A libi na ini Bijbel ten​—A gronman

„[Yesus] taigi den disipel fu en: ’Iya, a kotiwroko bigi, ma furu wrokoman no de. Fu dati ede, begi a Masra fu a kotiwroko meki a seni wrokoman fu go du a kotiwroko fu en.’”​—MATEYUS 9:37, 38.

NOFO TRON te Yesus ben wani leri sma prenspari sani, dan a ben e gebroiki agersitori di ben abi fu du nanga a fasi fa sma ben e du gronwroko èn nanga den wrokosani di den ben e gebroiki (Mateyus 11:28-30; Markus 4:3-9; Lukas 13:6-9). Fu san ede a du dati? Fu di a ben e libi na ini wan kontren pe furu sma ben e du gronwroko. Furu fu den sma di ben e arki en ben e du a gronwroko fu den leki fa sma ben e du en hondrohondro yari kaba. Den ben frustan en bun te a ben e taki fu den sani di den ben e du ala dei. Yesus ben sabi fa den sma disi ben e libi èn den sani di a ben e taki ben e doro na ati fu den.​—Mateyus 7:28.

Wi kan frustan den agersitori fu Yesus nanga tra tori na ini Bijbel moro bun te wi kon sabi pikinso fa den sma na ini a fosi yarihondro ben e wroko gron, san den ben e prani, sortu wrokosani den ben e gebroiki, èn sortu problema ben e miti den.

Wi o luku fa wan gronman e du a wroko fu en. Leisi den tekst di kari èn luku san yu kan leri fu den.

Wan ten fu sai

A gronman tanapu na en mofodoro. A e smeri a switi mamanten loktu èn a e hori en anu na en fesi-ede, so taki a leti fu a son di e opo kon no skèin na ini en ai. Alen meki taki a tranga drei gron kon safu. Now a ten doro fu plugu a gron. A e opo wan lekti udu plugu poti na tapu en skowru, dan a go na en gron.

 Drape a gronman e tyari den mankaw fu en kon na wán, a e fasi a plugu na den neki, dan a e dyuku den meki den bigin waka. Na isri pisi fu a plugu e beri go na ini a tranga gron. A no e drai a doti, ma a e krabu en nomo fu meki smara gotro (1). A gronman e du muiti fu hori a plugu leti-opo, so taki den gotro no kron. A no e luku go na baka, noso a plugu ben o waka kron (Lukas 9:62). A no mag pasa den marki fu a pikin pisi gron fu en èn a musu wroko en bun.

Now di a kaba meki gotro na ini a heri gron, a kan bigin sai. Nanga a wán anu a e syow wan saka nanga aleisi èn nanga a tra anu a e sai na aleisi. Na so a e panya den siri na ini a heri gron (2). A gron fu en abi futupasi pe sma gwenti waka. Dati meki a e sorgu taki den siri no fadon na tapu den pasi disi, ma „na tapu bun doti”.​—Lukas 8:5, 8.

Baka te a gronman kaba sai, a e teki taki fu makabon, dan a e tai den na den kaw fu en. A e meki den kaw srepi den taki pasa na ini a heri gron fu tapu den siri. Wan lo fowru e meki babari èn e suku fu nyan den pikin siri fosi a doti tapu den. Bakaten a gronman e gebroiki wan sortu tyapu (3) fu lusu a doti èn fu puru den takru wiwiri di kan kiri na aleisi bifo a kon lepi.​—Mateyus 13:7.

Wan ten fu koti

Den mun e pasa èn alen e fadon. Now a winti e wai den lepi aleisi-ede. Fu di a son e skèin na den tapu meki a gersi leki a heri gron weti.​—Yohanes 4:35.

Na a ten fu a kotiwroko a gronman nanga en osofamiri abi furu wroko fu du. Den wan di e du a kotiwroko e grabu den aleisitiki nanga den kruktu-anu èn nanga den reti-anu den e koti na aleisi nanga wan kron-nefi (4). Tra sma e tai den aleisitiki na ini bosu (5), dan den e poti den na tapu buriki noso na tapu wagi (6) di musu tyari den go na den presi na ini a dorpu pe den e masi aleisi.

A loktu blaw. A son di e skèin gersi wan weti olo na hemel. Na osofamiri e go rostu pikinso na ondro wan bigi figabon. Den e lafu, den e taki tori èn den e nyan brede, losi siri, olèif, drei figa, nanga korenti. Te den kaba, den e teki watra fu wan peti dringi esi-esi.​—Deuteronomium 8:7.

Na wan fu den gron di de krosibei, sma e waka e piki den aleisitiki di tan abra na ini a gron (7). Sonwan fu den sma dati na pôti sma di no abi den eigi gron.​—Deuteronomium 24:19-21.

 Bakaten, te den de na a presi na ini a dorpu pe den e masi aleisi, a gronman e panya den aleisitiki na tapu wan hei presi pe a gron tranga. A e meki mankaw waka lontu ibri tron baka na ini a presi fu hari wan hebi bradi planga na tapu den aleisitiki (8) (Deuteronomium 25:4). Srapu ston nanga pisipisi isri di den fasi na ondrosei fu a planga disi e koti den aleisitiki te a planga e grati pasa na den tapu.

A gronman e wakti teleki winti e bigin wai te bakadina (Rut 3:2). Son e dongo kaba te a e sutu wan udu forku noso wan „skopu fu wai aleisi” (9) go na ini na ipi aleisitiki, dan e fringi den go na loktu (Mateyus 3:12). A winti e wai den tikitiki gowe, ma na aleisi di moro hebi e fadon na gron. Na so a e du teleki a wai ala na aleisi.

A tra mamanten te son opo, a wefi fu a gronman nanga den umapikin fu en e poti na aleisi na ini manari (10). Den e seki den manari di lai nanga aleisi fu puru pikinpikin pisi doti nanga ston. Na aleisi e fadon go na ini baskita èn den doti den e trowe gowe. Disi leisi den koti furu nyanyan. Den wrokoman e poti pikinso fu na aleisi na ini bigi prapi (11). Ma na aleisi di tan abra den e kanti go na ini olo di den meki na ini a gron fu kibri sani.

A gronman tanapu na a presi pe den e masi aleisi. A e hari en baka, lusu en skin, èn a e luku den gron di de lontu a dorpu. A e firi bun te a e si den gron nanga den drei aleisitompu di e sori taki sma wroko tranga den dei di pasa. A e luku fa wrokoman e sorgu den droifidyari, den olèifbon, den granaki-aprabon, nanga den figabon. Wan sma di e libi krosibei fu en e wai anu gi en, aladi a e drai a doti na ini a pikin gron fu en. A gron o gi komkomro, pesi, bonki nanga ayun. A gronman e tanapu pikinso ete, dan a e luku go na loktu èn na ini wan syatu begi a e taigi Gado tangi fu den bun sani di a e gi sma.​—Psalm 65:9-11.

[Prenki na tapu bladzijde 28-30]

(Luku a tijdschrift)