KANDE wan leisi yu pasa wan Kownukondre zaal fu Yehovah Kotoigi na ini yu birti, èn yu aksi yusrefi: ’San den sma e du drape?’ Yu ben sabi taki ala sma di wani, kan go na den konmakandra fu den, di e hori ibri wiki? Den e gi ala den sma di e kon drape, wan switikon.

Ma kande yu abi wan tu aksi. Fu san ede Yehovah Kotoigi e kon makandra? San e pasa na den konmakandra dati? San sma di no de Yehovah Kotoigi, taki di den go na den konmakandra dati?

Sensi owruten, sma ben e kon makandra fu anbegi Gado èn fu leri sabi en. Pikinmoro 3500 yari pasa, den Israelsma ben kisi a komando disi: „Meki ala sma kon makandra, iya, ala mansma, ala umasma, ala pikin, nanga ala trakondre sma di e tan na un mindri. Meki den arki èn meki den leri ala den wet disi, so taki den kan abi frede gi Yehovah un Gado, èn so taki den kan du ala san skrifi na ini den wet disi” (Deuteronomium 31:12). Sobun, na ini Israel, yongusma nanga owrusma ben leri fa fu anbegi èn gi yesi na Yehovah Gado.

Hondrohondro yari baka dati, di a Kresten gemeente seti, konmakandra ben de wan prenspari pisi fu a tru anbegi ete. Na apostel Paulus ben skrifi: „Meki wi poti prakseri na makandra tu, so taki wi kan gi makandra deki-ati fu abi lobi èn fu du bun wroko. No meki wi misi konmakandra, soleki fa son sma gwenti du, ma gi makandra deki-ati” (Hebrewsma 10:24, 25). Neleki fa memre fu wan osofamiri e kon kisi wan moro bun matifasi te den e du sani makandra, na so a lobi na mindri den sma di wani dini Gado, e kon moro tranga na den konmakandra pe Kresten e go fu anbegi Gado.

Soleki fa den Bijbel eksempre disi e sori, Yehovah Kotoigi e kon makandra tu na den Kownukondre zaal fu den, tu leisi na ini wan wiki. Den konmakandra e yepi den sma di de drape fu warderi Bijbel gronprakseri, fu frustan den sani dati, èn fu du den sani di Bijbel e leri. Te dati kan, dan a programa de a srefi na heri grontapu, èn ibri konmakandra de fu yepi sma fu du a wani fu Gado moro bun. Bifo den konmakandra bigin, èn baka dati, den wan di kon makandra, e taki fu sani di e „gi makandra deki-ati” (Romesma 1:12). San e pasa na ibriwan fu den konmakandra?

Nofo tron, a fosi konmakandra pe furu sma e go, na a konmakandra pe wan Bijbel lezing e hori di de gi ala sma. A lezing disi e hori tapu satra noso sonde. Nofo tron, Yesus Krestes ben e hori lezing pe furu sma ben kon arki. Wan fu den lezing noso takimakandra dati di furu sma sabi, na a Bergitaki (Mateyus 5:1; 7:28, 29). Na apostel Paulus ben taki nanga den sma fu Ateine (Tori fu den Apostel 17:22-34). Fu di Yehovah Kotoigi e teki den eksempre disi, meki wan lezing e hori di de spesrutu gi ala sma. A kan de so taki sonwan fu den sma kon na a konmakandra fu a fosi leisi.

A konmakandra disi e bigin nanga wan singi fu a buku Singi Prèisesingi gi Yehovah. *  Ala sma di wani, kan tanapu èn singi makandra nanga a gemeente. Baka wan syatu begi, wan brada di de wan bun takiman e hori wan lezing fu 30 miniti. (Luku a faki  „Wan tu moi Bijbel lezing”.) A lezing fu en teki puru fu Bijbel. Nofo tron a takiman e aksi den arkiman fu suku den Bijbeltekst di abi fu du nanga a tori di a e taki, èn fu luku na ini den Bijbel te a e leisi den tekst. Fu dati ede, yu kan tyari yu eigi Bijbel kon, noso yu kan aksi wan fu den Kotoigi fu Yehovah wan Bijbel, bifo a konmakandra bigin.

Na ini furu gemeente fu Yehovah Kotoigi, a Waktitoren-studie e hori baka a Bijbel lezing. A Waktitoren-studie na wan Bijbel takimakandra fu wán yuru, pe den arkiman kan gi piki tapu den aksi di wan brada e poti. A konmakandra disi e gi den sma di de drape a deki-ati fu teki na eksempre fu den Bereasma na ini a ten fu Paulus. Den sma disi ben „teki a wortu nanga den heri ati, èn den ben e ondrosuku Gado Buku finifini”.—Tori fu den Apostel 17:11.

A Waktitoren-studie e bigin nanga wan singi. A tori di den e taki fu en, èn den aksi di a brada e poti, teki puru fu A Waktitoren nanga studie-artikel. Yu kan aksi wan fu den Kotoigi fu Yehovah fu gi yu a tijdschrift dati. Disi na wan tu fu den tori di wi luku no so langa pasa na a Waktitoren-studie: „Papa nanga mama—Kweki un pikin nanga lobi”, „Te wan sma du unu wan ogri, dan no du a sma dati ogri baka”, èn „Heri esi nowan pina o de moro!” Aladi a brada di e hori a studie e poti aksi èn den arkiman e gi piki, toku na den sma di wani e gi piki.  Nofo tron den sma di e gi piki, leisi na artikel nanga den Bijbeltekst na fesi, èn den denki dipi fu den sani dati. A konmakandra e tapu nanga wan singi èn begi.—Mateyus 26:30; Efeisesma 5:19.

Wán neti ibri wiki, Yehovah Kotoigi e kon makandra baka na a Kownukondre zaal, pe wan programa fu dri pisi e hori na ini wán yuru nanga 45 miniti. A fosi pisi na a Gemeente Bijbelstudie di e hori 25 miniti langa. A pisi disi e yepi den wan di de drape fu kon sabi Bijbel moro bun, fu kenki a denki nanga den fasi fu den, èn fu go na fesi leki disipel fu Krestes (2 Timoteyus 3:16, 17). Neleki a Waktitoren-studie, a konmakandra disi na wan Bijbel takimakandra pe den arkiman kan gi piki tapu aksi di e poti. Den sma di wani gi piki, kan du dati. Nofo tron den e gebroiki wan buku noso wan brochure di abi fu du nanga Bijbel tori, èn di Yehovah Kotoigi tyari kon na doro.

Fu san ede den e gebroiki Bijbel publikâsi na a konmakandra? Na ini Bijbel ten, sma no ben musu leisi Gado Wortu nomo. „Den [ben] tyari den wèt kon na krin, èn den [ben] fruklari san den wèt wani taki. Den [ben] yepi a pipel fu kon frustan den sani di den leisi” (Nehemia 8:8). Na ini den yari di pasa, den Yehovah Kotoigi studeri buku di ben taki fu den Bijbel buku Yesaya, Danièl, nanga Openbaring. Den sma di ben go na den konmakandra dati, ben kon frustan den pisi disi fu Bijbel.

A Theokrasia Diniwroko-skoro e hori baka a Gemeente Bijbelstudie. A konmakandra disi di e hori 30 miniti na fu yepi Kresten fu kon kisi a „koni fu gi sma leri” (2 Timoteyus 4:2). Fu eksempre, a pasa wan leisi kaba taki yu pikin noso wan mati fu yu aksi yu wan sani di abi fu du nanga Gado noso Bijbel, èn di yu no ben man gi piki na  tapu? A Theokrasia Diniwroko-skoro kan leri yu fa yu kan gebroiki Bijbel fu gi bun piki tapu muilek aksi. Na so fasi wi kan taki a srefi sani disi di a profeiti Yesaya ben taki: „A Moro Hei Masra Yehovah srefi gi mi a tongo fu den wan di kisi leri, so taki mi kan sabi fa fu piki den wan di weri, nanga wan wortu.”—Yesaya 50:4.

A Theokrasia Diniwroko-skoro e bigin nanga wan lezing di teki puru fu wan pisi fu Bijbel. Den arkiman ben kisi a deki-ati fu leisi a pisi disi a wiki na fesi. Baka a lezing, a takiman e aksi den arkiman fu fruteri syatu sortu moi sani den feni na ini a pisi di den leisi. Baka a takimakandra disi, studenti di de tapu a skoro èn di abi wan lezing, e hori a pisi fu den.

Son studenti musu leisi wan pisi fu Bijbel na tapu a podium, noso den musu sori fa fu leri tra sma wan Bijbel tori. Baka ibri lezing, wan brada di abi ondrofeni e prèise a studenti fu den sani di a du bun, èn a e gebroiki a buku Kisi wini fu a Theokrasia Diniwroko-skoro fu du dati. Bakaten, a brada kan gi a studenti wan tu rai fa fu du wan tu sani moro bun.

A pisi disi fu a programa no de gi den studenti wawan, ma a de fu yepi ala sma di de drape fu leisi moro bun, fu taki moro bun èn fu gi leri moro bun. Baka te a Theokrasia Diniwroko-skoro kaba, a Diniwroko Konmakandra e bigin nanga wan singi di teki puru fu wan Bijbeltekst.

A lasti pisi fu a programa na a Diniwroko Konmakandra. Nanga yepi fu lezing, demonstrâsi, interview, èn nanga takimakandra pe den arkiman kan gi piki, den sma di de drape e kon sabi fa fu leri sma den tru tori fu Bijbel na wan bun fasi. Bifo Yesus seni den disipel fu en go preiki, a kari den kon makandra èn a gi den finifini bodoi (Lukas 10:1-16). Fu di den ben de srekasreka fu du a preikiwroko, meki den ben ondrofeni furu moi sani. Bakaten, den bakaman fu Yesus, fruteri en san den ben ondrofeni (Lukas 10:17). Nofo tron den disipel ben fruteri makandra tu san den ben ondrofeni.—Tori fu den Apostel 4:23; 15:4.

A programa fu a Diniwroko Konmakandra di e hori 35 miniti, skrifi na ini Wi Kownukondre diniwroko di e kon ibri mun. Wan tu tori di den ben taki fu den no so langa pasa na: „Anbegi Yehovah leki osofamiri”, „Fu san ede wi e go na sma ibri tron baka?”, èn „Du a preikiwroko neleki fa Krestes du dati”. A programa e kaba nanga wan singi èn wan brada fu a gemeente e taki a lasti begi.

Den gemeente e pruberi fu gi ibri sma wan switikon. Fu eksempre, Andrew ben yere furu takru sani fu Yehovah Kotoigi. Ma di a go a fosi leisi na wan konmakandra, a ben fruwondru fu si fa den sma ben gi en wan switikon. Andrew e taki: „A ben de wan prisiri sani fu de drape. Mi ben fruwondru fu si fa den sma drape abi switifasi èn fa den sori taki den wani kon sabi mi.”  Ashel, wan tini meisje fu Kanada e taki: „A konmakandra ben moi srefisrefi! Mi ben man frustan ala sani.”

Furu sma ben sabi José, di e libi na ini Brasyonkondre, leki wan sma di ben e atibron esi-esi. Toku a ben kisi wan kari fu go na wan konmakandra na a Kownukondre zaal na ini a birti fu en. José e taki: „Den sma na a Kownukondre zaal ben gi mi wan switikon, aladi den ben sabi fa mi ben e tyari misrefi fosi.” Atsushi, di e libi na ini Yapan, e taki: „Mi musu taki krin dati di mi ben go a fosi leisi na wan konmakandra fu Yehovah Kotoigi, mi ben firi pikinso fruferi. Toku mi ben kon si taki den sma disi de leki ala tra sma. Den ben e du furu muiti fu meki mi firi bun drape.”

Soleki fa den sma di kari na tapusei taki, dan yu kan ondrofeni tumusi moi sani te yu e go na den konmakandra na a Kownukondre zaal. Yu o kon sabi sani fu Gado, èn nanga yepi fu a Bijbel leri di yu o kisi drape, Yehovah Gado o leri yu fa yu kan „tyari wini kon gi yusrefi”.—Yesaya 48:17.

Yu no abi fu pai na den konmakandra fu Yehovah Kotoigi, èn den no e piki moni. Yu wani go na wan konmakandra na a Kownukondre zaal na ini yu birti? Yu e kisi wan switi kari fu kon.