Imagjino këtë situatë: Karola, një minorene, s’ka as dhjetë minuta që ka shkuar në festë kur dëgjon nga pas një zë të njohur.

Karola kthehet dhe sheh shoqen e saj, Xhesikën, me dy shishe të sapohapura, që duket se kanë alkool. Ia zgjat njërën Karolës dhe i thotë: «Nuk je edhe aq e vogël, sa të mos bësh pak qejf, apo jo?»

Karola nuk do që ta pranojë shishen, mirëpo Xhesikën e ka shoqe, dhe nuk do që shoqja e saj të mendojë se është e mërzitshme. Përveç kësaj, Xhesika është vajzë e mirë. Nëse pi ajo, nuk duhet të jetë dhe aq e gabuar. «Hë, se pije është,—thotë me vete Karola.—Nuk është se po marr drogë.»

Po të ishe në vend të Karolës, çfarë do të bëje?

Që të marrësh një vendim të mençur në situata të tilla, duhet të kesh një identitet. Identiteti është ndjesia e brendshme që të tregon se kush je dhe cilat janë bindjet e tua. Kur di këtë, do të kesh forcën për ta kontrolluar ti jetën tënde e jo të tjerët.—1 Korintasve 9:26, 27.

Si mund ta zhvillosh këtë lloj force? Një fillim i mirë është të shqyrtosh këto pyetje.

Kur di aftësitë dhe cilësitë e mira që ke, do të kesh më shumë besim te vetja.

SHEMBULL BIBLIK: Apostulli Pavël shkroi: «Edhe nëse nuk jam i zoti në të folur, sigurisht që nuk jam i tillë në njohuri.» (2 Korintasve 11:6) Meqë kishte kuptueshmëri të thellë për Shkrimet, Pavli mbeti i palëkundur përballë presionit. Komentet negative të të tjerëve nuk ia dobësuan besimin te vetja.—2 Korintasve 10:10; 11:5.

ANALIZO VETEN: Shkruaj një talent ose aftësi që ke.

Tani përshkruaj një pikë të fortë tënden. (Për shembull, a je i kujdesshëm, bujar, i besueshëm apo i përpiktë?)

Ashtu si fortësia e një zinxhiri varet nga hallka e tij më e dobët, edhe identiteti yt mund të vihet në rrezik nëse i lejon pikat e dobëta të të kontrollojnë.

SHEMBULL BIBLIK: Pavli ishte i vetëdijshëm për pikat e tij të dobëta. Ai shkroi: «Në të vërtetë, njeriu që jam përbrenda, kënaqet me ligjin e Perëndisë, kurse në gjymtyrët e mia shoh një tjetër ligj, që lufton kundër ligjit të mendjes sime e më bën rob të ligjit të mëkatit.»—Romakëve 7:22, 23.

ANALIZO VETEN: Cilat pika të dobëta duhet të mësosh të kontrollosh?

A do të hipje në një taksi dhe t’i thoshe shoferit t’i binte rreth e qark lagjes derisa t’i mbaronte karburanti? Do të ishte budallallëk dhe e kushtueshme.

Ç’mësim nxjerrim nga kjo? Synimet të ndihmojnë të kesh një drejtim në jetë e të mos sorollatesh. Ke një ide se ku do të shkosh dhe një plan si të arrish atje.

SHEMBULL BIBLIK: Pavli shkroi: «Mënyra se si vrapoj nuk është e pasigurt.» (1 Korintasve 9:26) Ai nuk lejoi që dallgët e jetës ta çonin andej-këtej, por vuri synime dhe jetoi në përputhje me to.—Filipianëve 3:12-14.

ANALIZO VETEN: Shkruaj tri synime që do të doje t’i arrije brenda vitit tjetër.

Pa bindje do të jesh i pavendosur. Si një kameleon, do të ndryshosh ngjyrë që t’u përshtatesh bashkëmoshatarëve, një shenjë e qartë që tregon se nuk ke identitetin tënd.

Në të kundërt, kur vepron sipas bindjeve të tua, ruan identitetin, pavarësisht se çfarë bëjnë të tjerët.

SHEMBULL BIBLIK: Kur ndoshta ishte ende adoleshent, profeti Daniel «ishte i vendosur në zemër» t’u bindej ligjeve të Perëndisë, edhe pse e kishin ndarë nga familja. (Danieli 1:8) Duke bërë kështu, jetoi në përputhje me atë që kishte vendosur, pra në përputhje me bindjet e veta.

ANALIZO VETEN: Cilat janë bindjet e tua? Për shembull: a beson te Zoti? Nëse po, pse? Çfarë të bind ty se ai ekziston?

A beson se normat morale të Perëndisë janë për të mirën tënde? Nëse po, pse?

Në fund të fundit, çfarë do të doje të ishe: një gjethe e rënë që e çon era andej-këtej apo një pemë që u qëndron edhe stuhive të egra? Forco identitetin dhe do të jesh si kjo pemë. Kështu do të mund t’i përgjigjesh pyetjes: kush jam unë?