GI TROWPAAR
1: Tai hori na makandra
SAN A WANI TAKI
Masra nanga wefi di e tai hori na makandra, e si a trowlibi leki wan sani di e tan fu ala ten. A sani disi e meki den de seiker taki a patna fu den e si a trowlibi leki wan seryusu sani èn taki srefi na ini muilek ten den no o gowe libi makandra.
Son trowpaar e tan na makandra fu di den e frede san famiri noso tra sma o denki te den o broko a trow. Ma a moro bun fu tai hori na makandra fu di un lobi èn e lespeki makandra.
BIJBELTEKST: „Wan masra no musu gowe libi en wefi.”—1 Korentesma 7:11.
„Efu yu e si a trowlibi leki wan seryusu sani yu no o atibron esi. Yu o de gaw fu aksi pardon èn fu gi makandra pardon. Un no o gi pasi taki problema ini a trowlibi meki taki un broko a trow.”—Micah.
FU SAN EDE A PRENSPARI
Trowpaar di no e si a trowlibi leki wan seryusu sani de gaw fu denki taki den no e fiti na makandra te problema kon ini den libi. Disi e meki taki den e suku fasi fu broko a trow.
„Furu sma e go trow nanga a denki taki efu sani no e go bun, dan den kan broko a trow. Disi e meki taki na a bigin kaba, den no e tai hori na makandra.”—Jean.
SAN YU KAN DU
AKSI YUSREFI
Te yu atibron tapu yu patna . . .
Yu e sari taki yu trow nanga en?
Yu e bigin denki fa a ben o de fu hori nanga wan tra sma?
Yu e taki sani leki, „mi o gowe libi” noso „mi o go suku wan tra sma di e warderi mi?
Efu yu piki iya tapu wan fu den aksi disi, dan nownow kaba yu musu du sani fu tai hori na yu trowpatna.
TAKI NANGA YU PATNA FU DEN SANI DISI
A de so taki wi no e si a trowlibi fu wi so prenspari moro? Efu dati de so, dan fa a du kon?
San wi kan du fu sori moro lobi gi makandra?
SAN YU KAN DU
Skrifi wan syatu brifi gi yu patna fu taigi en taki yu lobi en
Sori taki yu e tai hori na yu patna te yu de na wroko. Poti wan fowtow fu en tapu yu tafra
Bel yu patna ibri dei na wroko noso awinsi pe yu de
BIJBELTEKST: „San Gado tyari kon na wán, nowan sma musu prati.”—Mateyus 19:6.
