FA YU ben o feni en efu yu ben man du iniwan sani di yu wani? Yu e winsi son leisi taki nowan sma e taigi yu san fu du? We, taigi mi trutru, fa yu e denki fu a tori disi?—

Ma san yu feni moro bun? A moro bun te yu kan du iniwan sani di yu wani? Noso sani e waka moro bun te yu e gi yesi na yu papa nanga mama?— Gado e taki dati yu musu gi yesi na yu papa nanga mama. Sobun, wan bun reide musu fu de fu san ede yu musu du dati. Meki wi luku efu wi kan kon sabi san na a reide dati.

Omeni yari yu abi?— Yu sabi omeni yari yu papa abi?— Omeni yari yu mama, yu granmama, noso yu granpapa abi?— Den de na libi moro langa leki yu. Èn o moro langa wan sma e libi, o moro ten a sma dati abi fu leri sani. A e yere moro sani, a e si moro sani èn a e du moro sani ibri yari. Fu dati ede yongu sma kan leri fu sma di de moro owru.

Yu sabi wan sma di yongu moro yu?— Yu sabi moro sani leki a sma dati?— Fu san ede yu sabi moro sani leki a sma dati?— Dati  e kon fu di yu de na libi moro langa. Fu di yu libi moro langa leki wan sma di yongu moro yu, meki yu ben abi moro ten fu leri sani.

Suma de na libi moro langa leki yu, mi, noso iniwan tra sma?— Dati na Yehovah Gado. A sabi moro leki yu, èn a sabi moro leki mi. Te a e taigi wi fu du wan sani, dan wi kan de seiker taki dati na a yoisti sani fu du, srefi te a muilek gi wi fu du dati. Yu ben sabi taki wan leisi srefi a Bigi Leriman ben feni en muilek fu gi yesi?—

Wan leisi Gado aksi Yesus fu du wan sani di ben muilek srefisrefi. Yesus ben begi fu a sani dati, soleki fa wi kan si na tapu a prenki. A ben begi: ’Tata, efu yu wani, dan no meki mi du a muilek sani disi.’ Fu di Yesus ben e begi fu a sani disi, dan dati e sori taki a no ben de makriki ala ten fu du san Gado wani. Ma san Yesus ben taki na a kaba fu a begi fu en? Yu sabi dati?—

Na a kaba fu a begi fu en, Yesus ben taki: ’No meki sani pasa soleki fa mi wani, ma soleki fa yu wani’ (Lukas 22:41, 42). Iya, Yesus no ben wani du san ensrefi ben wani, ma a ben wani du san Gado wani. Èn na dati a du tu; a no du san ensrefi ben feni moro bun.

San wi kan leri fu a sani disi?— A sani disi e leri wi taki ala ten a bun fu du san Gado e taki, awansi dati no makriki son leisi. Ma wi e leri ete wan tra sani. Yu sabi san na dati?— Wi e leri taki Gado nanga Yesus no de a srefi sma, soleki fa son sma e taki. Yehovah Gado moro owru leki en Manpikin, Yesus, èn a sabi moro leki en.

Te wi e gi yesi na Gado, dan wi e sori en taki wi lobi en. Bijbel e taki: „Disi na san a lobi fu Gado wani taki, dati wi e du san den  komando fu en e taki” (1 Yohanes 5:3). Sobun, yu kan frustan taki wi alamala musu gi yesi na Gado. Yu wani gi yesi na en, a no so?—

Meki wi teki wi Bijbel, èn meki wi luku san Gado e taigi pikin-nengre fu du. Wi o leisi san Bijbel e taki na Efeisesma kapitel 6, vers 1, 2, nanga 3. A e taki: „Un pikin, gi yesi na un papa nanga mama soleki fa Masra wani, bika disi de regtfardiki: ’Gi grani na yu papa nanga yu mama’; disi na a fosi komando nanga wan pramisi: ’So taki a kan go bun nanga yu èn yu kan tan langa ten na grontapu.’”

Sobun, yu e si taki na Yehovah srefi e taigi yu fu gi yesi na yu papa nanga mama. San a wani taki fu „gi grani” na den? Dati wani taki dati yu musu lespeki den. Èn Gado e pramisi taki efu yu e gi yesi na yu papa nanga mama, dan a sa „go bun nanga yu”.

Meki mi fruteri yu wan tori fu wan tu sma di ben tan na libi fu di den ben gi yesi. Den sma disi ben libi wan langa ten pasa na ini a bigi foto Yerusalem. Furu fu den sma na ini a foto dati no ben e arki Gado, sobun, Yesus warskow den taki Gado ben o pori a foto fu den. Yesus taigi den sosrefi fa den ben kan feni kibri efu den ben lobi san bun. A ben taki: ’Te unu e si legre lontu Yerusalem, dan unu sa sabi taki a ten e doro taki a o kisi pori. Dati na a ten fu gowe libi Yerusalem èn fu lowe go na den bergi.’​—Lukas 21:20-22.

We, soleki fa Yesus ben taki, dan legre kon fu feti nanga Yerusalem. Den legre fu Rome ben seti kampu lontu a heri foto. Ne den srudati gowe, sondro taki sma ben sabi fu san ede. Furu sma ben prakseri taki den legre no ben o feti nanga den moro. Fu dati ede den tan na ini a foto. Ma san Yesus ben taigi den fu du?— San yu ben o du efu yu ben e libi na ini Yerusalem?— Den sma di ben bribi Yesus trutru, gowe libi den oso fu den, èn den lowe go na den bergi farawe fu Yerusalem.

 Wan heri yari langa, noti no pasa nanga Yerusalem. Baka tu yari, noti no pasa tu. Baka dri yari srefi, noti no pasa. Kande son sma ben prakseri taki den sma di ben gowe libi a foto ben don. Ma baka fo yari, den legre fu Rome kon baka. Agen, den seti kampu lontu a heri foto Yerusalem. Now a ben lati fu lowe gowe. Disi leisi, den legre pori a foto. Furu fu den sma na ini a foto dede, èn den wan di ben tan abra ben tron katiboman.

Ma san pasa nanga den wan di ben gi yesi na Yesus?— Den feni kibri. Den ben de farawe fu Yerusalem. Fu dati ede noti no pasa nanga den. Sani ben go bun nanga den fu di den gi yesi.

Sani sa go bun tu nanga yu te yu e gi yesi?— Kande yu papa nanga mama e taigi yu fu noiti no prei na strati. Fu san ede den e taki dati?— Na fu di wan oto kan naki yu. Ma wan dei yu kan prakseri:  ’Oto no e pasa na strati nownowde. Noti no o pasa nanga mi. Tra pikin e prei na strati, èn noiti mi si taki wan sani pasa nanga den.’

Na so furu sma na ini Yerusalem ben prakseri. Baka di den legre fu Rome gowe fu drape, dan a ben gersi leki nowan ogri ben o miti den. Tra sma ben e tan na ini a foto. Sobun, densrefi tan drape tu. Den ben kisi wan warskow, ma den no arki. A bakapisi ben de taki den lasi den libi.

Meki wi luku wan tra eksempre. Oiti yu prei nanga swarfu?— A kan de wan prisiri sani fu luku fa wan swarfutiki e bron te yu leti en. Ma problema kan kon te yu e prei nanga swarfu. A heri oso kan bron plata, èn yu kan dede!

Memre taki a no nofo fu gi yesi wanwan leisi nomo. Ma te yu e gi yesi ala ten, dan sani sa go bun nanga yu trutru. Èn suma na a sma di e taigi yu: „Un pikin, gi yesi na un papa nanga mama”?— A sma dati na Gado. Èn memre taki a e taigi yu dati fu di a lobi yu.