Isaia 57:1-21
57 Ua fano lē ua amiotonu,Ae e leai se isi e manatu i ai.
Ua aveesea* tagata faamaoni,+Ae ua lē mātauina e se isi ua aveesea le tagata amiotonuOna o le mala.
2 Ua ulu atu o ia i le filemu.
Ua latou mālōlō i o latou moega,* o i latou uma ua savavali ma le tonu.
3 “A o outou, ia outou faalatalata mai i inei,O outou o fanau tama a le fafine vavalo,O fanau a lē e mulilua ma le fafine talitane:
4 O ai ua outou aamu i ai?
O ai ua faamaga i ai o outou gutu, ma faaeto i ai o outou laulaufaiva?
Pe e lē o outou ea o fanau o le solitulafono,O fanau foʻi o le pepelo,+
5 O ē e faatupu le manaʻo i atua sesē i mea ua iai laau tetele,+I lalo o laau lauolaola uma,+O ē e fasiotia fanau i vanu,*+I lalo o maluapapa?
6 Ua e filifilia maa lamolemole o le vanu.*+
Ioe, o mea ia ua fai ma ou tofi.
Ua e liligi atu fo‘i i ai le taulaga i meainu, ma ofo atu i ai meaalofa.+
Pe e faamalieina ea aʻu* i ia mea?
7 Ua e tuu lou moega i le tumutumu o le mauga maualuga,+Ma ua e alu aʻe i inā ina ia faia ai taulaga.+
8 Ua e tuuina se faatusa i totonu o lou fale.*
Ua e tuulafoaʻi aʻu ma faalēlavalavā iā te oe lava;Ua e alu aʻe ma faalautele atu lou moega.
Ua e osia fo‘i se feagaiga ma i latou.
Ua e fiafia i lo latou moega,+Ma ua e vaai pea i le totogasā o le tane.*
9 Ua e alu ifo ma le suāuu iā Meleke,*Ma le tele o au uu manogi.
Ua e auina atu au avefeʻau i mea mamao,Ma ua e alu ifo ai i le Tuugamau.*
10 Ua e galue mamafa ina ia mulimuli i le tele o ou ala,Ae ua e lē fai mai, ‘Ua siliga se faamoemoe!’
Ua toe faafouina lou malosi.
O le mea lea ua e lē faavaivai ai.*
11 O ai na e fefe ma mataʻu i aiUa e pepelo ai?+
E te le‘i manatua a‘u.+
E te le‘i teua se mea i lou loto.+
Talu ai ou te le‘i tautala atu ma faia se mea e tusa ai o au gaoioiga,+
O lea, ua e lē fefe ai iā te aʻu.
12 O le a ou faaalialia lou faatagā amiotonu+ ma au galuega,+Ma o le a lē aogā ia iā te oe.+
13 Pe a e alaga atu mo se fesoasoani,E lē laveaʻiina oe e au faaputuga tupua.+
O le a aveese ia mea uma e le matagi,E aveese foʻi ia mea e se mānava,A o lē e sulufaʻi mai iā te aʻu o le a fai le laueleele ma ona tofiMa nofo i loʻu mauga paia.+
14 O le a faapea mai se isi, ‘Inā outou faia ia, inā faia ia se auala! Ia faalaulelei le ala!+
Ia aveese so o se mea o loo faalavelave i le ala o loʻu nuu.’”
15 Auā o le fetalaiga lenei a Lē ua Silisili ma Maualuga,O lē e soifua* e faavavau+ ma o lē e paia lona suafa:+
“Ou te nofo i le mea maualuga ma le mea paia,+E ma te mau foʻi ma lē ua nutimomoia ma faamaulalo,Ina ia faafouina loto o ē ua faamaulaloMa faafouina loto o ē ua nutimomoia.+
16 Auā e lē faavavau ona ou tetee iā i latouPe tumau pea ona ou ita;+Auā o le a vaivai le loto o le tagata ona o aʻu,+E oo lava i foafoaga o loo mānava na ou faia.
17 Na ou ita ona o lona sa‘ilia o polofiti i faiga faagaoi,+O lea na ou taia ai o ia ma natia oʻu foliga, ma na ou ita.
Ae ua savali pea o ia ma le fouvale+ e tusa ma lona lava loto.
18 Ua ou vaai i ona ala,Ae o le a ou faamālōlōina o ia+ ma taʻitaʻi iā te ia+Ma toe faamāfanafana iā te ia,+ ma i latou o loo faanoanoa faatasi ma ia.”+
19 Ua fetalai mai Ieova: “O loo oʻu faia le fua o laugutu.
O le a foa‘i atu le filemu e lē mavae i lē ua mamao atoa ma lē ua lata mai,+Ma ou te faamālōlōina o ia.”
20 “A o ē e amioleaga, ua pei i latou o le sami ua sousou, e lē mafai ona malū,Ae e laga aʻe i luga e le suāsami o limu ma le palapala.”
21 Ua fetalai mai loʻu Atua: “E leai se filemu i ē e amioleaga.”+
Faamatalaga Pito i Lalo
^ E faasino atu i le feoti.
^ E faasino atu i le tuugamau.
^ Po o “ālia.”
^ Po o le “Pe e faamāfanafanaina ea aʻu.”
^ Po o le “ālia.”
^ Epe., “i tua o le faitotoʻa ma pou o le faitotoʻa.”
^ Atonu e faasino atu i tapuaʻiga i tupua.
^ Pe atonu “i le tupu.”
^ Po o “Seoli.” Tagaʻi i le Uiga o Upu.
^ Epe., “lē fiu ai.”
^ Po o le “afio.”
