Itulau Lua

Tausia Aʻe o ni Fanau e Maufaatuatuaina

Pe a vāai atu mātua i si a la pepe faatoʻā fanau mai, e mautinoa o le mea mulimuli lenei e la te mafaufau i ai: O le a tuputupu aʻe lenā pepe ma avea o se tagata matua, ma tausia e ia o ia lava. Ae o le fuafuaga lava lenā e tatau ona iai, ona o loo taʻua i le Tusi Paia “e tuua . . . e le tane lona tamā ma lona tinā.” (Kenese 2:24) O le tulaga lava foʻi lenā mo se tamaʻitaʻi talavou.

Peitaʻi, pe a tuua e le fanau le aiga, e lagona e mātua le faanoanoa, ae i le taimi e tasi e lagona foʻi le fiafia ona ua matutua i latou. Ae ona o le popole tele o mātua, e latou te toe mafaufau ai, ʻPe sa lelei le auala na ou tausia aʻe ai laʻu tama?’ ʻFaamata e mafai ona ia maua se galuega, maua se fale mautotogi, ma faasoasoa lelei tupe?’ Ae o le manatu e sili ona tāua, ʻPo o le a ola aʻe laʻu tama e tusa ma taʻiala na ma taumafai e aʻoaʻoina ai o ia?’—Faataoto 22:6; 2 Timoteo 3:15.

I lenei lomiga faapitoa o le Ala Mai!, o loo faamatalaina ai le auala e fesoasoani ai i mātua fautuaga mai i le Tusi Paia, a o tuputupu aʻe le tamaitiiti.