeeyye umo xiinxalla hanaffu maate heedhanno qachira lamalate kiiro gambooshshu heeˈranno gede assitu. Xa mito 40 ikkanno manni ganye gambooshshe daanno. Qoleno roduuwu hakkiicho Yesuusi Reyo Qaagooshshe ayirrinsanni gede assituta, 91 manni gamba yiino daafira tashshi yiinonsa.

 Maarta, kuni woˈnaalshi hanafinonna lexxanni haˈrino gara hedde togo yitino: “Yihowa galaxxeemmasi. Mito woyite, garire asse afeemmakkiha lawannoe. Ikkirono Maganu loosisira guuta assankera dandaanno. Hakko qachira heeˈranno manni wodanira mayi nooro isi afino; hakko daafira mannisiwa abbinonsa. Yihowa insa lowo geya baxannonsa.”