Lobi brada noso sisa:

Soleki fa yu sabi, dan Bijbel e taki furu fu man nanga uma di ben e anbegi Gado. Furu fu den ben abi den srefi problema leki wi. Den „ben abi den srefi firi leki wi” (Yakobus 5:17). A libi ben hebi gi sonwan fu den èn den ben lai broko-ede. Famiriman noso tra anbegiman fu Yehovah ben du bun hati sani nanga wan tu fu den. Trawan ben kisi konsensi fonfon fu den fowtu di den ben meki.

Den sma disi ben frigiti Yehovah? Nôno. Furu fu den ben de neleki a psalm skrifiman di ben begi: „Mi waka lontu leki wan lasi skapu. Mi e begi yu fu suku mi, a futuboi fu yu, bika mi no frigiti den komando fu yu” (Psalm 119:176). Na so yu e firi tu?

Yehovah noiti no e frigiti den skapu fu en di lasi pasi. Ma a wani yepi den èn nofo tron a e gebroiki tra brada nanga sisa fu du dati. Luku fu eksempre fa Yehovah yepi en futuboi Yob di ben abi wan lo problema. Yob ben lasi ala en gudu, den pikin fu en dede èn a ben kisi wan takru siki. Den sma di ben musu trowstu en taigi en hati sani tu. Aladi Yob ben abi wan fowtu denki wan pisi ten, toku a no gowe libi Yehovah noiti (Yob 1:22; 2:10). San Yehovah du fu yepi Yob?

Yehovah gebroiki Elihu, wan tra anbegiman, fu yepi Yob. Di Yob ben e taki san de tapu en ati, dan Elihu arki en fosi a bigin taki. Ma san a ben o taki? A ben o krutu Yob? A ben o pruberi fu meki Yob firi syen so taki a ben o kenki a fasi fa a ben e denki? Elihu ben denki taki a bun moro Yob? Nôno, kwetikweti! A yeye fu Gado meki Elihu taki a sani disi: „A tru Gado e si mi neleki fa a e si yu. Misrefi meki fu doti tu.” Dan Elihu gi Yob a dyaranti disi: „Yu no abi fu frede mi. Mi no o taigi yu nowan hati sani fu broko yu” (Yob 33:6, 7). Na presi fu meki en moro hebi gi Yob, Elihu taki na wan switi fasi nanga Yob èn a gi en rai nanga deki-ati di a ben abi fanowdu.

Yu kan sabi taki wi ben abi den srefi sani dati na prakseri di wi skrifi a brochure disi. Wi arki bun san son brada nanga sisa di no ben e dini Yehovah moro ben taki èn wi luku fa a situwâsi fu den ben de (Odo 18:13). Dan wi suku rai na ini Bijbel, wi begi èn wi luku fa Yehovah yepi den futuboi fu en na ini owruten di den ben de na ini den srefi sortu situwâsi. Baka dati wi gebroiki den Bijbel tori dati nanga den ondrofenitori fu brada nanga sisa na ini a ten disi fu skrifi a brochure disi. Grantangi, ondrosuku a brochure disi. Sabi taki wi lobi yu trutru.

A Tiri Skin fu Yehovah Kotoigi