O le ā le Manatu o Iesu i Faiga Faapolotiki?

NA FAAMATALA e tusitala o Evagelia nisi o mea na tutupu i le faiva a Iesu, lea na feagai tuusaʻo ai o ia ma faiga faapolotiki. O se faaaʻoaʻoga, ina ua faatoʻā uma ona papatiso Iesu i le 30 o ona tausaga, na ofo atu e le Tiapolo iā te ia le tulaga e avea ai ma pule o le lalolagi. I se taimi mulimuli ane i lana faiva, na mananaʻo se motu o tagata e fai o ia ma o latou tupu. I se isi foʻi taimi, na taumafai nisi tagata ina ia avea o ia o sē e lagolago malosi i faiga faapolotiki. O le ā le tali mai a Iesu? Seʻi o tatou iloiloina nei mea na tutupu.

Pule o le lalolagi. O loo taʻua i Evagelia, na ofo atu e le Tiapolo iā Iesu le tulaga e avea ai ma pule o “malo uma o le lalolagi.” Seʻi manatu i le tele o mea lelei na semanū e fai e Iesu i mafatiaga o tagata, pe ana ia talia le tulaga o le avea ma pule o le lalolagi! E lē taitai ona teena se ofo faapena e se tasi e naunau i faiga faapolotiki, ma e manaʻo ina ia manuia olaga o tagata. Peitaʻi, na teena e Iesu lenā ofo.—Mataio 4:8-11.

Tupu. Na naunau le toʻatele o le tupulaga a Iesu, ina ia maua se tupu e mafai ona foʻia faafitauli tau tamaoaiga, ma faiga faapolotiki. Na mananaʻo tagata ina ia auai Iesu i faiga faapolotiki ona na latou maofa i ona tomai. O le ā lana tali mai? Na tusi le tusitala o le Evagelia o Ioane: “Ua silafia e Iesu o le a ō mai i latou e puʻe iā te ia e fai ma tupu, ona maliu ese ai lea na o ia i le mauga.” (Ioane 6:10-15) E manino mai, na teena e Iesu le faia o sana vaega i faiga faapolotiki.

Sē e lagolago malosi i faiga faapolotiki. Mātau le mea na tupu a o lumanaʻi le maliu o Iesu. Na talanoa atu iā Iesu soo o le ʻau Faresaio, o ē na mananaʻo e tutoʻatasi mai i le Emepaea o Roma, atoa ai ma tagata Herotiano, o ē na fiafia i le pulega a Roma. Na latou mananaʻo e faamalosia o ia ina ia iai sona tofiga i faiga faapolotiki. Na latou fesili atu pe e tatau i tagata Iutaia ona totogiina lafoga iā Roma.

Na faamauina e Mareko le tali a Iesu: “ʻAiseā ua outou tofotofo mai ai iā te aʻu? Aumai se  tenari seʻi oʻu vaai i ai.’ Ona latou avatu lea o le tenari. Ua ia fetalai atu iā i latou: ʻO ai e ona le ata ma le igoa lea?’ Ua latou tali mai: ʻO Kaisara.’ Ona faapea atu lea o Iesu: ʻIa totogi atu mea a Kaisara iā Kaisara, a o mea a le Atua ia avatu i le Atua.’” (Mareko 12:13-17) Ua faapea mai se faamatalaga a le tusi Church and State—The Story of Two Kingdoms e uiga i le māfuaaga o le tali a Iesu: “E leʻi manaʻo o ia e avea o sē e maualuga i faiga faapolotiki, ma na ia faamaʻoti atu mea e tatau ona avatu iā Kaisara, ma mea e tatau i le Atua.”

E ui e leʻi auai Iesu i faiga faapolotiki, ae e leʻi faapea ai na ia manatu māmā i mafatiaga o tagata ona o le mativa, amio leaga, ma le lē faamasinotonu. O le mea moni, ua faaalia i le Tusi Paia na ootia ona faalogona ona o tulaga mafatia o tagata. (Mareko 6:33, 34) Peitaʻi, e na te leʻi faia ni gaoioiga e aveese ai le lē faamasinotonu, e ui lava na taumafai nisi ina ia faia sana vaega i mataupu tau i faafitauli i na aso.

Ua faaalia manino mai i nei faaaʻoaʻoga, na teena e Iesu le faia o sana vaega i faiga faapolotiki. Ae e faapefea Kerisiano i aso nei? O le ā e tatau ona latou faia?