“Ho hlompha ’mè oa Molimo ho ile ha ipha matla ha . . . matšoele a bahetene a phallela ka kerekeng. . . . Boinehelo [ba bahetene bao ba sokolotsoeng hore e be Bakreste] hammoho le tsela eo ba neng ba ikutloa ka eona ka bolumeli bo ne bo ile ba e-ba teng ka lilemo tse likete ka lebaka la borapeli ba molimotsana ea bitsoang ‘’mè e moholo’ le ‘moroetsana ea nang le bomolimo.’”—The New Encyclopædia Britannica (1988), Volume 16, leqepheng la 326 le la 327.

“U tla emola, ’me u tla tsoala mora, ’me u tla mo rea lebitso la Jesu. O tla ba moholo, ’me o tla bitsoa Mora oa Ea holimo-limo. . . . Ho halalelang ho tla tsoaloa ke uena ho tla bitsoa Mor’a Molimo.”—Mongolo o tšekaletseng ke oa rōna; Luka 1:31-35, Bibele ea Sesotho.

Temana ena e bontša ka ho hlakileng hore Maria e ne e le ’mè oa “Mor’a Molimo,” eseng ’mè oa Molimo. Na o ne a imme Eo le ‘maholimo, a ke keng a mo lekana’? (1 Marena 8:27) Ha ho mohla a ileng a fana ka maikutlo a joalo. Ke thuto ea Boraro-bo-bong e ferekantseng batho tabeng ea hore na ha e le hantle Maria ke ’mè oa mang. Seboka se neng se tšoaretsoe Efese ka 431 C.E., se ile sa etsa hore batho ba qale ho rapela Maria ka mor’a hore se mo bitse Theotokos (e leng lentsoe la Segerike le bolelang “Ea tsoetseng Molimo”), kapa “’Mè oa Molimo.” Motse oo oa Efese, moo seboka sena sa kereke se neng se tšoaretsoe teng, e ne e le khale baahi ba oona ba rapela litšoantšo ba bile ba etsa mekete bakeng sa molimotsana oa pelehi, e leng Artemise.

Ka hona mekhoa e meng e mengata e neng e sebelisoa ha ho rapeloa setšoantšo sa Artemise se “oeleng leholimong,” e kang mekoloko ea borapeli, e ile ea kenyelletsoa borapeling ba Maria. (Liketso 19:35) Mokhoa o mong o ileng oa kena butle-butle lithutong tsa Bokreste ke oa ho sebelisa litšoantšo tsa Maria le tsa ba bang ha ho rapeloa.

Bapisa litemana tsena tsa Bibele: Matheu 13:53-56; Mareka 3:31-35; Luka 11:27, 28