San Kresten musu du na ini a ten disi?

TRU Kresten na ini a ten disi no e teki prati na politiek. Fu san ede? Fu di den e teki na eksempre fu Yesus. A ben taki fu ensrefi: „Mi no de wan pisi fu grontapu”, èn fu den bakaman fu en a ben taki: „Unu no de wan pisi fu grontapu” (Yohanes 15:19; 17:14). Meki wi luku wan tu sani di e sori fu san ede Kresten no musu teki prati na politiek.

1. Libisma no man du ala sani. Bijbel e taki dati libisma no man tiri densrefi èn taki den no abi a reti fu du dati tu. A profeiti Yeremia ben skrifi: „A no de na wan libisma di e waka fu taki srefi pe a o poti en futu.”​—Yeremia 10:23.

Libisma no man frei, fu di den no ben meki fu frei. Na so a de tu taki libisma no man tiri densrefi, fu di den no meki fu du dati. Di historia skrifiman David Fromkin ben poti prakseri na a problema fu den tirimakti, dan a taki: „Na libisma e tiri kondre, èn dati meki nofo tron den no abi bun bakapisi èn den no sabi san a tamara o tyari kon. Den abi makti, ma den no man du ala sani” (The Question of Government). Dati meki wi kan frustan fu san ede Bijbel e warskow wi fu no poti wi frutrow na tapu libisma!​—Psalm 146:3.

2. Ogri yeye abi makti nownowde. Di Satan ben taigi Yesus taki a ben o meki a tron tiriman fu grontapu, dan Yesus no taigi Didibri taki a no ben abi a makti fu gi en ala den kownukondre fu grontapu. Fu taki en leti, na wan tra okasi Yesus kari Satan „a tiriman fu grontapu”. Wan tu yari baka dati, na apostel Paulus kari Satan „a gado fu a grontapu disi” (Yohanes 14:30; 2 Korentesma 4:4). Paulus ben skrifi den Kresten brada nanga sisa fu en: ’Wi e feti nanga den tiriman fu a dungru grontapu disi, nanga den ogri yeye na hemel’ (Efeisesma 6:12). Furu sma no sabi srefi taki na den ogri yeye na den trutru tiriman fu a grontapu disi. Sortu krakti dati musu abi na tapu a fasi fa wi e si politiek?

Luku na eksempre disi: Neleki fa a watra fu bigi sula e tyari pikin boto go pe a wani, na so makti ogri yeye e meki libisma tiriman du san den wani. Neleki fa den botoman na ini den  pikin boto dati no man tapu a watra fu tyari a boto gowe, na so den tiriman no man tapu den ogri yeye fu basi den. Den ogri yeye dati e suku fu pori a denki fu libisma teleki yepi no de moro gi den, èn den de nomonomo fu tyari ’helu kon gi grontapu’ (Openbaring 12:12). Fu dati ede, na soso wan sma di abi makti moro Satan nanga den ogri yeye fu en kan tyari kenki kon trutru. A sma dati na Yehovah Gado.​—Psalm 83:18; Yeremia 10:7, 10.

3. Tru Kresten e horibaka soso gi Gado Kownukondre. Yesus nanga den disipel fu en ben sabi taki na wan ten di Gado srefi poti, a ben o seti wan kownukondre na hemel fu tiri heri grontapu. Bijbel e kari a tirimakti disi Gado Kownukondre, èn a e tyari kon na krin taki na Yesus Krestes na Kownu fu a kownukondre disi (Openbaring 11:15). Fu di a Kownukondre dati o tyari wini kon gi ala libisma, meki „a bun nyunsu fu Gado Kownukondre” ben de a moro prenspari sani di Yesus ben e fruteri sma (Lukas 4:43). Boiti dati, a ben leri den disipel fu en fu begi: „Meki yu Kownukondre kon.” Fu san ede a ben du dati? Fu di te a Kownukondre dati o tiri, dan a wani fu Gado o pasa na hemel èn na grontapu.​—Mateyus 6:9, 10.

We dan, san o pasa nanga libisma tirimakti? Bijbel e taki dati den tirimakti „na heri grontapu” o kisi pori (Openbaring 16:14; 19:19-21). Efu wan sma e bribi trutru taki Gado Kownukondre de fu tyari wan kaba kon na ala den politiek sistema fu libisma, dan a no de fu taki dati a no o horibaka gi den sistema disi. Efu a ben o horibaka gi den tirimakti disi di o kisi pori, dan fu taki en leti, na gens a ben o gens Gado.

Soleki fa wi si, dan tru Kresten no e teki prati na politiek. Ma yu denki taki den no e du noti fu meki sani waka moro bun na ini a libimakandra fu den? Luku a piki na ini a tra artikel.

[Prenspari pisi na tapu bladzijde 7]

Yehovah Kotoigi no e horibaka gi politiek, ma den e preiki fu Gado Kownukondre