YU KAN de seiker taki Yehovah o yepi yu te yu e drai kon baka na en. A o yepi yu nanga den broko-ede fu yu èn te sma hati yu firi. A o yepi yu tu fu kon abi wan krin konsensi di o meki yu abi wan korostu firi. Dati o meki taki yu o wani dini Yehovah baka makandra nanga tra brada nanga sisa. A situwâsi fu yu o de neleki di fu den Kresten fu a fosi yarihondro. Petrus ben skrifi den: „Unu ben de leki skapu di lasi pasi. Ma now unu drai kon baka na a sma di de un skapuman èn di e luku taki sani waka bun nanga unu.”​—1 Petrus 2:25.

A moro bun sani di yu kan du na fu drai kon baka na Yehovah. Fu san ede? Fu di yu o meki Yehovah ati prisiri (Odo 27:11). Soleki fa yu sabi, Yehovah abi firi tu. Sobun, den sani di wi e du kan meki a firi sari noso prisiri. A no de fu taki dati Yehovah no e dwengi wi fu lobi en èn fu dini en (Deuteronomium 30:19, 20). Wan Bijbel sabiman ben agersi wi ati nanga wan doro. A taki: „Wi ati de leki wan doro di yu no man opo fu dorosei, ma di yu kan opo soso fu inisei.” Sobun, nowan sma man opo yu ati gi yu. Na yu wawan kan du dati. Te wi e anbegi Yehovah nanga wan ati di furu nanga lobi, dan wi e opo a doro dati. Te wi e du dati, dan wi o tan gi yesi na en awansi san pasa. Disi na wan warti sani di e prisiri Yehovah ati srefisrefi. Iya, noti no kan meki wi firi moro koloku leki te wi e dini Yehovah na a fasi fa a wani.​—Tori fu den apostel 20:35; Openbaring 4:11.

Te yu e bigin dini Yehovah fayafaya baka, dan yu o de koloku (Mateyus 5:3). Sma na heri grontapu e aksi densrefi: ’Fu san ede wi de na grontapu?’ Den sma disi e angri fu kisi piki tapu aksi di abi fu du nanga a libi. Libisma wani kon sabi den sani dati fu di na so Yehovah meki den. A meki wi na so wan fasi taki wi o de koloku te wi e dini en. Nowan tra sani e gi wi so furu prisiri leki te wi sabi taki wi e dini Yehovah fu di wi lobi en.​—Psalm 63:1-5.

Sabi taki Yehovah wani taki yu drai kon baka na en. Fu san ede yu kan de seiker fu dati? Denki a sani disi: Den brada begi furu èn den denki bun di den meki a brochure disi. Kande wan owruman noso wan tra Kotoigi tyari en kon gi yu. Baka dati yu leisi en èn a naki yu ati so taki yu ben wani du wan sani. Ala den sani disi e sori taki Yehovah no frigiti yu, ma taki safrisafri a e hari yu kon baka na en.​—Yohanes 6:44.

A e trowstu wi fu sabi taki Yehovah noiti e frigiti den futuboi fu en di lasi pasi. Na dati wan sisa di nen Donna kon si. A taki: „Safrisafri mi komoto na ini a tru anbegi, ma furu leisi mi ben prakseri Psalm 139:23, 24, pe skrifi: ’Mi Gado, ondrosuku mi èn kon sabi mi ati. Luku mi finifini èn kon sabi den sani di e moro mi. Luku efu wan sani de di kan hati mi bakaten. Sori mi a pasi fu têgo libi.’ Mi ben sabi taki mi no ben de wan pisi fu grontapu trutru èn noiti mi no firi bun drape. Mi ben sabi taki mi ben musu de na ini na organisâsi fu Yehovah. Mi bigin si taki noiti Yehovah gowe libi mi. Na mi ben musu du muiti fu drai go baka na en. Mi breiti srefisrefi taki mi du dati.”

Wi e begi nanga wi heri ati taki yu srefi kan abi „a prisiri di Yehovah e gi” (Nehemia 8:10). Noiti a o hati yu taki yu drai kon baka na Yehovah.