GI PAPA NANGA MAMA
7: Bun maniri nanga gwenti
SAN A WANI TAKI
Na a fasi fa wan sma e libi e sori sortu maniri a abi. Bijvoorbeeld, yu e du muiti fu de eerlijk ala ten? Efu dati de so, dan seiker yu e meki muiti fu leri yu pikin fu de eerlijk tu.
Wan sma di abi bun maniri abi bun gwenti tu. Bijvoorbeeld, a lobi fu wroko, a de eerlijk èn a e hori trawan na prakseri. A moro bun ten fu kweki den fasi disi na te wan sma yongu ete.
BIJBELTEKST: „Leri wan boi fu waka a yoisti pasi. Srefi te a kon owru, a no o komopo fu a pasi dati.”—Odo 22:6.
FU SAN EDE A PRENSPARI
Computer nanga Internet kan abi krakti tapu sma. Karin di de wan mama, e taki: „Den pikin fu yu kan sidon leti na yu sei aladi na a srefi ten den e luku sani di no bun srefisrefi. Den sani disi kan abi furu krakti tapu a fasi fa den e denki.”
BIJBELTEKST: „Lepi sma . . . leri fa fu gebroiki den frustan fu sabi san bun èn san no bun.”—Hebrewsma 5:14.
A prenspari tu fu abi bun gwenti. Fu eksempre, a gwenti fu taki sma tangi noso fu poti prakseri na trawan. Den sani disi na sani di furu sma no e du moro, fu di den e poti prakseri na tra sani leki den telefon.
BIJBELTEKST: „San unu wani meki sma du gi unu, na dati un musu du gi den tu.”—Lukas 6:31.
SAN YU KAN DU
Sori krin sortu maniri yu feni bun. Fu eksempre, ondrosukuman kon si taki yonguwan di leri taki a no bun fu abi seks fosi yu trow, e du moro muiti fu hori densrefi.
SAN YU KAN DU: Gebroiki wan sani di pasa fu bigin wan takimakandra fu a fasi fa sma e tyari densrefi. Fu eksempre, efu sma du ogri nanga trawan, dan yu kan taki wan sani leki: „Mi no man frustan fa sma kan du so wan hati sani nanga trawan. Fu san ede yu denki sma e du den sani disi?”
„A kan moro muilek gi yonguwan fu du san bun, efu den no sabi san bun noso san ogri.”—Brandon.
Leri den fu abi bun gwenti. Srefi den moro yonguwan kan leri fu taki trawan tangi èn fu poti prakseri na trawan. A buku Parenting Without Borders e taki: „O moro yonguwan e frustan taki den na wan pisi fu na osofamiri, fu wan skoro noso fu a libimakandra, o moro disi kan yepi den fu no du sani di e tyari wini gi densrefi nomo, ma gi trawan tu.”
SAN YU KAN DU: Gi den pikin fu yu wroko fu du so taki den kan leri o prenspari a de fu yepi trawan.
„Efu den gwenti du wroko now, dan a no o hebi gi den te den go libi den wawan. Den leri kaba fu tyari den frantwortu fu a libi.”—Tara.