1. O le ā le mea na mātaulia ai galuega a le Atua mai lava i le amataga?

NA AUTASI Ieova ma Iesu mai lava i le amataga o le foafoaga. Na muamua ona foafoaina e Ieova Iesu a o leʻi faia isi mea uma. Sa galulue faatasi foʻi Iesu ma Ieova, ma avea ai Iesu o “se tufuga poto.” (Faata. 8:30) Sa galulue felagolagomaʻi foʻi auauna a Ieova i galuega sa latou faia. O se faaaʻoaʻoga, na fausia faatasi e Noa ma lona aiga le vaa. Mulimuli ane, sa galulue faatasi Isaraelu i le fausia o le faleʻie paia, tatala i lalo, ma feaveaʻi mai lea nofoaga i lea nofoaga. I le malumalu, sa latou pepese faatasi ma faaaogā meafaifaaili e vivii ai iā Ieova i pesega mālie. Sa mafai ona faia e tagata o Ieova nei mea uma ona sa latou felagolagomaʻi.—Kene. 6:14-16, 22; Nu. 4:4-32; 1 No. 25:1-8.

2. (a) O le ā sa mataʻina ai le faapotopotoga Kerisiano i le uluaʻi senituri? (e) O ā fesili o le a tatou iloiloina?

² Sa galulue felagolagomaʻi foʻi Kerisiano i le uluaʻi senituri. Na faamatalaina e le aposetolo o Paulo sa autasi i latou e ui e eseese o latou tomai ma tofiga. Na latou mulimuli uma  lava i lo latou Taʻitaʻi o Iesu Keriso. Na faatusaina e Paulo i latou i se tino e eseese ona vaega ae galulue faatasi. (Faitau le 1 Korinito 12:4-6, 12.) Ae faapefea i tatou i aso nei? E faapefea ona tatou felagolagomaʻi i le galuega talaʻi, i le faapotopotoga, ma le aiga?

3. O le ā le vaaiga na iloa e le aposetolo o Ioane?

³ I le uluaʻi senituri, na maua ai e le aposetolo o Ioane se vaaiga o agelu e toʻafitu o loo ili a latou pū. Ina ua ili e le agelu lona lima lana pū, na vaaia ai e Ioane “le fetu ua paʻū mai i le lagi i le lalolagi.” Na faaaogā e lenā “fetu” le ki e tatala ai se tō pogisa ma loloto. Na alu aʻe muamua le asu mai le tō ona lolofi mai ai lea o sē akerise mai le asu. Nai lo le faaleagaina o laau, na osofaʻia e nei sē akerise i latou e lē o iai “le faamaufaailoga a le Atua i o latou muāulu.” (Faaa. 9:1-4) Na iloa e Ioane e mafai e nei sē akerise ona faia se faatamaʻiaga tele, e pei ona tupu i Aikupito i le taimi o Mose. (Eso. 10:12-15) O sē akerise na vaaia e Ioane, ua faaata mai ai Kerisiano faauuina o loo talaʻia se feʻau malosi e faatatau i tapuaʻiga sesē. Ua aufaatasi atu i ai le faitau miliona o ē e faamoemoe e ola e faavavau i le lalolagi. Ua autasia i latou i lenei galuega talaʻi. Ua fesoasoani lenei galuega i le toʻatele ina ia ō ese ai mai i tapuaʻiga sesē, ma saʻoloto mai i le pule a Satani.

4. O le ā le galuega e tatau ona faia e tagata o le Atua, ma e na o le ā le auala e mafai ona latou faatinoina ai?

⁴ Ua tatou maua le tofiga o le talaʻia o le “tala lelei” i tagata i le lalolagi aoao a o leʻi oo mai le iʻuga. E matuā telē lenei galuega! (Mata. 24:14; 28:19, 20) E tatau ona tatou valaaulia so o se tasi ʻe fia inu i le vai o le ola.’ O lona uiga, e tatau ona tatou aʻoaʻo atu upu moni iā i latou uma o ē e fia malamalama. (Faaa. 22:17) Peitaʻi, e faatoʻā mafai ona tatou faia faapea pe afai e tatou te “fesootaʻi lelei,” ma galulue felagolagomaʻi i le faapotopotoga.—Efe. 4:16.

5, 6. E faapefea ona tatou autasi a o talaʻia le tala lelei?

⁵ E tatau ona maopoopo la tatou galuega talaʻi, ina ia mafai ai ona oo atu i le toʻatele o tagata. O le a fesoasoani le taʻitaʻiga tatou te maua mai i a tatou faapotopotoga e faia ai faapea. Pe a māeʻa le feiloaʻiga mo le faiva i le fanua, ona tatou ō lea e talanoa i tagata e faatatau i le tala lelei o le Malo. E tatou te ofo atu foʻi i ai lomiga faale-Tusi Paia. O le mea moni, ua tatou tufaina atu le faitau miliona o nei lomiga i le lalolagi aoao. O nisi taimi, e talosagaina ai i tatou ia auai i se tauiviga faapitoa i le talaʻiga. Pe a tatou faia lenei galuega, ua autasia i tatou ma le faitau miliona o isi i le lalolagi aoao, o loo talaʻia le feʻau lava lea e tasi. O loo tatou galulue faatasi foʻi ma agelu o loo fesoasoani i tagata o le Atua, e talaʻia le tala lelei.—Faaa. 14:6.

⁶ Maʻeu le fiafia e faitau i iʻuga lelei o le galuega talaʻi i le lalolagi aoao! Seʻi manatu i lo tatou autasi i le lalolagi aoao pe a tatou valaaulia tagata i a tatou tauaofiaga. E tutusa le polokalame e tatou te faalogologo uma ai. Ua faalaeiauina i tatou i lauga, tala, ma faataʻitaʻiga ina ia tatou faia le mea sili mo Ieova. Ua autasia foʻi i tatou ma uso ma tuafāfine i le lalolagi aoao, pe a tatou auai i le Faamanatuga i tausaga taʻitasi. (1 Kori. 11: 23-26) E tutusa le aso e tatou te potopoto faatasi uma ai iā Nisani 14, pe a mavae le goto o le lā, e faaalia ai lo tatou lotofaafetai mo le mea na faia e Ieova mo i tatou, ma usiusitaʻi ai i le poloaʻiga a Iesu. I vaiaso a o lumanaʻi le Faamanatuga, e tatou te galulue faatasi e valaaulia le toʻatele o tagata ina ia auai mai i lenei faatasiga tāua.

7. O le ā ua mafai ona tatou faia a o tatou galulue faatasi?

⁷ E lē telē se faatamaʻiaga e mafai ona faia e se sē akerise se tasi. E lē mafai foʻi ona oo atu le talaʻiga i tagata uma pe a tatou talaʻi na o i tatou. Ae ona o loo tatou galulue faatasi uma, ua mafai ai ona faailoa atu i le faitau miliona o tagata le poto e faatatau iā Ieova, ma fesoasoani i isi e viia ma faamamaluina o ia.

8, 9. (a) O le ā le faataʻitaʻiga na taʻua e Paulo e aʻoaʻo ai Kerisiano ina ia tausia le autasi? (e) E faapefea ona tatou galulue felagolagomaʻi ma le faapotopotoga?

⁸ Na faamatala atu e Paulo i Kerisiano i Efeso le auala e faamaopoopo ai le faapotopotoga, ma na ia faapea atu e tatau i tagata uma o le faapotopotoga ona ʻtuputupu aʻe i mea uma.’ (Faitau le Efeso 4:15, 16.) Na faaaogā e Paulo le tino e fai ma faaaʻoaʻoga, e faailoa mai ai e tatau i Kerisiano taʻitoʻatasi ona fesoasoani i le autasi o le faapotopotoga, ma mulimuli iā Iesu lo tatou Taʻitaʻi. Na ia faapea mai e galulue faatasi vaega uma o le tino e ala i “sooga uma, ina ia maua ai le mea e manaʻomia.” O lea, o le ā e mafai ona faia e Kerisiano taʻitoʻatasi e tusa pe e matua, talavou, malosi, pe vaivai?

⁹ Ua tofia e Iesu toeaina ina ia taʻimua i faapotopotoga, ma e finagalo o ia ina ia tatou faaaloalo ma mulimuli i la latou taʻitaʻiga. (Epe. 13:7, 17) E lē o se mea faigofie le faia faapea i nisi o taimi. Ae e mafai ona tatou ōle atu iā Ieova mo se fesoasoani. E mafai ona fesoasoani mai lona agaga paia, ina ia tatou usiusitaʻi i so o se taʻitaʻiga mai toeaina. Seʻi mafaufau i iʻuga lelei e oo i le faapotopotoga, pe afai e tatou te lotomaulalo ma galulue felagolagomaʻi ma toeaina. O le a autasi le faapotopotoga ma faamalosia ai le alofa o le tasi i le isi.

10. E faapefea ona fesoasoani auauna o le faiva i le autasi o le faapotopotoga? (Tagaʻi i le ata i luga aʻe o le matua.)

¹⁰ E fesoasoani foʻi auauna o le faiva i le autasi o le faapotopotoga. E latou te galulue mamafa e fesoasoani i le ʻautoeaina, ma e tatou te talisapaia a latou galuega uma. O se faaaʻoaʻoga, e faamautinoa e auauna o le faiva ua lava a tatou lomiga e faaaogā i le faiva, ma e latou te faafeiloaʻia tagata asiasi mai i a tatou sauniga. E latou te galulue mamafa foʻi e toe faaleleia le Maota mo Sauniga ma tausia mamā. Pe a tatou galulue felagolagomaʻi ma nei uso, o le a tatou autasi ma auauna iā Ieova i se auala maopoopo.—Faatusatusa i le Galuega 6:3-6.

11. E faapefea ona fesoasoani ē e talavou ifo i le autasi o le faapotopotoga?

¹¹ E tele tausaga o galulue mamafa nisi toeaina matutua i le faapotopotoga. Ae atonu ua lē toe tele ni mea e mafai ona latou faia e pei ona masani ai, ona ua faasolo ina matutua. E mafai ona fesoasoani uso e talavou ifo iā i latou. Pe afai e toleniina na uso, e mafai ona latou tauaveina nisi tiute tauave i le faapotopotoga. Pe a galulue mamafa foʻi auauna o le faiva, e mafai ona avea i latou ma toeaina  i le lumanaʻi. (1 Timo. 3:1, 10) Ua sili atu le agaʻigaʻi i luma o nisi toeaina talavou. O loo auauna nei i latou o ni ovasia o le matagaluega, ma fesoasoani i uso ma tuafāfine i le tele o faapotopotoga. E tatou te lotofaafetai pe a lotomalilie talavou e auauna atu i o latou uso ma tuafāfine.—Faitau le Salamo 110:3; Failauga 12:1.

12, 13. O le ā e mafai ona fesoasoani i le aiga atoa ina ia galulue faatasi?

¹² E faapefea ona tatou fesoasoani i sui o o tatou aiga e galulue felagolagomaʻi? E mafai ona fesoasoani iā i tatou tapuaʻiga a le aiga i vaiaso taʻitasi. Pe a faifaimea faatasi mātua ma le fanau e aʻoaʻoina e faatatau iā Ieova, o le a faamalosia ai le alofa o le tasi i le isi. A o faia na tapuaʻiga, e mafai ona faataʻitaʻi a latou taulimaga i le faiva, lea e fesoasoani iā i latou ina ia sauniuni lelei ai. O le a atili ai ona latou māfana pe a fetalanoaaʻi i le upu moni, ma vaaia le alolofa o tagata uma o le aiga iā Ieova, ma mananaʻo e faafiafiaina o ia.

¹³ E faapefea ona galulue faatasi le tane ma le avā? (Mata. 19:6) Pe a la alolofa uma iā Ieova ma auauna faatasi iā te ia, o le a fiafia ma autasi la laʻua faaipoipoga. E tatau foʻi ona faaalia le alofa faapelepele o le tasi i le isi, e pei o Aperaamo ma Sara, Isaako ma Repeka, faapea Elekana ma Hana. (Kene. 26:8; 1 Samu. 1:5, 8; 1 Pete. 3:5, 6) Pe a faia faapea e se tane ma se avā, o le a autasi i laʻua ma atili māfana atu iā Ieova.—Faitau le Failauga 4:12.

14. Pe afai e lē auauna lau paaga faaipoipo iā Ieova, o le ā e mafai ona e faia ina ia faamalosia ai lau faaipoipoga?

¹⁴ Ua taʻu manino mai e le Tusi Paia e lē tatau ona tatou faaipoipo i se tasi e lē auauna iā Ieova. (2 Kori. 6:14) Ae e iai nisi uso ma tuafāfine o loo faaipoipo i se tasi e lē o se Molimau a Ieova. Na aʻoaʻoina e nisi le upu moni ina ua uma ona faaipoipo, ma e leʻi avea a latou paaga o ni Molimau. Atonu o nisi na faaipoipo i ni auauna a Ieova, ae na mulimuli ane tuua e a latou paaga le faapotopotoga. I nei tulaga, ua faia e Kerisiano le mea sili e faamalosia ai a latou faaipoipoga, e ala i le usitaʻi i fautuaga a le Tusi Paia. E lē faigofie lenā tulaga i nisi o taimi. O se faaaʻoaʻoga, na auauna faatasi Mary ma lana tane o David iā Ieova. Ae mulimuli ane, na lē toe alu David i sauniga. Sa faaauau pea ona taumafai Mary e avea ma avā lelei ma faaalia uiga faa-Kerisiano. Na ia aʻoaʻoina foʻi lana fanau e toʻaono e faatatau iā Ieova, ma faaauau ona auai i sauniga ma tauaofiaga. I tausaga mulimuli ane, ina ua matutua le fanau ma tuua le aiga, sa auauna pea Mary iā Ieova e ui i le faigatā o lea tulaga. Na amata ona faitau e David lomiga na tuu e Mary mo ia, ma na iai le taimi na toe auai ai o ia i nisi o sauniga. E masani ona taofi e le atalii o lona atalii se nofo mo ia, ma pe afai e lē auai atu David e faapea atu le tamaitiiti: “Papa, na ou misia lava oe i le sauniga.” Na toe foʻi David iā Ieova ina ua mavae le 25 tausaga, ma o loo laʻua fiafia faatasi ona ua mafai ona la toe auauna iā Ieova.

15. E faapefea ona fesoasoani ulugalii ua matutua i ulugalii talavou?

¹⁵ Ua osofaʻia e Satani aiga i aso nei. O se tasi lenā o māfuaaga e tatau ai ona galulue faatasi se tane ma se avā o loo auauna iā Ieova. E tusa lava po o le ā le umi talu ona e faaipoipo, ia mafaufau i au faamatalaga ma au gaoioiga e faamalosia ai  lau faaipoipoga. Pe afai o oulua o se ulugalii faaipoipo ua matutua, e mafai ona avea oulua ma faaaʻoaʻoga lelei i ulugalii talavou. Atonu e te lua valaaulia se ulugalii i la oulua tapuaʻiga a le aiga. O le a laʻua iloa ai e tusa po o le ā le umi talu ona faaipoipo, e tatau lava ona autasi ma faaalia le alofa faapelepele o le tasi i le isi.—Tito 2:3-7.

16, 17. O le ā e tulimataʻia e auauna autasi a le Atua?

¹⁶ Ina ua faimalaga atu tagata Isaraelu i tausamiga i Ierusalema, na latou galulue felagolagomaʻi. Na latou saunia mea uma e manaʻomia mo le malaga. Ona latou faimalaga faatasi lea ma fesoasoani le tasi i le isi. Sa latou vivii ma tapuaʻi faatasi iā Ieova i le malumalu. (Luka 2:41-44) I aso nei, a o tatou sauniuni atu mo le lalolagi fou, e manaʻomia ona tatou autasi ma taumafai malosi e galulue felagolagomaʻi. Pe e mafai ona e manatunatu i ni auala e atili faaleleia ai lenei vala?

¹⁷ E fevaevaeaʻi ma fetauaʻi tagata o lenei lalolagi e faatatau i le tele o mea. Ae e tatou te lotofaafetai ona ua fesoasoani mai Ieova iā i tatou e maua le filemu, ma malamalama i le upu moni. O loo tapuaʻi ona tagata i le lalolagi aoao i le auala ua ia finagalo i ai. Ua sili atu ona autasi tagata o Ieova aemaise lava i nei aso e gata ai. E pei lava ona valoia mai e Mika ma Isaia, e tatou te ō aʻe faatasi i le “mauga o Ieova.” (Isa. 2:2-4; faitau le Mika 4:2-4.) Maʻeu lo tatou olioli o le a maua i le lumanaʻi, pe a “fesootaʻi lelei” tagata uma i le lalolagi ma galulue felagolagomaʻi e tapuaʻi iā Ieova!